Milli Dirçəliş Partiyasının sədri Sabir Tanrıverdiyevin hakim dairələr yanında etimadını itirməsi onun biznes fəaliyyətinə də mənfi təsirini göstərməkdədir. Elə onun nəzarəti altında olan Sumqayıt Maşın bazarı ilə bağlı yaşananlar da bunun təsdiqi kimi çıxış edə bilər. Düzdür, sözügedən Maşın bazarı bu gün də fəaliyyət göstərir. Amma bu bazarda S.Tanrıverdiyevin ancaq adı var, onun Sumqayıt maşın bazarında 20 faizə sahib olduğu deyilir. Məlumatlı mənbənin sözlərinə görə, Sabir Tanrıverdiyev artıq əvvəlki etimad və hörmətin sahibi olmadığı üçün onun maneəsiz olaraq respublikada bizneslə məşğul olmasında da problemlər yaranıb. Partiya sədri özünə qarşı olan mövcud etimadsızlığı aradan qaldırmaq məqsədilə çoxsaylı cəhdlər göstərməsinə rəğmən onun səyləri hər dəfəsində nəticəsiz qalıb. Mənbə bildirir ki, səylərinin nəticəsiz qaldığını görən Sabir Tanrıverdiyev alternativ yollar aramaq eşqinə düşüb. Məhz bu səbəbdəndir ki, S.Tanrıverdiyev ara-sıra ölkədə olmur. Onun daha çox Belarus Respublikasına səfər etdiyi deyilir. Bununla bağlı məlumatlı mənbənin cumhuriyyet.az-a verdiyi məlumata görə partiya sədri Belarusa son səfərindən də əliboş qayıtmayıb. Mənbənin sözlərinə görə Tanrıverdiyev keçmiş sovet respublikasından Azərbaycana 22 ton konfet, 2 vaqon - 150 ton isə kartof gətirib. Hazırda bu mallar Sumqayıtda, daha çox isə Milli Dirçəliş Partiyasının bu şəhərdəki ofisinin yanında elə S.Tanrıverdiyevin özünə məxsus bazarda satışa çıxarılıb. Yeri gəlmişkən, bir neçə il əvvəl "Fatimei Zəhra” adlanan bu bazarın adının üzərindən götürülmə səbəbi və islam aləmində müqəddəs sayılan adın S.Tanrıverdiyevə necə bağlı olması haqda da mənbəmiz ilginc məlumatlar verib. Dəqiqləşdirmələrimizdən sonra bu məlumatları diqqətinizə çatdıracayıq...

Xeberle.com