Aprelin 30-da Azərbaycan Qızıl Aypara Cəmiyyətinin təşəbbüsü ilə “İlk yardımın qiymətləndirilməsi və potensialın öyrənilməsi”  mövzusunda Qızıl Aypara Cəmiyyəti Sumqayıt şəhər  bölməsində  görüş keçirilib. 

Bölmədən Xeberle.com-a  verilən məlumata görə, görüşdə Cenevrə Beynəlxalq Qızıl Xaç komitəsi və Avstriya Qızıl Xaç Cəmiyyətinin ilk yardım sahəsi üzrə ekspertləri  xanım Megan Turkington və Dr. Gernot Gromer, Azərbaycan  Qızıl Aypara Cəmiyyəti Sağlamlıq şöbəsinin rəhbəri Şahin Biləndərli,  Beynəlxalq Qızıl Xaç Komitəsinin Azərbaycandakı   Nümayəndəliyinin  Əməkdaşlıq üzrə  məsul işçisi Rasim Allazov, Azərbaycan Qızıl Aypara Cəmiyyəti Miqrasiya şöbəsinin əməkdaşı Sona Hacıyeva,  eləcə də  Qızıl Aypara Cəmiyyətinin Sumqayıt  şəhər bölməsinin sədri Mətanət Məhərrəmova, bölmənin işçi heyəti və könüllüləri  iştirak ediblər.  Görüş zamanı  QAC Sumqayıt şəhər bölməsinin fəaliyyəti haqqında məlumat verilib. Bölmə tərəfindən ilk yardım mövzusunda  hazırlanmış video-slayd  və  şəkillər nümayiş olunub, qonaqlar ilk yardım vərdişlərinin aşılanması üçün istifadə olunan əyani vəsait və avadanlıqlarla  tanış olublar. Bu sahənin inkişaf etdirilməsi üçün təkliflər irəli sürülüb.

 Qonaqlar çox yüksək təəssuratlarla ofisdən ayrılaraq Təcili Tibbi Yardım Xəstəxanasının  və Təcili Tibbi Yardım Stansiyasının əməkdaşları  ilə  görüşdə iştirak ediblər. Qonaqlar təcili tibbi yardımın mövcud vəziyyəti ilə  yaxından tanış olublar.