Ənənəvi - Tanınmış sumqayıtlılar rubrikamızın növbəti qonağını siz əsasən “Space” telekanalında yayımlanan “Dublbom” verilişindən tanıyırsınız. Onsuz da yumoristik üslubda olan televiziya proqramına bu müsbət enerjili aktyor bir az da xüsusi ahəng qatırdı. Beləliklə, müsahibimiz gənc və istedadlı aktyor Toğrul Rzadır.

- Daha cox aparıcı kimi sevildiniz, yoxsa aktyor kimi?

- Tamaşaçılar məni verilişdən əvvəl daha çox reklam çarxlarından və Eyyub Yaqubovun "Yenə o bağ olaydı" klipindən sonra tanımağa başladılar. Bu klip 2007-ci ildə ekranlara çıxmağına baxmayaraq, bu gün də sevilir. Bəzən haradasa tanımadığım bir adam məni görəndə, bu klipdəki rolumu ağız dolusu tərif edəndə o qədər mənə xoş gəlir ki, neçə gün özümü aktyor kimi hiss edirəm. Və bu, məni daha çox sevindirir. Söz yox ki, mənim teatrda, bir çox teleserial və filmlərdə də rollarım olub, amma tamaşaçılar daha çox klipləri, reklamları gördüyünə görə məni onlarla tanıyır. Və bir də əlbəttə ki,  “Dublbom”la. Amma mən heç vaxt veriliş aparmaq arzusunda olmamışam.  Mən istəyirəm ki, rollarımla tamaşaçıların yadında qalım.

- Biri var verilişi tamaşaçı aparıcısıyla tanıyır, onunla sevir, biri də var artıq tamaşaçı tərəfindən tanınan verilişə yeni aparıcının gəlməsi, yeni nəfəs verilməsi. Bir vaxtlar “Space” telekanalında "Dublbom" verlişini aparırdınız. Verilişin sonrakı aparıcısı özündən əvvəlki aparıcının qazandırdığı tamaşaçılarını itirdi, yoxsa yenilərini qazandırdı?

- Əvvəla, qeyd edim ki, uzun sürən fasilədən sonra "Dublbom" verilişi yenidən efirə qayıdıb. Ola bilsin ki, bəzi tamaşaçıların bundan xəbəri yoxdur. Fürsətdən istifadə edib demək istəyirəm ki, artıq hər həftənin bazar günü saat 21:15-də tamaşaçılar buyurub baxa bilərlər. O ki qaldı əvvəlki, ya indiki aparıcıya tamaşaçıların münasibəti, sizə deyim ki, əvvəlki aparıcının vaxtında necə idisə, elə indiki aparıcının vaxtında da elədir. Çünki veriliş özü tamaşaçının xoşuna gəlir.  Məncə, bu verilişin mən yox, başqa bir aparıcısı olsa da, bundan verilişə bir o qədər ziyan dəyməz.

- Yenidən sizi hər hansı bir layihədə aparıcı kimi görəcəyikmi?

- Yəqin ki, yox. Yenə də deyirəm, mənim peşəm aktyordur  və mən teatrda, kinolarda özümü daha rahat hiss edirəm və bu işdən zövq alıram.

- Həm də teatrda fəaliyyət göstərirsiniz. Yaxşı, bəs kino, yoxsa teatr? Hansı sahədə özünüzü tam görürsünüz?

- Mənim üçün heç bir fərqi yoxdur. Teatr, ya kino. Təki  maraqlı ssenari olsun. Elə ssenari olsun ki, mövzusu aktual olsun, ordakı obrazlar arasında güclü konfliktlər olsun. Bir də ki, əlbəttə, gərək peşəkar bir rejissor olsun. Məncə, hər bir aktyor belə düşünür.

- Sizdən ilk dəfə müsahibə alanda söyləmişdiniz ki, mən qardaşıma paxıllıq edib bu sənətə gəlmişəm. Belə çıxır ki, bugünkü nailiyyətlərinizə görə qardaşınıza olan paxıllığınıza borclusunuz?

- Əgər bütün etdiklərimi nailiyyət sayırsınızsa, bəli.

- Qardaşınız Elxan Rza da tanınmış aktyordur. Ailədə daha çox kimin tanınmış olacağına inanırdılar?

 - Ailəmizdə hamımız Elxanın daha çox tanınacağına inanmışıq, çünki Elxanın aktyor kimi imkanları genişdir, səsi, görünüşü... Həm də axı o məndən əvvəl aktyor olub. Mən isə onun uğurlarını görəndən sonra həvəslənib bu sənətə gəlmişəm.

- Hər ikiniz təbiətcə çılğın xarakterli insana bənzəyirsiniz. Bir ailədə iki belə çılğın insan. Həmişə kim daha çox güzəştə gedib?

