2014-cü ilin avqust ayı yer kürəsi üçün 1880-ci ildən bəri hesablanan ən isti ay olub.

İnterAz Çinin “Sinhua” agentliyinə istinadən xəbər verir ki, bu barədə ABŞ-ın okean və atmosfer üzrə milli adminstrasiyasının hesabatında deyilir.

Təşkilatın hesablamasına görə, yer planetinin okean və quru səthində qeydə alınan temperatur dərəcələrinin orta göstəricisi həmişəkindən 0.75 selsi dərəcə yuxarı olub. Belə ki, XX əsr boyunca yer kürəsinin orta temperaturu 15.6 selsi dərəcə olduğu halda 2014-cü ilin avqust ayında planetin orta temperaturu 16.35 selsi dərəcə təşkil edib. Bu rəqəm 1998-ci ildə qeydə alınan rekord göstəricini üstələyib.

Məlumata görə, cari ilin yay ayları XX əsrin yay aylarında qeydə alınan 16.4 dərəcə orta temperatur səviyyəsini 0.71 dərəcə geridə qoyub.

Mütəxəssislərin fikrincə 2014-cü ilin qalan ayları (son 4 ay) ərzində orta temperatur iqlim normasına uyğun olsa 2014-cü il indiyədək qeydə alınan ən isti il hesab olunacaq.

Bildirək ki, tədqiqatlar əsasən okean sularının orta temperaturunun müqayisəsi üsuluyla aparılıb.