Xorvatiya müstəqillik qazandıqdan sonra futbol dünyasına ilk dəfə 1998-ci ildə səs saldı. Həmin vaxt Fransada keçirilən dünya çempionatında bürünc medalları qazanan balkanlıların bu uğuru yetərincə gözlənilməz olmuşdu. Xorvatlar sonrakı mundiallarda imkanlarından aşağı çıxış etsə də, qitə birinciliklərində artıq sayılıb-seçilən rəqiblər sırasına daxil ola bilmişdi. Düzdü, komandanın qitə araenasında ciddi uğuru olmasa da, sərgilənən oyun alqışlanasıdır. Məsələn, "damalılar”ın AVRO-2008-in 1/4 final mərhələsində Türkiyə milli komandasına dramatik keçən oyunsonrası penalti seriyasında hansı formada uduzduğunu xatırlatmaq kifayət edər. Təsadüfi deyil ki, əksər mütəxəssislər və neytral azarkeşlər həmin görüşdə Slaven Biliçin komandasının bəxtinin gətirmədiyini söyləmişdilər.

Modriç və Rakitiç komandasını arxasınca apara biləəcək?

Hələlik turnirdəki ən böyük uğuru məhz 1/4 finala qədər irəlləmək olan Xorvatiya yığması 5-ci dəfə yüksəldiyi Avropa çempionatının final mərhələsində uğur qazanmaq istəyir. Ən azı ona görə ki, indiki komandanın parlaq futbolçu nəsli Fransada möcüzə etməyə imkan verir. Hər halda, heç də qitə birinciliyinə vəsiqə qazanan bütün komandalar Dario Srna, Vedran Çorluka, Mario Manzukiç, Luka Modriç, İvan Rakitiç kimi səviyyəli oyunçulara sahib deyil. Adını sadaladıqlarımızdan xüsusən son iki futbolçuya Avropanın az qala bütün yığmaları həsəd apara bilər. Şübhəsiz, bu cütlüyün Fransada sərgiləyəcəyi oyun "şahmatçılar”ın qazanacağı nəticəyə birbaşa təsir edəcək.

Əsas üstünlük oyun intizamıdır

Ante Çaçiçin çalışdırdığı komandanın ən böyük üstünlüyü oyun intizamıdır. Təadüfi deyil ki, Miroslav Blajeviçin baş məşqçiliyi altında İngiltərədə 1/4 finala qədər irəliləyəndə də, 1998-ci ildəki dünya çempionatında bürünc medal qazananda da, AVRO-2008-də ən güclü 8 komanda arasına çıxanda da məhz bu amil xorvatiyalıları uğura daşımışdı. Maraqlıdır ki, "damalılar”ın taktiki sxemində də sabitlik müşahidə olunur. Belə ki, həm seçmə mərhələnin gedişində komandaya rəhbərlik edən Niko Kovaç, həm də sonradan onu əvəzləyən Ante Çaçiç seçmə mərhələdə 4-2-3-1 və 4-1-4-1-ə üstünlük verirdi.

Xorvatiya əvvəlki Avropa çempionatlarında:

1960 – Yuqoslaviyanın tərkibində olub

1964 – Yuqoslaviyanın tərkibində olub

1968 – Yuqoslaviyanın tərkibində olub

1972 – Yuqoslaviyanın tərkibində olub

1976 – Yuqoslaviyanın tərkibində olub

1980 – Yuqoslaviyanın tərkibində olub

1984 – Yuqoslaviyanın tərkibində olub

1988 – Yuqoslaviyanın tərkibində olub

1992 – Yuqoslaviyanın tərkibində olub

1996 – 1/4 final

2000 – Final mərhələsinə yüksələ bilməyib

2004 – Qrup mərhələsi

2008 – 1/4 final

2012 – Qrup mərhələsi

Avropa çempionatına hansı "23-lük” gedir?

Dünən axşam saatlarında Xorvatiya milli komandasının AVRO-2016-da hansı futbolçularla mübarizə aparacağı dəqiqləşdi. İlkin heyətdə 27 oyunçunun adını açıqlayan baş məşqçi Ante Çaçiç sonda AÇ-yə aşağıdakı futbolçularla yollanmağa qərar verdi:

Qapıçılar: Daniyel Subaşiç, Lovre Kaliniç, İvan Vargic

Müdafiəçilər: Daryo Srna, Vedran Çorluka, Domoqoy Vida, İvan Stirniç, Qordon Şildenfild, Şime Vrsaliko, Ten Yedvay

Yarımmüdafiəçilər: Luka Modriç, İvan Rakitiç, İvan Perisiç, Mateo Kovaçiç, Milan Badelj, Marselo Brozoviç, Marko Rog, Ante Coriç

Hücumçular: Mario Mancukiç, Nikola Kaliniç, Andrey Kramariç, Marko Pyaça, Duye Çop

AÇ iştirakçısı bizə qarşı: Kovaçın kreslosu Bakıda "laxladı”

Bildiyiniz kimi, Xorvatiya milli komandasının Fransaya gedən yolu Bakıdan keçirdi. Seçmə mərhələdə Azərbaycanla eyni qrupda yer alan "damalılar” Osiyekdə millimizin qapısından 6 cavabsız top keçirmişdi. Bu oyun həm də matçdan bir neçə gün sonra istefa verən millimizin alman çalışdırıcısı Berti Foqtsun yığmamızın baş məşqçisi kimi son oyunu olmuşdu. Xorvatiya ilə oyundan sonra vəzifəsindən ayrılan Foqtsun postunu isə Xorvatiya futbolunun əfsanəsi Robert Prosineçki tutdu. Ümumiyyətlə, Foqts üçün xorvatiyalıları qeyri-münasib rəqib saymaq olar. Belə ki, DÇ-1998-də onun Almaniya millisindən də qovulması Xorvatiya ilə matça (0:3) təsadüf etmişdi. Məşqçi istefadan danışarkən, qeyd edək ki, Xorvatiya ilə AVRO-2016-nın seçmə mərhələsinin Bakıda baş tutan oyununda xal itirən (0:0) balkanlılar sonradan komandanın baş məşqçisi Niko Kovaçı Ante Çaçiçlə əvəzləmişdi. Düzdür, bu dəyişiklik Norveç millisi ilə oyundakı məğlubiyyətdən sonra rəsmiləşmişdi, ancaq Kovaçın kreslosunun Bakıda laxladığını demək olar.

AVRO-2016-da oyunları:

12 iyun. 17:00. Türkiyə - Xorvatiya

17 iyun. 20:00. Çexiya - Xorvatiya

21 iyun. 23:00. Xorvatiya – İspaniya

Tural Məmmədov