Gün keçdikcə Sumqayıt daha müasir görkəm alır. Şəhərimizdə yenidən qurulan yollar, abadlaşan küçələr, respublikamızın 3-cü böyük şəhərinin inkişaf etməsindən xəbər versə də, təəssüf ki, Sumqayıtın ekoloji problemləri hələ də bitib tükənmək bilmir. Belə ki, doğma şəhərimizin gün-gündən müasirləşən simasına yaraşmayan natəmizlik baş alıb gedir. Bu, özünü xüsusilə yay fəslində, isti havalarda küçə və dalanlardakı zibilxanalardan gələn baş çatladan üfunətlə göstərir. Heç xəzri əsən vaxtı şəhərin 17-ci mikrorayon ərazisində yerləşən 8-ci binanın həyətindən keçmisinizmi? Əlbəttə ki, keçmisiniz. Havada uçan, ağacların budaqlarına dolaşan sellofan torbalar, kağız-kuğuz, toz qarışıq üzünüzə-gözünüzə çırpılan zir-zibildən, ayağınızın altında qalan çürümüş meyvə-tərəvəz qalıqlarından da xəbəriniz var. Deyəcəksiniz ki, ərazidə yaşayan sakinlər təmizliyə riayət etsinlər. Lakin məsələ bildiyiniz kimi deyil. Ərazidə 4 binanin sakinləri sözün əsl mənasında cəmi dörd zibil yeşiyindən asılı vəziyyətdədirlər. Normal haldır ki, qutular da dolandan sonra zibil yerə tökülür. Hətta ərazidə yerləşən uşaq bağçasının da zibilləri həmin əraziyə tökülür. Vaxtında daşınmayanda isə sözügedən ərazidə ürəkbulandıran acınacaqlı mənzərə ortaya çıxır. Natəmizlikdən, antisanitariyadan söz düşəndə açığı yada düşən ilk məkan Sumqayıt şəhərinin gözdən könüldən uzaq zibilliyə qərq olmuş və keçilməsi belə müşkülə çevrilən küçələri və həyətləri yada düşür. Daha küçədə ətrafa səpələnən zibillərin müşayiəti ilə ərazidə oynayan uşaqların sağlamlığını nə qədər təhlükəyə atdığımızı özünüz fikirləşin. Ərazinin yolu da ki yol deyil. Adam lap abırdan düşür. Qış aylarında sözügedən ərazinin yolu keçilməz vəziyyətdə olur. Bütün bu problemləri görəndə belə bir fikir yaranır insanda: Görəsən aidiyyəti qurumlar bu ərazidə yaşasaydılar, ərazinin zibilləri yenəmi ətrafa səpələnərək natəmizliyi ilə ''göz oxşayardı''?

Xədicə Səxavətqızı
Xeberle.com