Bu barədə o qədər deyilib ki, adam danışmaq istəmir, birdən kiməsə yenə ürəkbulanması verər. Məktəbin açılması iki həftə olub, demək olar uşaqlı valideynli hamının evində söz-söhbətdir. Uşaqlar hər gün əlində bir sıyahı ilə evə gəlirlər. Siyahı ya "pul gətir”, ya da "filan vəsaiti al”la bağlı olur. Ötən vaxt ərzində hələ də orta məktəbin iş dəftəri və ya başqa bunabənzər dərs vəsaitlərindən istifadə məsələsi dəqiqləşməyib. Hər məktəb, hər müəllim özü, lap kefi istədiyi kimi formada uşaqları divara dirəyir, uşaqlar da valideynləri. Yəni bu məsələni illərdən kökündən həll etmək bu qədərmi çətindir?
Bizim uşaqların çoxu niyə oxumağa həvəsli deyillər? Çünki uşaqlarımız məktəbdən yorulmur, sadəcə bezirlər. Bunu dəqiqləşdirmək üçün test də lazım da deyil. Fikir versəz, uşaqlar məktəbə gələndə, elə bil, artıq məktəbdən evə dönmüş kimi, yorğun qayıdan vəziyyətdə olurlar. Son illər məktəbə tələsən uşaqlar da azalıb. Ətrafda həvəslə dərs oxuyan, Allahın verdiyi səbirlə dolaşan tək-tük uşaq görmək olar. Məktəbin açılmağı valideynlərə baha başa gəlir. Bir uşaqdan məktəbli düzəltmək üçün təxminən 300 manat lazımdır. Üstəlik də yığılan "sehirli pulları” əlavə etsək, belə çıxır ki, bütün valideynlər dədə babasından mirası qalmış valideynlərdir.
Təhsil nazirliyinin məktəblərdə pul yığılması ilə bağlı mübarizəsi narkomaniyayla mübarizədən də ağır işə çevrilib. Pul yığan direktorları aşkarlamaq narkobaronları tutmaqdan da çətinləşib. Hər il nazirlik qaynar xəttin şikayətlərindən sonra bəyan edir ki, pul yığılan məktəb direktorları işdən çıxarılacaq. Və necə olursa, illərdir pul yığımına görə işdən qovulan direktorun siftəsini etməmişik. Bu dəqiqə məktəblərdə vurhavur pul yığımı prosesi gedir, hətta başa çatır. Fond pulu, "müəllimlər günü”. Bir də "süpürgəçi pulu”. İllər ərzində tək dəyşən "süpürgə” ölub. Artıq ona "ci” şəkilçisi artırıblar. Yəni, məktəbin xadimə pulunu dövlət əvəzinə valideynlər ödəyir. Başa düşmək olar ki, çüzi maaşla dolana bilməyən, daha çox yaşlı olan xadimələr üçün zir-zibil təmizləmək çətindir. Amma hər şeyin adı qoyulmayan ölkədə buna da Təhsil Nazirliyi bir əncam çəkməlidir axı. Necə olur ki, məktəb siniflərində gün ərzində gələn uşaq sayı barədə direktorda məlumat olur, amma sinifdə yığılan pullar haqda ona xəbər çatmır. Direktor hətta xəstə uşaqların da məktəbə gətirilməsini tələb edir ki, sinif dolsun, amma əlində pul siyahısı ilə gəzənləri diqqətindən qaçırır. Adamın ağlayana qədər gülməyi gəlir. Maraqlıdır ki, Təhsil Nazirliyi pulyığan direktora "tutduqsa, işdən qovacağıq” hədəsi ilə barmaq silkələyir. Qovmaq niyə ki, bu cəzadırmı, məsuliyyətə cəlb etmək tədbiridirmi? Əminəm ki, ölkədə işini bilən, ciddi məktəb direktorları sayla da olsa var. Adam hərdən fikirləşir ki, bu pulyığan direktorlarının nazirlikdən qorxusu olsaydı, bu şikayətlər bu qədər davam etməzdi. Bir tərəfdən də dönüb baxırsan ki, nazirlik məktəb direktorları üçün işə qəbula müsabiqə şərtlərini elan edir.

Xəbərdən istifadə edərkən istinad etmək vacibdir.