Ölkəmizin turizm imkanları geniş olsa da, bu imkanlardan kifayət qədər istifadə edilmir. Necə deyərlər, tətillərdə ölkəmizin turizm sektoru milyonlarla manat vəsait itirir. Buna səbəb kimi bir sıra amillər göstərilir. Turizm üzrə mütəxəssis Əlixan Mürvətov deyir ki, Azərbaycanın turizm imkanları genişdir və bu imkanlardan yararlanmaq istəyən turistlər də çoxdur. Amma turizm imkanlarının artmasına mane olan səbəblər var: "Bizdə qiymətlər yüksəkdir. Cənubi Qafqaz ölkələrində ən yüksək qiymət Azərbaycandadır. Xidmət səviyyəsinə gəldikdə isə normal olaraq qiymətləndirmək olar. Artıq lisenziyalı ekskursiya bələdçilərimiz var. Bir məsələni də qeyd edim ki, Cənubi Qafqazda turistlərin nəqliyyat xidməti ilə təmin edilməsində ən yüksək xidmət məhz Azərbaycandadır. Bizdə turistlər yüksək komfortlu avtobuslarla təmin edilirlər. Ən çox tarixi abidələr də Azərbaycandadır.”

 

O, Azərbaycanda qiymətlərin bahalığına təsir göstərən halları da vurğuladı: "Ərzaq mallarının qiyməti və xidmət sahələrində qiymətlər çox yüksəkdir. Əgər xidmətin səviyyəsi də artsa, bu, qiymətlərin daha da artmasına müəyyən dərəcədə təsirini göstərəcək.”  Ekspert qeyd edir ki, hökumət ölkəyə turistlərin daha çox cəlb edilməsi üçün az ulduzlu otellərin tikintisinə diqqət ayırmalıdır: "Üç ulduzlu və bundan aşağı səviyyəli otellər tikilməlidir. Yəni orta səviyyəli turistlərin istirahəti üçün şərait yaradılmalıdır. Orta xidmətlər təklif edən otellərin sayı artmalıdır.”

 

İqtisadçı Vüqar Bayramov isə Azərbaycanda daxili turizm imkanlarının məhdud olduğu qənaətindədir. Digər tərəfdən hesab edir ki, daxili turizmdə qiymətlər reallıqdan çox uzaqdır: "Çox təəssüf ki, xarici və daxili turizm arasında rəqabətin yaranmasına baxmayaraq, bu, hələ də daxili turizmdə qiymətlərin tənzimlənməsinə gətirib çıxarmayıb.” Vüqar Bayramov vurğuladı ki, qiymətlərin bahalığı və daha keyfiyyətli xidmətin təşkil edilməməsi daxili turizmdə əsas çatışmazlıqlardan biridir. Ekspert qeyd etdi ki, Türkiyə yaxın qonşumuz kimi Azərbaycanın turizmdə əsas rəqiblərindən biridir. "Biz Türkiyəyə rəqib olmasaq belə, Türkiyə bizə rəqibdir. Çünki yerli əhali, eləcə də xaricdən Türkiyəyə dincəlməyə gedən turistlər çoxdur. Turizm imkanları baxımından Türkiyənin imkanlarının geniş olması, qiymətlərin ucuzluğu xarici turistlərin Azərbaycana deyil, qonşu ölkəyə getməsinə rəvac verir. Belə ki, əslində rəqabət nəticəsində keyfiyyətin yüksəlməsi baş verməlidir. Təəssüflər olsun ki, bu rəqabət hələ də daxili turizmin qiymət və keyfiyyət baxımından təkmilləşməsinə səbəb olmayıb.”

 

İqtisadçının sözlərinə görə, turizmin inkişafı yalnız iş adamlarının münasibətindən asılı deyil, bu sahəyə dövlət dəstəyi də olmalıdır:"Türkiyə və Avropa ölkələrinin təcrübəsi göstərir ki, dövlət dəstəyi olmadan bu prosesi həyata keçirmək və turizm sektorunda keyfiyyətin yüksəldilməsi, qiymətin ucuzlaşdırılması mümkün deyil. Turizm sektoru güzəştlər tətbiq olunan sektorlardan biri olmalıdır. Nəinki, Türkiyə və Gürcüstanda, hətta Mərkəzi və Şərqi Avropa ölkələrində turizm obyektlərinə əlavə dəyər vergisindən müəyyən güzəştlər tətbiq olunur. Bu baxımdan Azərbaycanda da oxşar praktika tətbiq edilməlidir.”     (analitik.az)