Ümumxalq sevgisi qazanamaq şərəfli olduğu qədər də məsuliyyətlidir. Bu missiyanı uzun illər idi ki, "Neftçi” daşıyırdı. Yaxşı-pis, bu, məsələnin ikinci tərəfidir. Ancaq fakt odur ki, bu səbəbdən "xalq komandası” ilə bağlı istənilən olay geniş əks-sədaya səbəb olur. Elə indinin özündə də demək olar ki, Azərbaycanın bütün futbol ictimaiyyəti "Neftçi”dən danışır. Həmin "Neftçi”dən ki, bir müddət əvvəl ölkə səviyyəsində əzəmətli, fərqli oyun üslubu ilə seçilən qarşısıalınmaz komanda hesab olunurdu. Amma indi bu epitetləri "Neftçi”yə yaraşdırmaq olmur. İş o yerə çatıb ki, ən nikbin azarkeş belə flaqmanın hansısa çempionat matçından üç xalla ayrılacağına inanmır. Odur ki, "ağ-qaralar” 80 illik yubileyini premyer liqanın 8-ci pilləsinin sahibi kimi qeyd etsə, heç kim təəccüblənməz. Bəs görəəsən, komandanın bu durumda olmasına səbəb nədir?

Görünən kəndə bələdçi lazımdır?

"Neftçi”də problemlərin olması ötən mövsümdən bəlli idi. Komandanın heyətinin çempionluq üçün yarışacaq səviyyədə olmaması ilə yanaşı, maliyyə problemlərinin yaşanması paytaxt klubundan çempionluq gözləyənlərin sayını xeyli azaltmışdı. Təsadüfi deyil ki, komandanın qarşısına qoyulan vəzifə də avrokuboklara vəsiqə qazanmaqla məhdudlaşırdı. Buna baxmayaraq "Neftçi” ötən mövsüm ölkə kubokunu qazanmağa xeyli yaxınlaşmışdı. Həlledici qarşılaşmada "Qarabağ”a yenilən "ağ-qaralar” mövsümü dördüncü pillədə tamamladı. "Futbol ili” bitən kimi isə "Neftçi”də islahatlar başladı. Öncə hələ çempionatın bitməsinə iki ay qalmış komandadan getmək istəyən, amma istefası qəbul olunmayan baş məşqçi Arif Əsədov istefaya göndərildi. Ardınca isə flaqmanın bir sıra aparıcı oyunçuları ilə yollar ayrıldı və bununla da, "Neftçi” iddiasız kluba çevrildi.

Müşahidə Şurası "Neftçi”yə nə verdi?

Ötən mövsümün sonlarına doğru "ağ-qaralar”da klubun idarəetmə strukturu dəyişdirildi. Mart ayında prezident postu ləğv edildi və komandanı Müşahidə Şurası idarə etməyə başladı. Amma necə? Əslində, paytaxt klubunun bu qədər dağıdıcı islahatlara məruz qalmasına ehtiyac yox idi. Adında "neft” sözü olan bu komandanın ətrafında yaxşı pullar dövr edir və indi Şura üzvlərini "Neftçi”nin uğur qazanmasından daha çox öz qazancları maraqlandırır. Komandada Vəli Qasımov, Əsgər Abdullayev və Səməd Qurbanov kimi futbol adamları çalışsa da, uğursuzluqdan çıxış yolu tapılmır. Başqa sözlə, "Neftçi” neft qədər qara gündədir.

Kimdir günahkar?

Son vaxtlar "Neftçi”nin mətbəxindən gələn həyəcanlı xəbərlər bir-birini əvəz edir. Yadınızdadırsa, premyer liqanın son turunun ardından "ağ-qaralar”ın hücumçusu Ruslan Qurbanov "Bəzi futbolçularımız var ki, onlar tam gücləri ilə oynamırdılar. İki dəqiqəyə 2, beş dəqiqəyə isə 3 qol buraxmaq olmaz. Bunu əminliklə deyə bilərəm” açıqlaması ilə gündəmə gəlmişdi. Göründüyü kimi, "Neftçi”nin əsas oyunçularından biri komanda daxilində hansısa proseslərin getdiyini gizlətmir. "Neftçi”də məlum dəyişikliklərdən sonra eniş yaşanacağı nə qədər gözlənilən olsa da, komandanın 12 oyundan 13 xal toplaması komandada pərdəarxası oyunların ola biləcəyini düşünməyə əsas verir.

Gəncləşdirmə yalanı

Xatırlayırsınızsa, Avroliqada "Mladost”la oyundan öncə "Neftçi”nin gənc baş məşqçisi Samir Əliyev komandanın gənc oyunçulardan qurulduğunu və dolayısıyla "məğlub olacağıqsa, günahı məndə və yetirmələrimdə görməyin” tipli açıqlama vermişdi. Komandanın heyəti zəif olduğundan nə Avropa Liqasında, nə də çempionatdakı uğursuzluqlara görə Samir Əliyevi qınaya bilmərik. Ancaq heyətində Peskoviç Miçal, Andreu Alvarado Xuan Alberto, Erik Ramos, Əziz Quliyev və s. kimi gənc sayılmayan oyunçuların olması da gəncləşdirmə siyasətini sual altına qoyur.

Tural Məmmədov
Xeberle.com