Bilmirəm, bir ilə yaxındır və ya çox, bəzi diletant idman "jurnalistlərimizin" uğursuz söz axtarışının nəticəsi olan "baş tutub", "baş tutmaq" məsələsi digər jurnalistlərimizə də sirayət edib.

Söhbət uzun illərdir ki dilimizdə heç bir maneəsiz işlədilən "tədbir keçirilib", "oyun keçirilib", "mərasim təşkil olunub" və s.kimi ifadələrdə bəzi oyunbazların "keçirilib", "təşkil olunub" sözlərinə guya həmin sözlərin çox təkrar olunmaması üçün yeni bir "əvəzedici" işlətmələrindən gedir. Doğrudanmı, dil əllamələri başa düşmürlər ki, "baş tutub" ifadəsi o zaman işlədilə bilər ki, hansısa bir tədbirin (etiraz mitinqinin, başqa bir aksiyanın) keçirilməsinə ya yerli orqanlar tərəfindən qadağa qoyulmuş olsun, ya da qar-yağış, güclü külək, qasırğa ucbatından hansısa tədbirin keçirilməsi təhlükə altında olsun, lakin kimlərinsə inadkarlığı, qətiyyətliliyi sayəsində, məmur maneələrinə, təbiət çətinliklərinə baxmayaraq, nəzərdə tutulmuş tədbir keçirilib. Bax, bu zaman demək olar ki filan tədbir baş tutub (yəni ki, qadağalara, maneələrə baxmayaraq!). Məncə fikir aydındır.

Növbəti dəfə əsəbiləşərək, məni bu barədə yazmağa vadar edən dilin xüsusiyyətlərini bilməyən bəzi naşı idman jurnalistlərinin dil boğaza qoymayaraq işlətdikləri "baş tutdu" ifadəsini hətta digər həmkarlarımızın da kor-koranə öz leksikonlarına, cümlələrinə daxil etmələridir. Bu gün isə özü haqqında böyük fikirlərdə olaraq, həya eləmədən "mən şəxsiyyətəm" deyən jurnalistlərdən birinin başqa bir müəllifin yazısında "iməcilik keçirildi" sözlərini "iməcilik baş tutdu" kimi təqdim etməsi hövsələmi lap daraltdı.

Ay müsəlman, iməcilik kiminsə xoşuna gəlib-gəlməməsindən asılı olmayaraq, əksəriyyətin razılığı ilə keçirilən bir aksiyadır - istəməyənlər, razı olmayanlar sadəcə iməciliyə gəlmirlər. İməciliyə hansı qüvvələr mane olur ki, sən "şəxsiyyət" götürüb yazırsan ki, "iməcilik baş tutdu", yəni onu keçirməyə mane olan "qara qüvvələrə", fırtınaya-borana baxmayaraq həmin tədbir "baş tutdu". Ayıbdır axı, sözlərin "başına" bu cür oyunlar açmayın, sözlərin "şəxsiyyətinə" toxunmayın, dilimizi öz savadsızlığınızla korlamayın. Ayıbdır, vallah, ayıbdır. Tədbir keçirilibsə, yazın ki, "keçirilib" (yüz dəfə təkrar səslənsə də belə!), yeri oldu-olmadı "baş tutub" yazmayın. "Baş tutub" yazmağı tərgidin, cənablar!

Rəhman Orxan