Ölkəmizdə həyata keçirilən siyasətin mühüm istiqamətlərindən biri də ətraf mühitin mühafizəsini və insanların sağlam təbii şəraitdə yaşamasını ən yüksək səviyyədə təmin etməkdir. Bu baxımdan görülən işlər həqiqətən də sevindiricidir. Ümummilli lider Heydər Əliyevin "bir ağac kəsən elə bil mənim qollarımı kəsir” söyləməsi, ölkə prezidenti İlham Əliyevin vaxtaşırı ağacəkmə kompaniyalarında iştirak etməsi, ağac kəsənlərə qəti mövqeyi, əlaqədar qurumlardan cəza tədbirləri tələb etməsi, təbii ki, dövlətin ekologiyaya münasibətini ifadə edir.

Məlum olduğu kimi, bu ilin mart ayından ölkəmizin bütün guşələrində Heydər Əliyev Fondunun vitse-prezidenti, İDEA-Ətraf Mühitin Mühafizəsi üzrə Beynəlxalq Dialoq İctimai Birliyinin təsisçisi Leyla xanım Əliyevanın "Ümumrespublika yaşıllaşdırma” layihəsi əsasında ağacəkmə kampaniyasına start verildi. Bütün ölkə boyu milyonlarla ağac əkildi. Sumqayıta da sözügedən kompaniyadan pay düşdü. Belə ki, kompaniya çərçivəsində Bakı-Quba yolunun Sumqayıta düşən ərazisində 30 mindən çox ağac əkildi. Bu kompaniyaya demək olar ki, bütün idarə və müəssisələr cəlb olundu. Sözügedən ərazi hissələrə bölündü. Tapşırığa əsasən, idarə və müəssisələr onlara həvalə olunan ərazilərdə ağac əkməli və bu ağaclara qulluq etməli idilər. Belə də oldu. Ancaq bir müddət. Sizə təqdim etdiyimiz foto və videolarda açıq aydın görünür ki, əkilən ağaclara qulluq olunmadığı səbəbindən quruyub. Kilometrlərlə ərazidə qızmar yay günlərində su görməyən ağaclar məhv olub. Halbuki, bu prosesə çoxlu sayda insan cəlb olunmuş, dövlət vəsaiti xərclənmişdi.

Məsələyə aydınlıq gətirmək üçün, Sumqayıt Şəhər İcra Hakimiyyətinə müraciət etdik. Qurumun sözçüsü Rəhimdil Əhmədov  məsələni şərh edərək bildirdi ki, "Ümumrespublika yaşıllaşdırma” layihəsində Sumqayıtın demək olar ki, bütün idarələri iştirak etmişdi: "Bütün müəssisələr, bələdiyyə, təmizlik departmenti, məktəblər, litseylər, səhiyyə, mədəniyyət, bir sözlə bütün qurumların bu kompaniyada payı var. Onlar öz ərazilərində ağac əkməklə yanaşı bu ağacların qulluğunu da öz üzərilərinə götürüblər. Qurumlar tərəfindən konkret işçilər, bağbanlar ayrılıb ki, onlar da vaxtaşırı ərazilərinə qulluq göstərirlər. Sizin qeyd etdiyiniz ərazi isə STP-nin payına düşür. Biz icra hakimiyyəti olaraq onlara bu kompaniyada iştirak etməyi tövsiyə etdik. Təəssüflər olsun ki, onlar bununla kifayətləndi. O ərazidə ağaclara sonradan qulluq olunmadı deyə, ağaclar qurudu.”

Məsələ ilə bağlı Sumqayıt Texnologiyalar Parkı (STP) ilə də əlaqə saxlayıb, mövqe öyrənməyə çalışdıq. Təəssüf ki, qurumun saytında yerləşdirdiyi nömrələr yalnız Satışla bağlı suallar üçün imiş. Telefona cavab verən şəxs bildirdi ki, yaşıllıqla bağlı suala cavab vermək iqtidarında və səlahiyyətində deyil: "Bu nömrə satışa aiddir. Bizdə o ağaclarla bağlı məlumat yoxdur”.

Görünən odur ki, yüzlərlə insanın əməyinə hörmətsizlik olunub. Ən əsası isə Heydər Əliyev Fondunun vitse-prezidenti, İDEA-Ətraf Mühitin Mühafizəsi üzrə Beynəlxalq Dialoq İctimai Birliyinin təsisçisi Leyla xanım Əliyevanın "Ümumrespublika yaşıllaşdırma” layihəsinə biganə münasibət göstərilib.

Bəzi məmurların Rəhbərə yanlış məlumat vermə ənənəsi burda da işləyir güman ki. Sumqayıt şəhər icra başçısı Bakı-Quba yolundakı ağaclara da nəzarət etməli deyil hər halda. Əgər idarə-struktur rəhbərləri vaxt tapsalar, öz kuratorlarından yaşıllığın nə vəziyyətdə olduğunu arabir soruşsunlar, lütfən! Heç olmasa bu yazıdan, foto və videogörüntüdən sonra…(reader.az)