Ölkəmiz müstəqillik əldə etdikdən sonra Sumqayıt şəhərinin icra başçılarının kimlər olduğu ilə bağlı kiçik bir araşdırma apardıq. Beləliklə 1991-ci ildə indiyədək Sumqayıt şəhərinə rəhbərlik edən şəxsləri sizə təqdim edirik.

Müstəqilliyin ilk ilində Sumqayıta Eldar Vəkil oğlu İsmayılov rəhbərlik edib. Onunla daha yaxından tanış olaq:

O, 1949-cu ilin yanvar ayının 25-də Qazax rayonu Qaymaxlı kəndində anadan olub. 1971-ci ildə M.Əztizbəyov Neft Kimya institutunu bitirmiş və mühəndis və" kimyaçı " texnoloq ixtisasına yiyələnib. Sumqayıt şəhər Partiya komitəsinin 1-ci katibi, Sumqayıt şəhər Xalq Deputatları Sovetinin sədri, Sumqayıt şəhər İcra hakimiyyətinin başçısı vəzifələrində çalışıb.

1990-cı ildə Azərbaycan Respublikası Ali Sovetinin deputatı seçilib.

2002-ci ildən «Sumqayıt Superfosfat» Açıq Səhmdar Cəmiyyəti İdarə Heyətinin sədri vəzifəsində çalışır.

1999-cu və 2004-cü illərdə Sumqayıt şəhər bələdiyyəsinin üzvü seçilib.

E. İsmayılov Azərbaycan prezidenti Əbülfəz Elçibəyin 2 iyul 1992-cil tarixli sərəncamı ilə vəzifədən azad edilib. Onun yerinə isə Yusif Məmmədəli oğlu SevdimalıyevSumqayıt şəhəri İcra hakimiyyətinin başçısı təyin edilib.

Y. Məmmədəliyev 1951-ci il yanvarın1-də Gəncə quberniyasının, Qazax qəzasının, Qaraqoyunlu mahalının Çaykənd kəndində ( indiki Göygöl rayonu) anadan olub. 1973-cü ildə Azərbaycan Dövlət Universitetinin mexanika-riyaziyyat fakültəsini bitirib. Universitetdə müəllim, Azərbaycan Sənaye İnstitutunda assistant, baş müəllim, dosent işləyib. 1984-cü ildən 1992-ci ilədək kafedra müdiri olub. Fizika-riyaziyyat elmləri namizədidir.60-a yaxın elmi məqaləsi nəşr olunub.

Onun vəzifədən azad edilməsi isə Azərbaycan Respublikası Prezidentinin səlahiyyətini həyata keçirən Azərbaycan Respublikası Ali Sovetinin sədri Heydər Əliyevin dövrünə təsadüf edib. Belə ki, Heydər Əliyev Y. Sevdimalıyevi 12 sentyabr 1993-cü il tarixli sərəncamı ilə vəzifədən azad edib. Əvəzində isə Şakir Zəkəriyyə oğlu Abuşov təyin edilib.

O, 1950-ci ilin mart ayında Masallı rayonunun Qızılağac kəndində anadan olub. Azərbaycan Dövlət Universitetini və Bakı Sosial-İdarəetmə və Politologiya İnstitutunu bitirib. İlk əmək fəaliyyətinə Masallı rayonunun "Kalinin” adına sovxozunda mühasib kimi başlayıb. Hərbi xidməti başa vurduqdan sonra Sumqayıta gəlmiş, Səthi Aktiv Maddələr zavodunda aparatçı işləyib. Sonralar zavod birlik komsomol komitələrinin katibi, Sumqayıt şəhər partiya komitəsində təlimatçı, şöbə müdirinin müavini, şöbə müdiri, partiya komitəsinin katibi vəzifələrində çalışıb. 1991-ci ildən 1993-cü ilədək Sumqayıt şəhər Xalq Deputatları Sovetinin sədri olub.

Şakir Abuşov 7 ilə yaxın Sumqayıt Şəhər İcra Hakimiyyətinə rəhbərlik edib. O, vəzifəsindən 28 iyun 2000-ci ildə azad edilib.

Həmin tarixdən isə Sumqayıta Təvəkkül Yaqub oğlu Məmmədov başçıılıq edib.

