Ukraynanın şərqində keçirilən antiterror əməliyyatı zamanı Silahlı Qüvvələrin 42 hərbçisi həlak olub. Bu barədə Brüsseldə Ukrayna müdafiə nazirinin səlahiyyətlərini icra edən Mixail Koval NATO-dakı həmkarları ilə görüşü zamanı bildirib.
Koval keçirilən əməliyyatı kifayət qədər uğurlu olduğunu qeyd edib, lakin onun nə vaxtadək davam edəcəyini açıqlamayıb. Koval dinc əhali arasında ölənlərin sayı barədə onda dəqiq məlumatın olmadığını bildirib.
Bu arada separatçı qüvvələrin nümayəndəsi Luqanskda yerləşən hərbi hissəni ələ keçirdiklərini bəyan edib. Məlumata əsasən, hərbi hissədə olan bütün hərbçilər təslim olub: “Hazırda onları hərbi hissənin təlim meydanında sıraya düzmüşük, onların barəsində hansı addımların atılacağına dair müzakirə aparılır”, deyə mənbə bildirib.
Separatçının sözlərinə görə, əsgərlər arasında çoxlu sayda yaralı var.
“UNN” agentliyi separatçılar arasında da itkilərin olduğunu bildirib. Ukrayna Milli Qvardiyasının məlumatına görə, separatçılar arasında 10-dək silahlı yaralanıb, bir neçə nəfəri öldürülüb.
Bir neçə saat əvvəl 300-dək silahlı separatçı Ukrayna Milli Qvardiyasının milis alayını mühasirəyə alaraq hərbçilərdən təslim olmalarını tələb edib. Hərbçilərin etirazına cavab olaraq separatçılar hərbi hissəni qumbaraatan, minaatan, pulemyot və avtomat silahlardan atəşə tutublar. Bir neçə saat davam edən qızğın döyüş zamanı hərbi hissədə güclü yanğın baş verib.
Ukrayna Dövlət Sərhəd Xidmətinin rəisi Nikolay Litvin isə Ukrayna-Rusiya sərhədinin gücləndirildiyini bəyan edib.
Xəbərdən istifadə edərkən istinad etmək vacibdir.
