Bildiyimiz kimi, "Qarabağ” klubu tarixi nailiyyət əldə edərək Çempionlar Liqasının qrup mərhələsinə vəsiqə qazandı. İndi Ağdam klubu Avropanın ən güclüləri – "Çelsi”, "Atletiko”, və "Roma” ilə mübarizə aparacaq. Bəs görəsən Azərbaycanda bir ilkə imza atan bu klubun memarı kimdir? Gəlin onu , baş məşqçi Qurban Qurbanovu daha yaxından tanıyaq.

 

 

Qurban Osman oğlu Qurbanov 13 aprel 1972-ci ildə Zaqatala rayonunun Aşağı Tala kəndində anadan olub. Birinci sinfi Zaqatalanın Aşağı Tala 5 saylı səkkiz illik məktəbində oxuduqdan sonra, təhsil 8 illik olduğuna görə son iki sinfi 3 saylı orta məktəbdə davam etdirib. 7-ci sinifdən sonra futbola həvəsi yaranan Qurban, məktəbin futbol komandasında yer alıb. 10-cu sinifdə oxuyarkən Zaqatalanın "Daşqın" komandasında futbolun sirlərinə yiyələnib. 1990-1991-ci illərdə həmin komandada 54 oyun keçirib və 24 qol vurub. 1991-1992-ci illərdə Gürcüstanın "Alazani" klubunda çıxış edən Qurbanov bu klubda 17 oyuna 4 qol vurub. 1992-1993-cü illərdə yenidən "Daşqın" klubuna qayıdıb və 39 oyuna 24 dəfə fərqlənib. 1992-2005-ci illər ərzində Azərbaycan milli futbol komandasının heyətində 67 oyun keçirərək 14 qol vurub. 1993-cü ildə Tovuzun "Turan" klubuna transfer olunub. 1993-1994 mövsümündə "Turan”da 29 oyunda meydana çıxıb və 9 qol vurub. Həmin mövsüm Qurban Qurbanov Tovuz komandasının heyətində Azərbaycan çempionu olub. Bu, onun futbolçu karyerasındakı ilk tituludur. Ümumilikdə, 1993-1995-ci illərdə "Turan"da 39 oyun keçirərək 12 dəfə fərqlənib. 1995-1996-cı illərdə Mingəçevirin "Kür-Nur" klubunda çıxış edərək 12 oyuna 4 qol vurub. 1996-cı ildə "Neftçi" klubuna transfer olunandan sonra, 1996-1997-ci illər ərzində "Neftçi"nin heyətində 34 qol vuraraq Azərbaycan çempionatının bombardiri olub. 1996-1997 mövsümündə 29 oyun keçirib. Ümumilikdə, "Neftçi" klubunda 1996-1998-ci illərdə 43 oyun keçirib və onun 43-də meydanı qolsuz tərk etməyib. 1998-ci ildə Rusiyanın "Dinamo" Stavropol klubunda çıxış edib. 39 oyunda meydana çıxıb və 17 qol vurub. 1999-cu ildə Rusiyanın "Fakel" Voronej və "Baltika" Kalininqrad klublarında çıxış edib. "Fakel" klubunda 12 oyuna 8 dəfə, "Baltika" klubunda isə 14 oyuna 1 dəfə fərqlənib. 2001-ci ildə Qurbanov yenidən "Neftçi" klubuna transfer olunub. 2001/2002-ci illər UEFA Kuboku mövsümündə Neftçinin heyətində çıxış edib. 2002-ci ildə yenidən "Fakel" Voronej klubunda çıxış edib, 28 oyunda 7 qol vurub. 2003-cü ildə digər Rusiya klubuna, "Volqar" Həştərxana keçib. Bu klubda 21 oyun keçirsə belə qol vurmayıb. 2003-cü ildə yenidən "Neftçi" klubuna qayıdıb. 2003-2004 mövsümündə ''Neftçi''nin heyətində 4 oyun keçirib və bir o qədər də fərqlənib. 2004-2005 mövsümündə isə 23 oyuna 10 qol vurub. 2005-ci ildə "Neftçi" kollektivindən ayrılaraq "İnter" klubuna keçib. Qurban Qurbanov futbolçu karyerasını 2005-ci ilin payızında - 33 yaşında bitirib. Bakının "İnter" klubunun idman direktoru vəzifəsində çalışıb. 2006-2008-ci illərdə "Neftçi" klubunda baş məşqçi və idman direktoru vəzifələrində çalışıb. 2008-ci ildə "Qarabağ" Ağdam klubu ilə bir illik müqavilə bağlayıb. O, baş məşqçi vəzifəsində türkiyəli Rasim Karanı əvəz edib. 2008-ci ilin sonunda Qarabağ rəhbərliyi Qurbanovla 3 illik müqavilə bağlamaq qərarına gəlib. Onun rəhbərliyi altında Ağdam komandası 2009-cu ildə finalda "İnter" (Bakı) klubunu 1:0 hesabı ilə məğlub etməklə tarixində üçüncü dəfə ölkə kubokunun qalibi olub. Bununla da Qurban Qurbanov Azərbaycan kubokunu həm futbolçu, həm də məşqçi kimi qazanan ilk şəxs olub. 2009-2010 mövsümündə "Qarabağ" Qurbanovun rəhbərliyi altında UEFA Avropa Liqasında pley-off mərhələsinə qədər irəliləyib. 2013-2014-cü il mövsümündə Qurban Qurbanov məşqçilik karyerasında "Qarabağ" komandası ilə ilk dəfə Azərbaycan çempionu titulunu qazanıb. 2014/2015 mövsümündə UEFA Çempionlar Liqasında mübarizə aparan "Qarabağ" III təsnifat mərhələsində Avstriyanın "Zalsburq" komandasına məğlub olaraq mübarizəni UEFA Avropa Liqasının pley-off mərhələsində davam etdirməli olub. Bu mərhələdə Qurbanovun komandasının rəqibi 2009-cu ildə "Qarabağ"ı mübarizədən kənarlaşdıran Hollandiyanın "Tvente" klubu olub. Ev oyununda 0-0 nəticə əldə edən "Qarabağ" səfərdə 1-1 hesablı nəticə əldə edərək ilk dəfə Avropa Liqasının qrup mərhələsinə vəsiqə qazanıb. Ümumiyyətlə ''Qarabağ'' kollektivi 3 dəfə Avroliqanın qrup mərhələsində iştirak edib. Q.Qurbanov "Qarabağ" futbol klubu ilə ən çox oyun keçirən və ən çox qələbə qazanan baş məşqçidir. O, cari ildə, Azərbaycan Premyer Liqasının çempion titulunu 6-cı dəfə qazanıb. Qeyd edək ki, "Qarabağ" futbol klubu Qurban Qurbanovun rəhbərliyi altında ilk dəfə UEFA Çempionlar Liqasının qrup mərhələsinə vəsiqə qazanması ölkədə böyük ajiotaj doğurdu. Hətta ölkə prezidenti İlham Əliyev kollektivi qəbul edərək öz təbriklərini çatdırdı və komandaya 2 milyon manat həcmində vəsait ayıraraq uğurlar arzuladı. Mütəxəsislər də hesab edir ki, Ağdam klubun bu nailiyyəti futbolumuzun tarixi qələbəsi, ölkə futbolunun klublar səviyyəsində yeni inkişaf mərhələsidir.

 

Xeberle.com