O, 1940-cı ildə Naxçıvan Muxtar Respublikasının Babək rayonunun Yarımça kəndində anadan olub. Azərbaycan Neft və Kimya İnstitunu və Ali partiya məktəbini bitirib. Bakıda "Zaqfederasiya” gəmi təmiri zavodunda işləyib. Sumqayıt Polimer tikinti materaialları kombinatında növbə rəsiliyindən direktor vəzifəsinə kimi yüksəlib.1976-cı ildən 1981-ci ilədək kombinata rəhbərlikedib. 1981-ci ildə Sumqayıtşəhərİcraiyyə Komitəsinin sədrinin birinci müavini vəzifəsinə irəli çəkilib. 1982-ci ilin iyun ayında icraiyyə komitəsinin sədri seçilib. Bu vəzifədə 1988-ci ilədək çalışır. Sonra 3 saylı evtikmə kombinatının və Məişət kimyası zavodunun direktoru olub. 1995-ci ildən 2000-ci ilə kimi "Azərkimya” Dövlət Şirkətinin birinci vitse-prezidenti işləyib. Dəfələrlə Sumqayıt şəhərsovetinin və Ali Sovetin deputatı olub.

Başçı kimi onun ömrü isə cəmi 3 il çəkib. Azərbaycanın mərhum prezidenti Heydər Əliyevin 2 aprel 2003-cü il tarixli sərəncamı ilə vəzifəsindən çıxarılıb. 2003-cü ildə vəziyyət o həddə çatmışdı ki, mərhum dövlət başçısı Heydər Əliyev özünün iştirakı ilə keçirilən müşavirədə klanların rəhbərlərinin adlarını çəkərək onların əməllərindən xəbərdar olduğunu demişdi. Keçmiş prezident həmin müşavirədə qeyd edirdi ki, şəhərdə elə vəziyyət yaranıb ki, Sumqayıt bir neçə iqtisadi mənafeli qrupun təsir dairəsindədir: "Onlar faktiki olaraq bütün mühüm mövqeləri öz əllərinə keçirərək ”ciblərini doldurmaqla" məşğuldur".

Heydər Əliyev müşavirənin gedişindəcə Sumqayıtın icra başçısı Təvəkkül Məmmədovu vəzifəsindən çıxardı və onun yerinə gənclər, idman və turizm nazirinin birinci müavini olan Vaqif Əliyevi təyin etdi.

Vaqif Əliyev 1953-cü il iyul ayının 17-də anadan olub. 1975-ci ildə Azərbaycan Dövlət Universitetinin fizika fakültəsini bitirib. 1975-1982-ci illərdə Azərbaycan Milli Elmlər Akademiyası Təbii Ehtiyatların Kosmik Tədqiqatları İnstitutunda mühəndis, kiçik elmi işçi, qrup rəhbəri, baş müəllim vəzifələrində işləyib. 1982-1988-ci illərdə Azərbaycan Dövlət Universiteti komsomol komitəsinin katibi, 1988-1994-cü illərdə BDU-nun fizika fakültəsində baş müəllim vəzifəsində çalışıb. 1994-2003-cü illərdə Azərbaycan Respublikası Gənclər, İdman və Turizm nazirinin birinci müavini vəzifəsində işləyib. 2003-cü ildən 2011-ci ilə kimi Sumqayıt şəhər İcra Hakimiyyətinin başçısı vəzifəsini tutub. 18 fevral 2011-ci il Prezident İlham Əliyevin imzaladığı sərəncama əsasən Vaqif Əliyev mədəniyyət və turizm nazirinin birinci müavini təyin olunub. Fizika-riyaziyyat elmləri namizədidir.

Yeni Azərbaycan Partiyasının yaradıcılarından biri, məşhur "91"-lər müaraciətinin təşəbbüskarlarındandır. Partiya yaranan gündən - 1992-ci il 21 noyabr ayında keçirilən təsis konfransından partiyanın İdarə Heyətinin üzvüdür.

Vaqif Əliyevi isə Gəncə şəhər İcra Hakimiyyətinin başçısı Eldar Əzizov əvəzləyib. Belə ki, Eldar Əziz oğlu Əzizov Azərbaycan Respublikası Prezidentinin 18 fevral 2011-ci il tarixli Sərəncamı ilə Sumqayıt Şəhər İcra Hakimiyyətinin başçısı təyin edilib.

