“Uğur sirri” layihəsinin növbəti qonağı əməkdar incəsənət xadimi, rejissor Mehriban Ələkbərzadədir.

Uğurun rəngi, dadı, qoxusu, səsi, görüntüsü necədir və ona toxunmaq nə zaman mümkündür?

- Həyat bəxş edilibsə, artıq ilk uğur var demək olar. Sonrası təbii ki, ALLAHa, sonra valideynə, daha sonra coğrafiyana və etnik kimliyinə bağlıdır.  Ola bilməz ki, bu yaşam faktorları sənin gələcəyini müəyyən etməsin. Və insanın materialı doğulur. Ondan şəxsiyyət olacaqmı, olmayacaqmı? Mən bu dünyaya HƏYAT vizası almış varlığın  nədənsə uğur qazanmasına mütləq əminəm. Sadəcə indi insanlar çox acgöz  olublar. Nə qədər  olsa, yenə ver və azdır - deyəcək. Bu isə başqa mövzudur.

Amma hər bir kəsin umurunda  olduğu uğur - mahiyyəti fərqlidir. O ki, qaldı ona toxunmaq? Duyğu ya hissə necə toxunmaq olar ki? O sənə yaxın olduğu qədər də əlçatmazdır, müstəvi fərqindədir. 

Deyirlər, yanlışlar olmadan doğrular tapılmaz. Uğursuzluq yanlışlardanmı doğar sızcə?

- Tale, daha doğrusu qismət. Şəmsi Təbrizinin gözəl bir sözü var: "Olmadı diye sızlandığın duaya, gün gelir olmadı diye şükredersin”. Hər bədbəxtlikdə belə bir mütləqlik olur məncə. Hətta bir zamanlar mənə elə gəlirdi ki, nə yaxşı belə mənfi emosiya doğuracaq hallar elə belə oldu. Daha ötəsi ola bilərdi. Amma elə hadisələr olur ki, yox, orda təskinlik tapacaq bir səbəb olmur.

Apardığınız mübarizədə uğursuzuqlarla üzləşəndə nə edirsiniz? 

- Bizim nəsilə elə hey dedizdirdilər ki, Lenin dünyada ən ağıllı insandır. Düzdür, bu kommunist təbliğatı idi. Sonradan daha nələr-nələr  açıldı ki, gəl görəsən. Xülasə, Leninin çox müdrik ifadəsi vardı:  “Ağıllı o adam deyildir ki, səhv etmir. Belə adam yoxdur və ola da bilməz. Ağıllı o adamdır ki, onun etdiyi səhvlər çox da mühüm olmur və bunları asanlıqla və tezliklə düzəldə bilir.”

Hər insanda bir istedadın olduğunu söyləyərlər, bunu necə üzə çıxarmaq olar sizcə? 

- Çətin məsələdir. Əslində mən də hər bir insana bir projektor altında baxmaq tərəfdarıyam. Yəni, ola bilməz ki, ALLAH onu yaradanda-bircə zövq alacağı çizgini vurmamış olsun. Çünkü, yaradan yaratdıqlarını sevər də, yaradar.

Yetər ki, zamanında və gərəkli olacaq yerdə ola biləsən. Bir də, axı insan dünyaya səbəbsiz gəlmədiyinə əmin olmalıdır. Bunun üçün də, ifadə forması tapmağa mütləq səy edilməlidir.

Bəzi gənclər bir işə başlayanda “Düşün, tətbiq et və nəticələndir” prinsipini unudurlar. Yəni, onlar düşündüklərini ya tətbiq etmir, ya da nəticələndirmirlər. Bu problemlə üzləşənlərə nə söyləmək istərdiniz?

- Zaman itirmək qədər peşiman olacaq bir şey yox. Realizə edilməyən istəklərin daxildə açıq yara kimi qalmaq ehtimalını daha sonra yalnız ona aid olan təfükkür və qabiliyyətini görməzdən gəlmək - heyif deyilmi?

Edə biləcəyini etməmək, yaxud mümkünsüzə cəhd etmək - verilən fürsəti dəyərləndirməmək çox az sonra onları pərişan edəcək. Amma bəzi stiuasiyalar da olur ki, sən nə isə etsən də, konkret sonuca varmağın marağında belə olmursan. Ya da maraqlanmırsan. Əgər sənin gözlərində HƏYAT bombozdursa sənə bu dünyada cazib görünən bir şey olmayacaq.

