Sumqayıtda açıq havada nəfəs almaq yenidən çətinləşib. Belə ki, hazırda havada kəskin tüstü-yanıq qoxusu var. Bu gecə və dünənki gecə şəhərin çıxışında yerləşən, Sumqayıt, həmçinin Xırdalan şəhərinin bütün məişət tullantılarının atıldığı poliqonda zibillərin yandırılması (yaxud fərz edək ki, öz-özünə alışması) nəticəsində yenidən atmosferdə ekologiya, xüsusən insan orqanizmi üçün çox zərərli olan qazlar yaranıb. Bu kəsif, gözyaşardan qoxu artıq xeyli müddətdir ki, sumqayıtlıları ciddi şəkildə narahat etməkdədir.

Xatırlayırsınızsa, təxminən bir ay əvvəl Sumqayıtın bir qrup jurnalistinin araşdırması, onların operativ, çevik tərpənməsi sayəsində – ölkə mediasında, bir çox xəbər portallarında və bəzi telekanallarımızda verilən materiallar nəticəsində Sumqayıtın çıxışında yerləşən və şəhərin bütün məişət tullantılarının atıldığı poliqonda zibillərin yandırılması ilə bağlı həyəcan təbili çalındı və problem böyük dərəcədə qabardıldı (həmin yazının linki - [url=http://xeberle.com/az/view/8214/sumqayt-sakinleri-zeherli-tst-ile-boulmaqdadr-videoreportaj/]http://xeberle.com/az/view/8214/sumqayt-sakinleri-zeherli-tst-ile-boulmaqdadr-videoreportaj/[/url]?). Həmin videogörüntülər şəhərdə ekoloji cəhətdən ciddi problemlərin olduğunu sübut etdi. Hətta bir neçə şəhər ziyalısı da bu istiqamətdə məqalələrlə çıxış edərək sözügedən durumu ciddi şəkildə tənqid etdilər, bu məsələyə cavabdeh şəxslərin məsuliyyətli olmalarını tələb etdilər. Əlqərəz, bu problemin artıq bir neçə dəfə qaldırılmasına baxmayaraq ekoloji gərginlik Sumqayıtda yenə - hazırda da davam edir.
Qeyd edək ki, bu ərazi kimyəvi cəhətdən çirklənmiş, zəhərlənmiş bir məkandır. Belə ki, vaxtilə Kimya zavodlarının bütün zərərli tullantıları - zəhərli maddələr burada basdırılıb. Təsəvvür edin, torpağın altı zəhərli kimyəvi maddələr, üst hissədən də zibil yandırılır (fərz edək ki, öz-özünə yanır), bu zaman yanıqla kimyəvi maddələr reaksiyaya girir, atmosferə qara tüstü qarışıq zəhərli maddələr hasil olur. Ən dəhşətlisi budur ki, bütün tüstü gəlib dolur şəhərə. Elə olur ki, xüsusən nisbətən küləkli havalarda, Sumqayıtda bayırda nəfəs almaq belə çətinləşir.
Bildiyimiz kimi, həmin ərazi – yəni Sumqayıtın mərkəzindən təxminən 3-4 km aralı yerləşən məişət tullantıları poliqonu Sumqayıt Şəhər Təmizlik Departamentinin balansındadır və bu da o deməkdir ki, əraziyə cavabdehliyi də bu departamentin rəisi Rahim Mustafayev daşıyır. Məmur özü də bu barədə 1 ay öncəki açıqlamasında böyük ekoloji problemin olduğunu etiraf etmiş, Sumqayıtda məişət tullantılarının təmizlənməsi üçün xüsusi profilli zavodun tikilməsinin zərurətindən danışmışdı. Əlavə etmişdi ki, zibili onlar özləri yandırmır, ya kimsə başqası, ya da öz-özünə alışır... Bəs zavodun tikilməsinə qədər sakinlər necə nəfəs almalıdırlar? Bəlkə heç zavod da tikilməyəcək? Belə çıxır ki, ona qədər Sumqayıtda hər bir ailə əleyhqazla gəzməlidir?

Bu məqamda departament rəhbərinə bəzi konkret suallarımız yaranır:

-Nə üçün, zibil həmişə rütubətin artdığı, yanmanın çətinləşdiyi gecə saatlarında öz-özünə alışıb yanmağa başlayır? Yəni günorta, gün işığında yanmır?

-Nə üçün bu əraziyə nəzarət olunmur, növbətçilik sistemi fəaliyyət göstərmir?

-Yanğın başlayanda bunu necə bilir və onun qarşısını necəsə alırlarmı?

Bizə görə bu sualların cavabı yoxdur. Hər halda bizə veriləcək cavabları. Misal üçün, artıq bildiyiniz kimi, 1 ay öncə bir qrup jurnalist şəhərin mərkəzində "qazovka” qoxusunu hiss edərək məişət poliqonunda zibilin yandırılmasını aşkarlayanda bəndəniz və digər həmkarlarım təxminən saat yarım müddətdə prosesin canlı şahidləri kimi Təmizlik departamentinin rəisi Rahim Mustafayevlə hadisə yerində deyil, şəhərin mərkəzində görüşdük. Yeri gəlmişkən, bir daha təşəkkür edirik ki, bizi qırmayıb bizimlə görüşə gəldi. Amma bizə görə, o, öncə və daha yaxşı olardı ki, ərazidə olaydı.

O gündən bu yana məsələnin həllində cəmi 1 aylıq dönüş yaradıldı, buna da dönüş demək mümkünsə, bu, "dönüş”dən daha çox "donmuş” oldu, yəni məsələni "yatırtmaq” üçün problemi müvəqqəti dondurdular.
Bəli, o jurnalist araşdırması problemə məsul şəxslərdən ciddi şəkildə ölçü götürülməsi üçün yetərli olmadı. Amma...
Amma hardasa xoş oldu ki, 2 gün öncə ötən ilin yekunları ilə bağlı şəhər konfransında şəhərin icra başçısı Eldar Əzizov bu məsələni qabardaraq Rahim Mustafayevdən hesabat sordu, onu ciddi şəkildə tənbeh etdi.
Üstündən 2 gün keçməsinə baxmayaraq rəis yenə öz bildiyini edir.
Beləsinə nə ad verəsən?! Lap "Yol əhvalatı” filmini xatırladıq...

Elnur Ağayev
Xeberle.com

P.S. Bu "qazovkalı" havanı udmağmızın baiskarlarına yaxşı bir biznes təklifimiz var: Keçin qatıq və əleyhqaz biznesinə, onsuz hazırda sumqayıtlıların bu şeylərə daha çox ehtiyacı var, işiniz "xod" gedər, cibiniz də dolar.
P.S. Şəhərin girəcəyində beşulduzlu otel tikilir, təklif edirik ki, otelin qonaqlarının bu qoxunu hiss etməmələri üçün birdəfəlik pəncərələrə qıfıl vurulsun.