Ölkənin elektrik enerjisi təsərrüfatında həyata keçirilən hazırlıq işləri Sumqayıtın elektrik enerjisi ilə təminatında müstəsna rolu olan enerji obyektlərindən də yan keçmədi. Digər enerji müəssisələri kimi, “Sumqayıt Elektrik Şəbəkəsi”nin (EŞ) xidməti ərazisində əvvəllər olduğu kimi, son aylar ərzində də elektrik enerjisinə olan tələbatın daha da keyfiyyətli şəkildə paylanması, elektrik verilişi xətlərində texnoloji itkilərin azaldılması istiqamətində müəssisənin balans mənsubiyyətindəki transformator məntəqələri (TM) və elektrik verilişi xətlərində mühüm tədbirlər icra edilməkdədir.

XeberLent.az informasiya agentliyinin verdiyi məlumata görə, ümumiyyətlə, cari ilin I rübündə müəssisənin balans mənsubiyyətinə aid olan EVX-lərdə və TM-lərdə nəzərdə tutulmuş yenidənqurma işləri qrafikə uyğun başa çatdırılıb

Sözügedən dövrdə müəssisənin xidməti ərazisində 28 kilometrdən artıq SİP, 700 metrə yaxın isə kabel xətləri çəkilmiş, 60-dan artıq kabel xəttində isə müxtəlif təyinatlı təmir işləri də həyata keçirilımişdir. Eyni zamanda 1,7 kilometə yaxın AS markalı naqil və 15 dayaq yenisi ilə əvəzlənmişdir. Bütün bunlarla yanaşı 1450-dən artıq sayğac da quraşdırılmışdır.

Qeyd edək ki, hesabat dövründə müəssisənin balans mənsubiyyətinə aid olan TM və KTM-lərin 37-də müvafiq təmir işləri həyata keçirilmişdir. Eyni zamanda yeni güc mərkəzinin yaradılması məqsədilə iki yeni transformator da quraşdırılaraq istismara verilib.

Mənbədən əldə etdiyimiz digər bir məlumata görə, şəbəkə üzrə yanğından mühafizə tədbirləri də daim diqqət mərkəzindədir. Hazırki hava şəraitini nəzərə alaraq  yanğın təhlükəsizliyinin təmin edilməsi məqsədilə TM-lərin ərazisi quru otlardan təmizlənmiş və digər qabaqlayıcı tədbirlər görülür.

“Növbəti mövsümə hazırlığın uğurla başa çatdırılması istiqamətində enerji təchizatçıları öhdələrinə düşən vəzifələri layiqincə yerinə yetirməyə çalışırlar”, – deyən mənbə elektrik enerjisindən qeyri qanuni istifadə hallarının qarşısının alınması istiqamətində həyata keçirilən tədbirlərdən də məlumat verdi.

Mənbəyə istinadən qeyd edək ki, cari ilin I rübü ərzində müəssisənin xidməti ərazisində keçirilmiş reydlər zamanı 760-dan artıq istehlakçının (bunun 702-i məişət abonenti (əhali) istehlakçıları qrupuna aiddir) sayğaç uçot komplektini pozması faktı aşkar edilib.

Aşkar edilmiş qayda pozuntuları müvafiq qaydada aktlaşdırılmış və 1 milyon 287,4 min  kilovatsaata yaxın (bunun 1 milyon 52,8 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 77,2 min manatdan artıq istehlak dəyəri bərpa edilib.

 Həyata keçirilən müvafiq tədbirlər nəticəsində həmin bu məbləğin 70 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.  O cümlədən, cari ilin mart ayında  keçirilmiş reydlər zamanı 185 qayda pozuntusu (bunun 167-i məişət abonenti (əhali) istehlakçıları qrupuna aiddir) faktı aşkar edilərək müvafiq qaydada aktlaşdırılmışdır. Nəticədə 380,8 min kilovatsaata yaxın (bunun 278,1 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 22,8 min manatdan çox istehlak dəyəri bərpa edilib

Mənbə onu da bildirdi ki, cari ilin mart ayında müəssisənin xidmət ərazisində 79,6 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 3.1 milyon kilovatsaata yaxın azdır. O cümlədən, daimi əhali istehlakçı qrupu tərəfindən istehlak ötən ilin müvafiq dövrü ilə müqayisədə 3,7 milyon kilovatsaatdan çox artaraq 23,3 milyon kilovatsaata yaxın olmuşdur. Onu da qeyd edək ki, cari ilin I rübü ərzində isə müəssisə üzrə istehlak 257,4 milyon kilovatsaata yaxın olmuşdur. Nəticədə 2013-cü ilin müvafiq dövrü ilə müqayisədə istehlak 2,3 milyon kilovatsaata yaxın azalmışdır. O cümlədən, daimi əhali istehlakçı qrupu tərəfindən istehlak 76,6 milyon kilovatsaata yaxın olmuşdur ki, bu da 2013-cü ilin eyni dövründəki istehlakdan 8,8 milyon kilovatsaata yaxın çoxdur. Ödəniş isə ötən ilin eyni dövründəki göstərici ilə müqayisədə mütləq bir faizə yaxın artıb.