Rusiyada fəaliyyət göstərən azərbaycanlı iş adamlarının sayı artır. Belə ki, Vahid Ələkbərovun oğlu Yusif Ələkbərov da tezliklə milyarderlər sırasına daxil olacaq. 

Vahid Ələkbərov atasının adını verdiyi oğlunu öz 7,6 milyard dollarının varisi edəcək. Amma bir şərt qoyub - Yusif Ələkbərov da öz ulu babası, babası və atası kimi işə lap aşağıdan, adi işçi kimi başlamalıdır. İkinci şərt isə səhmlər zərfini parçalamamaq və bölüşdürməməklə bağlıdır. "LUKOYL” neft şirkətinin prezidenti daima bazardan şirkətin səhmlərini alaraq öz zərfini artırır - Vahid Ələkbərov şirkətinin gələcəyinə inanır. 

24 yaşlı Yusif Ələkbərov artıq Sibirdədir və Koqalımda işləyir. "O, əlbəttə, buruqçu və ya fəhlə deyil, amma aşağı vəzifəli mühəndis işləyir”,- deyə Koqalımdakı mənbə Rusiya mətbuatına bildirib. Onun sözlərinə görə, Koqalımın mərkəzində mənzildə qalan Yusif işə "Mersedes Galendvagen"də gedir. O, sahədə işləyir. Tətillərdə isə Moskvaya ailəsini görməyə gedir. 

Əlbəttə, Moskvanın gözəl həyatını Sibir çöllərinin əziyyəti ilə müqayisə etmək olmaz. Amma gənc Yusif buna dözməlidir. Çünki atasının vəd etdiyi 7,6 milyard dollara çatmaq, həmin pullarla daha böyük işlər görmək üçün onun keçdiyi yolları təkrarlamalıdır. 



(anspress.com)