Son günlər bu sualla tez-tez üzləşirəm - "Qarabağ” səfərdə "Sent-Etyen”ə uduzsa, yaxud heç-heçə etsə, qrupdan çıxmaq şansları qalırmı?
Uduzsa, cavabı konkret deyim – şansı qalmır!

Fransadakı məğlubiyyətdən sonra "Qarabağ” son turda "İnter”ə qalib gəlsə də, xeyri olmayacaq. "Dnepr” "İnter”ə uduzub "Sent-Etyen”i üstələsə, 3 komanda qrupu 7 xalla bitirir. Belədə Avroliqanın reqlamentinə əsasən 3 komandanın öz aralarındakı oyunlarında toplanılan xallara baxılır. Bütün 7 xalı "Qarabağ” və "Sent-Etyen”dən alan "Dnepr” vəsiqəni götürür. Bu vəziyyətdə "Qarabağ” və Fransa komandası 7 xalla qrupda qalır.

Amma maraqlıdır ki, "İnter” və "Sent-Etyen”lə (qollu) heç-heçə 6 xalla "Qarabağ”ı növbəti mərhələyə çıxara bilər. Bunun üçün "Dnepr” "İnter”ə uduzub "Sent-Etyen”lə heç-heçə etməlidir.

Daha bir variant. Qrupdakı növbəti oyunların hamısı sülhlə yekunlaşır və 3 komandanın 6 xalı olur. Onda nə baş verir? Fransa komandası üçün "İnter”lə oyunun nəticələri "silinir” və xalı 4-ə enən "Sent-Etyen” sıradan çıxır. "Qarabağ” və "Dnepr”in 5 xalı olur. 2-ci kriteriya - öz aralarındakı top fərqidir ki, bu da eynidir. Belədə reqlamentin 7.05 C bəndinə görə, 3 komandanın oyunlarında daha çox qol vuran komandaya üstünlük verilir. Yalnız bundan sonra səfərdə vurulan qol amili önə çıxır. Təəssüf ki, burda "Dnepr” səfərdə "Qarabağ”a 2 qol vurduğu üçün növbəti mərhələyə keçir.

Növbəti variant. "Qarabağ” "Sent-Etyeni udub "İnter”ə uduzsa, "Dnepr” "İnter”ə uduzub "Sent-Etyen”i udsa, yenə "Qarabağ” və Ukrayna komandasının xalları 7 olur. Səfər qolu amili "Dnepr”i pley-off-a keçirir.

Daha bir – lakin inandırıcı görünməyən variant. "Qarabağ” "Sent-Etyen”i udub "İnter”ə uduzur. "Dnepr” "İnter”i səfərdə udub öz meydanında "Sent-Etyen”ə uduzur. Yenə 3 komandanın 7 xalı olur. Belədə bütün 7 xalını "Dnepr” və "Sent-Etyen”dən alan Azərbaycan komandası 1/16 finala çıxır.

Bir sözlə, qrupda çox qarışıq vəziyyət yaranıb. İndi bir nömrəli vəzifəmiz Fransada uduzmamaqdır. Uduzmayaq!!!

Tural Dadaşov
Xeberle.com

P.S. Əsas variantı isə az qala tamamilə yaddan çıxardım: "Qarabağ” hər iki oyunu udur və rahatlıqla 116 finala çıxır!