İnternetdən müxtəlif üsullarla gəlir əldə etmək mümkündür. Azərbaycanda isə ən çox inkişaf edən sahə wap xidmətlər və veb yükləmə saytlarıdır. Bu saytlar, əsasən, reklamlarla öz gəlirlərini təmin edirlər.

 Bəs reklam gəlirlərinə görə veb saytlar vergiyə cəlb edilirmi?

 Məsələ ilə bağlı Vergilər Nazirliyinə sorğu ünvanladıq. Qurumdan verilən məlumata görə, veb saytlar, eləcə də, şəxslərin internet vasitəsilə qazancları adi qaydada vergiyə cəlb olunur. Burada fərqli prosedur tətbiq edilmir. “Vergi Məcəlləsinə əsasən, internet səhifələrinin fəaliyyətindən gəlir əldə edən hüquqi şəxslər və hüquqi şəxs yaratmadan sahibkarlıq fəaliyyətini həyata keçirən fiziki şəxslər sadələşdirilmiş vergi ödəyicisi olmaq hüququna malikdirlər. Hüquqi şəxslər və hüquqi şəxs yaratmadan sahibkarlıq fəaliyyətini həyata keçirən fiziki şəxslər bu hüquqdan istifadə etmədiyi halda hüquqi şəxslər mənfəət vergisinin, hüquqi şəxs yaratmadan sahibkarlıq fəaliyyətini həyata keçirən fiziki şəxslər isə gəlir vergisinin ödəyicisi kimi qeydiyyata alınırlar.

Bununla yanaşı, Vergi Məcəlləsinin 155.1-ci maddəsinə əsasən sahibkarlıq fəaliyyəti göstərən və ardıcıl 12 aylıq dövrün istənilən ayında (aylarında) vergi tutulan əməliyyatlarının həcmi 120.000 manatdan artıq olan şəxslər (bu Məcəllənin 218.1.1.1-ci və 218.1.1.3-cü maddələrində göstərilənlər istisna olmaqla) bu Məcəllənin 157.3.1-ci maddəsində göstərilən tarixdən 10 gün ərzində ƏDV-nin məqsədləri üçün qeydiyyata dair ərizə verməyə borcludur”.

Nazirlikdən onu da bildirdilər ki, hər hansı bir şəkildə gəlir əldə edən şəxs vergi qeydiyyatına düşməlidir. Əks halda, vergidən yayınma halı aşkarlanarsa, internet səhifəsi işlədən və hər hansısa bir formada gəlir əldə edən şəxs qanunla müəyyən olunmuş formada məsuliyyətə cəlb edilə bilər.

Sonda onu qeyd edək ki, internetin sürətli inkişafı gələcəkdə bütün işlərimizi görə biləcəyimiz onlayn məkanının tədricən formalaşdığından xəbər verir. Bu gedişatda maraqlı ideya ilə yaradılmış hər hansısa veb xidmət gələcəkdə külli miqdarda qazanc mənbəyi ola bilər. Mütəxəssislər də cəmiyyətin gələcəyini internetsiz təsəvvür edə bilmirlər. Elə isə, düşünməyə dəyər. Maraqlı ideya pul qazanmaq üçün gözəl fürsət yarada bilər. Fəaliyyətinizi isə qanun çərçivəsində formalaşdırmağı unutmayın.

/simsar.az/