Noyabrın 25-də AMEA-nın Nəsimi adına Dilçilik İnstitutu ilə Milli Televiziya və Radio Şurasının birgə layihəsi olan "Televiziyada ədəbi dilin normalarının gözlənilməsi” adlı monitorinqlərin nəticələrinə dair mətbuat konfransı keçirilib. Xeberle.com məlumat verir ki, monitorinqləri AMEA-nın Nəsimi adına Dilçilik İnstitutunun aparıcı elmi işçiləri filologiya üzrə fələsəfə doktoru, dosent Təranə Şükürlü və Nəzakət Qaziyeva aparıb. Konfransı giriş sözü ilə açan MTRŞ-nin sədri Nuşirəvan Məhərrəmli qeyd edib ki, artıq bizim Dilçilik İnstitutu ilə apardığımız monitorinqlər hər il keçirilir. Layihə çərçivəsində milli telekanallarda yayımlanan 6 telekanalda – İctimai TV, Xəzər TV, ANS TV, ATV, Space TV və Lider TV-də yayımlanan verilişlər izlənilərək ədəbi dil normalarının pozulma faktları aşkarlanmışdır. Monitorinqlər sentyabr və oktyabr aylarında aparılmışdır. Məlumdur ki, 2013-cü ilin aprelin 9-da Azərbaycan Respublikasının prezidenti cənab İlham Əliyevin sərəncamı ilə "Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqram”ının təsdiqlənməsi KİV-də Azərbaycan dilinin təbliği ilə bağlı xüsusi bəndin olması bu məsələnin əhəmiyyətini bir daha təsdiq edir. Monitorinqin məqsədi milli televiziya kanallarında ədəbi dilin normalarının pozulması hallarının müəyyən olunması, statistik baxımdan araşdırılması, onların aradan qaldırılması istiqamətində tədbirlərin həyata keçrilməsi üçün təkliflərin irəli sürülməsidir. Dosent Təranə Şükürlü çıxışında bildirib ki, televiziya ilk növbədə informasiya mənbəyidir. İnformasiyanın çatdırılmasında məqsəd tamaşaçını məlumatlandırmaqdır: "Ekranda gedən verilişlərin başlıca məqsədi ondan ibarətdir ki, verilişlərin vasitəsilə ölkə ictimaiyyətinin diqqəti kütləvi şəkildə dilin təbliğinə yönəldilir. KİV-in içərisində dilin informasiya, estetik, ideoloji funksiyaları daha çox televiziyada qabarıq şəkildə üzə çıxır. Buna görə də efirə çıxan aparıcının nitqinə diqqət yetirilməlidir. Çünki burada aparıcı televiziya dilinin təmsilçisidir. Televiziya dilində bütün informasiyalar ədəbi dilin fonetik, leksik və qrammatik səviyyələri əhatə edir. Ədəbi dilin nisbi sabitliyini əhatə edən normalar televiziya nitqində fikrin tamaşaçıya çatdırılmasında mühüm rol oynayır”.

Ümumilikdə ədəbi dilin normalarından yayımı əks etdirən 509 nümunə tədqiqata cəlb edilmişdir. Bunlardan 97-i (19%) ANS TV-də, 91-i (17%) Xəzər TV-də, 89-u (17%) Space TV-də, , 90-ı (17%) Lider TV-də, 85-i (16%) ATV-də, 56-ı (11%) isə İctimai TV-də müşahidə olunmuşdur.

Azərbaycan ədəbi dil normalarını ən çox pozan televiziya kanallarının aparıcıları isə aşağıdakı şəxslərdir:

İlqar Mikayıloğlu, Mətanət Əliverdiyeva, Turan (Samir) İbrahimov, Elvin Basqallı, Saleh Bağırov, Mikayıl Güləddinoğlu, Elgiz Əkbər, Zəminə Əliyeva, Natavan Babayeva, Samirə Mustafayeva, Vüsalə Nürəddinqızı, Türkay Verdiyeva, Gülnar Muxtarqızı, Qənirə Ataşova.