Universitet işçilərinin və tələbələrinin AzadXeber.net saytına verdiyi məlumata görə, Nadir Qəhrəmanovdan sonra universitetdə heç bir problem həll olunmayıb
Bir neçə müddət bundan öncə ölkə başçısı İlham Əliyevin sərəncamı ilə Elxan Hüseynov Sumqayıt Dövlət Universitetinin (SDU) rektoru vəzifəsinə təyin olundu. Sözügedən universitetinin əvvəlki rektoru Nadir Qəhrəmanovun dövründə universiteti cənginə alan rüşvət, özbaşınalıq, təhsilin səviyyəsinin bərbad gündə olması ilə bağlı mütəmadi şəkildə mediada məlumatlar dərc olunurdu. Digər tərəfdən SDU ilə bağlı yayımlanan məlumatlar universitetin müəllim və tələbə heyyəti tərəfindən də bir neçə dəfə təsdiqlənib.
Nadir Qəhrəmanovun istefaya göndərilməsində ən çox sevinən universitet tələbələri Elxan Hüseynovun yeni rektor təyin edilməsi ilə SDU-dakı rüşvət, korrupsiya və özbaşınalıqla bağlı problemlərin həll ediləcəyini böyük ümidlə gözləyirdilər. Lakin görünən budur ki, tələbələrin arzuları elə arzu olaraq ürəklərində qalacaq.
Belə ki, universitet işçilərinin və tələbələrinin AzadXeber.net saytına verdiyi məlumata görə, Nadir Qəhrəmanovdan sonra universitetdə heç bir problem həll olunmayıb:
Dəyişən yalnız imtahanlara yığılan rüşvətin sistemləşdirilmiş formada həyata keçirilməməsi ilə bağlıdır. Əgər əvəllər rüşvət yığımı Nadir Qəhrəmanovun rəhbərliyi və nəzarəti altında mərkəzləşdirilmiş formada həyata keçirildisə, hazırda müəllimlər, kafedra müdirləri, dekanlar nə qədər və necə istəyirlər rüşvət alırlar.
Azərbaycanın ən böyük üçüncü şəhəri olan Sumqayıtın yeganə universitetinin belə bir vəziyyətdə olması yalnız təəssüf doğura bilər.
Qeyd edək ki, operativlik naminə qarşı tərəfin də fikirlərini dərc etməyə hazırıq.
Xəyal Şükür
Xəbərdən istifadə edərkən istinad etmək vacibdir.
