Dünya səyahətinə çıxmaq çox insanın uşaqlıq arzusudur, ancaq elə ölkələr var ki, nəinki istirahətə getmək, yanından keçmək belə təhlükəlidir. Səyahət üçün təhlükəli dünyanın 10 ölkəsini sizə təqdim edirik: 

1. Şübhəsiz ki, siyahıda birinci yerdə Suriyadır. 4,5 milyon əhali ölkəni tərk etmək məcburiyyətində qalıb. Ölənlərin sayı isə artıq yüz minləri keçib. İŞID başda olmaqla bir çox radikal qrup Suriyada məskunlaşıb. 

2. İlk sıralarda olan ölkələrdən biri də, Əfqanıstandır. 2001-ci ildə ABŞ-ın müdaxiləsi ilə Taliban hərəkatı rəhbərlikdən uzaqlaşıb, ancaq ölkə hər an müharibə və bombardman edilmə təhlükəsi ilə qarşı-qarşıyadır. 

3. İraqda da Səddam Hüseynin devrilməsi zamanı baş verən münaqişələrdə ölənlərin sayı təxminən milyona yaxındır. Sadəcə keçən il ölənlərin sayı 11 mindən çoxdur. Ərazidə ordu ilə İŞID arasında hələ də qızğın döyüşlər gedir. 

4. Yəməndə ölkə daxilindəki Sünni və Şiə mübarizəsi ilə yanaşı qonşu ölkələrlə gedən qızğın müharibələr ölkədə yaşayışı iflic hala salır. 

5. Ukrayna siyahının mərkəzində durur. Hər zaman gözəlləri ilə diqqət mərkəzində olan bu ölkədə Rusiya ilə münaqişələrdən sonra çətin vəziyyət hələ də qalmaqdadır. Belə ki, Rusiya yönümlü qruplarla Avropanı dəstəkləyənlər arasında hər an daxili münaqişə yaşana bilər. 

6. Pakistanda da vəziyyət getdikcə qarışıq hal alır. Daxili çəkişmələr və Əl-Qaidə hərəkatına görə ölkə çətin vəziyyətdədir. 

7. Dünyanın ən qapalı ölkəsi olan Şimali Koreyaya getmək onsuz da asan bir iş deyil. Sadəcə rəsmi icazəsi olan məhdud sayda insan ölkəyə daxil ola bilər. Ölkədə şəkil çəkmək və ya tək dolaşmaq qadağandır. Hər hansı bir səhv hərəkətiniz olarsa, başınıza hər şey gələ bilər. 

8. Afrikanın iqtisadi gücü olan Nigeriyanın daxilində isə xristian və müsəlmanlar arasında münaqişə hökm sürür. Ölkədə, əsasən, qadınlara və qızlara hücum edən Boko Haram silahlı dəstəsi də yaşayışı çətinləşdirir. 

9. Fələstin və İsrail illərdir davam edən müharibəsi ilə dünya mediasının gündəmindən düşmür. 

10. Son olaraq da, hər kəsin dünya səyahəti zamanı mütləq getmək istədiyi tarixi Misir də bu siyahıya düşə bilib. Mübarək və Morsi rejimlərinin süqutundan sonra ölkədə baş verən daxili münaqişələr hələ də hökm sürməkdədir. Belə ki, hələlik dünya səyahətinə çıxmaq üçün imkanınız yoxdursa, bu siyahını bayraq tutaraq özünüzə bir az təsəlli verə bilərsiniz.