 - Dəqiq deyə bilmərəm ki, o, daha çox güzəştə gedirdi, ya mən. Amma onu deyə bilərəm ki, aramızda çoxlu dava-dalaş olurdu. Özü də çox vaxt günah məndə olurdu. Özümü kiçik qardaş kimi aparmırdım. Tez özümdən çıxırdım, o da böyük qardaş olduğu üçün buna dözə bilmirdi.

- Bəs bu iki aktyorun arasında rəqabət varmı?

- Aktyor kimi aramızda rəqabət olmayıb, çünki müxtəlif səpkili aktyorlarıq. Bizə həmişə özümüzə uyğun rollar verirlər. Rəqabət o vaxt ola bilər ki, ikimiz də eyni rolu oynayaq. Ola bilər ki, teatrda biz eyni rol üzərində işləyək. Bax onda aramızda rəqabət olar, amma bu, məncə normal olar. Çünki aramızda rəqabət olsa, bunun tamaşamıza, həm də özümüzə xeyri dəyər. Çünki rəqabət olmasa, inkişaf da olmaz.

- Bir neçə dəfə eyni serialda da rol almısınız. Qardaşınızla işləmək, tərəf müqabili olmaq necə hissdir?

 - Biz tərəf müqabili olduğumuz vaxt qardaş olduğumuzu unuduruq. Amma sonra oturub tamaşa edəndə, əlbəttə ki, bu, bizə çox maraqlı gəlir. Hətta ən əsəbi, gərgin səhnələrimiz bizi güldürür, ailə üzvlərimizi isə qəhərləndirir…

- Ən yaddaqalan illər məktəb illəri olur. Siz bu illəri necə xatırlayırsınız?

- Çox adam məktəb illərini xoş xatirələrlə anır, mənim isə məktəb illərim o qədər də maraqlı keçməyib, çünki ibtidai sinifdə oxuyan zaman Sovet dövləti dağıldı. Sonra 20 yanvar, Xocalı soyqırımı, Qarabağ münaqişəsi, soyuq sinif otaqları… Bir sözlə, məktəb illəri məndə xoş izlər buraxmadı.

- Sumqayıt şəhərində doğulmusunuz. Hal-hazırda bu şəhərdə yaşayırsınız. Şəhər sizin həyatınızda xoş izlər buraxıb, yoxsa əksinə?

 - Mən Sumqayıt şəhərində yaşasam da, demək olar bütün günüm Bakıda keçir. Çünki çalışdığım Bakı Bələdiyyə Teatrı paytaxtda yerləşir. Yəni, məni Bakıya yalnız sənətimlə bağlı işlər bağlayır. Sumqayıtda mən özümü daha rahat hiss edirəm. Çünki mən bu şəhərdə dünyaya gəlmişəm. Bütün uşaqlıq illərim Sumqayıtda keçib. Həm də bu şəhərdə mənim ailəm var, yaxınlarım var, qonşularım var. Bu şəhər mənim həyatımda daha xoş izlər buraxıb və inanıram ki, bundan sonra şəhərimiz daha da gözəlləşəcək, yaşıllıqların sayı daha da artacaq.

- Sumqayıt gənclərinin əsas problemi nədir?

- Məncə, tək Sumqayıt gəncləri yox, bir çox gənclərimizin əsas problemi təhsillərinin aşağı səviyyədə olmasıdır. Mən inanıram ki, əgər gənclərimizin təhsili yüksək səviyyədə olarsa, onda onlar şəhərimizin küçələrinə zibil atmazlar, avtobuslarda gedərkən telefonlarındakı mahnıların səsini qaldırıb qulaq asmazlar, teatrda tamaşaya baxarkən səs-küy salmazlar, bir birilərinə “üzr istəyirəm, yetim” kimi ifadələrlə müraciət etməzlər. Ümumiyyətlə belə - bir çox şeyləri etməzlər.

- Gələcəkdə övladlarınızın yolunuzu davam etdirməsini istərdinizmi?

- Bəzən sənət adamlarına bu sual veriləndə əksəriyyəti cavab verir ki, yox. Və yaxud da deyirlər ki, mən istəmirəm mənim çəkdiklərimi övladım çəksin. Həmin adamlardan soruşmaq istərdim, əgər bu sənət aləmində olmaq belə ağır və dözülməzdirsə, nəyə görə o sənəti atıb başqa bir işlə məşğul olmursunuz? Əgər söhbət maaşın aşağı olmağına görədirsə, tək aktyorlarda deyil, müəllimlərdə həkimlərdə və digər peşələrdə də maaş aşağıdır. Əgər söhbət bir-birinə quyu qazmaqdan, ədalətsizlikdən, qiymət verilməməkdən gedirsə, bu da hər yerdə var. Məncə, sənətindən asılı olmayaraq, hər bir şəxs ilk növbədə məşğul olduğu işi sevməli, özünə arxayın olmamalı, daim çalışmalıdır. Onda hansı peşədə olursansa ol, şikayət etməyəcəksən. Əgər mənim övladlarımdan hansısa mənim yolumu davam etdirsə, mən buna çox şad olaram.

Zeynəb Abdullah, Xeberle.com