Əzizov Eldar Əziz oğlu 1957-ci il iyun ayının 28-də Bakı şəhərində anadan olub. 1979-cu ildə S.M.Kirov adına Azərbaycan Dövlət Universitetini fərqlənmə diplomu ilə bitirib. Həmin ildən Azərbaycan LKGİ-da metodist, təlimatçı və sektor müdiri vəzifələrində çalışıb. 1984-cü ildən Azərbaycan LKGİ 26 Bakı Komissarları rayonunun komsomol komitəsində, 1987-ci ildən Azərbaycan LKGİ Bakı şəhər komitəsində birinci katib, 1989-cu ildən Azərbaycan LKGİ Mərkəzi komitəsində, 1990-cı ildən Azərbaycan TUKGİ Mərkəzi komitəsində, 1990-cı ildən Azərbaycan TUKGİ Mərkəzi komitəsində, 1991-ci ildən Azərbaycan Gənclər İttifaqında katib, 1998-ci ildə Azərbaycan Respublikası Seçki komissiyası Katibliyinin Beynəlxalq əlaqələr İdarəsində şöbə müdiri, 1999-cu ildən Bakı şəhər İcra Hakimiyyətində Xarici əlaqələr və investisiya proqramları departamenti sədrinin birinci müavini, 2000-ci ilin mart ayından Bakı şəhər İcra Hakimiyyəti başçısının müavini, həmin ilin iyun ayından Bakı şəhər Nizami Rayon İcra Hakimiyyətinin başçısı vəzifələrində çalışıb. 2003-2011-ci illərdə Gəncə Şəhər İcra Hakimiyyətinin başçısı olub. 1990-cı ildə Azərbaycan Respublikasının Ali Sovetinə deputat seçilib, 1980-ci ildə "Şərəf nişanı” ordeni ilə təltif edilib. Azərbaycan Jurnalistlər Birliyinin üzvü, "Difai” kitabının və 200-dən artıq məqalənin müəllifidir.

2 sentyabr 2015-ci ildə Prezident İlham Əliyevin sərəncamı ilə Abşeron rayon İcra Hakimiyyətinin başçısı vəzifəsindən azad edilən Zakir Fərəc oğlu Fərəcov digər sərəncamla Sumqayıt şəhərinə icra başçısı təyin edilib. Hazırda Sumqayıt şəhər İcra hakimiyyətinin başçısıdır.

Z. Fərəcov 1954-cü ildə fevral ayının 3-də Laçın rayonunun Qazıdərə kəndində anadan olub. O, 1961-1971-ci illərdə orta ümumtəhsil məktəbində təhsil alıb.

Əmək fəaliyyətini 1971-ci ildə Sumqayıt Superfosfat zavodunda fəhlə kimi başlayıb. 1972-ci ilin noyabr ayından 1974-cü ilin noyabr ayınadək Murmansk vilayətinin Severomorsk şəhərində keçmiş Sovet Ordusunda həqiqi hərbi xitmətdə olub. Z.Fərəcov 1971-ci ilin yanvar ayında Sumqayıt şəhəri Mənzil Kommunal Təsərrufatı İstehsalat birliyində texnik kimi işə başlayıb. O daha sonra 1975-ci ildə D.Bünyadzadə adına Xalq Təsərrufatı İnstitutunun "Sənaye İqtisadiyyatı" fakültəsisin axşam şöbəsinə daxil olub, 1980-cı ildə həmin İnstitutu bitirib.

1978-ci ildə Sumqayıt şəhəri Mənzil Kommunal Təsərrufatı birliyində şöbə rəisi, 1981-ci ildə baş direktorun müavini, 1988-ci ildə Mənzil Kommunal İstehsalat birliyinə baş direktor təyin olunub.

Z.Fərəcov1999-cu ildə keçirilən bələdiyyə seçkilərində iştirak edib və Sumqayıt şəhər bələdiyyəsinin sədri seçilib.

Prezident İlham Əliyevin sərəncamı ilə o 2005-2015-ci illərdə isə Abşeron Rayon İcra Hakimiyyətinin başçısı vəzifəsində çalışıb.

Azərbaycan Respublikası Prezidentinin 26 dekabr 2012-ci il tarixli 2625 saylı Sərəncamına əsasən "Şöhrət" ordeni ilə təltif olunub.

Ramil Zeynallı

Xeberle.com