Qarşısındakına “əhəmiyyətlisən” mesajını verməkdə çətinlik çəkənlərə nə söyləmək istərdiniz?

- Yaşamınızda eyni olayların təkrar-təkrar gerçəkləşdirmək bəlkə də zordur. Amma şərəflidir axı. Yorulmaq, təslim olmaq deməkdir. Təslim olmaq isə sənin daha sonrakı var olmanı məchul istiqamət və aqibətini dəyişəcək. Yenə də israr varsa… Onda bu yorulub, kənara çəkilmək - sizdə qorxunu dəf edir. Yəni düşünürlər ki, dəf edəcək. Amma… Xəyallarımızı söküb atdığımız AN həyatımız sona gedir demək. Məncə, cəsarət qorxunun yoxluğu deyil, qorxuya dirənmək, qorxuya meydan oxumaqdır. 

Övladlarınızın gələcəkdə uğurlu ola bilməsi üçün nə edirsiz? Daha fərqli davrana bilirsiniz?

- Mənim kimsəm yox.

Sizcə insanların ən güclü silahı nədir - ağıl, yoxsa ürək?

- Ürək hər kəsə açılmaz. Açılan ürəyi də hər kəs dəyərləndirməz. Qəlbinin qanını görüb qanıyan qəlbində MƏN-mi?-verəcək ürək. Güclülərin gücünü gözlərində arayan, bulduğunda isə, hər dəfə yandığını hiss edən, hər gün içində ölən ÜRƏK... 

Əlbəttə ki, AĞIL.

Uğurun yaşı olur yoxsa başı, nə düşünürsüz?

- Vallah mən gələn uğurdan deyil, qazanılan uğurlu sonucdan bəhs edə bilərəm. Mən layiq olduğum, qazandığım UĞURU belə heç də hər zaman mənə vermədilər. Az olsa da onu dırnağım və dişimlə qazandım. Çox az oldu. Bəlkə də bu qədər əziyyətə dəyməzdi. Amma mənim həyatım onsuz daha mənasız olardı. 

Fərqliliyiniz və fərdliliyiniz haqında nə deyə bilərsiz? Nəyə görə Siz sizsiniz? 

- Kimsə mənim önəm verdiyimə önəm vermədi. Kimsə mənim qoruduğumun fərqinə belə varmadı. Kimsə mənim inandıqlarıma məhəl qoymadı. Mənim üçün ölüm-dirim sualı onlar üçün rahat adlayıb keçiləcək bir şey oldu. İndi odur, onlar harda, mən harda? Acıdır, bəlkə də gülməlidir. Amma hətta geriyə qayıtmaq mümkün olsaydı belə bu günkü əhəmiyyətsizliyə rəğmən, mən yenə də o cür olardım. Bəzilərinin gözündə mənim imtina etdiklərim daha vacib nədənlərdir.  Mən isə onlara təhəmmül etməməkdə israrlıyam. Odur ki, təkrar edirəm, mən çox “vaciblərdən” imtina etdim. Bu günkü yaşam tərzimin və münasibətlər fərqində olanlara görə nə qədər peşiman olsam da İMTİNA etməli.

İnanmaq asandır, yoxsa inandırmaq? 

- Əlbəttə, inandırmaq daha rahat. İnamından yıxılanlar daha heç inanmazlar ki. 

Həyatın enini və uzununu ölçdüzmü heç, yaşamı üzün edən nədir sizcə? 

- Səadətin yoxluğu. Sevdiyin insanların səninlə bir dünyada olmaması. Mənim ömrüm nadir hallarda - çox qısa və daha çox zaman isə, həddindən ziyadə uzundur.

Əgər sizə dünyada yalnız bir şeyi dəyişdirmək imkanı verilsəydi, nəyi dəyişdirərdiz?

- Nəyi…? Tibetdə doğulmaq və yaşamaq istərdim. Və albalı ağacı olmaq istərdim. Və bir də İntibah dövründə doğulmaq istərdim.  

- Həyat toplananlar, çıxılanlar, vurulanlar və bölünənlərdən ibarətdir deyirlər, sizin payınıza ən çox hansı əməl düşüb? 

- Min şükürlər olsun ki - yaratmaq imkanım peşəmdədir. Mənim əksər insanlardan fərqim də bundadır. Mən özümü ifadə edə bilirəm. Buna qabiliyyət və imkanım var. 

Əgər siz özünüz özünüzə dost ola bilsəydiniz, özünüzə sizin kimi bir dost istəyərmiydinizmi? 

- Kaş ki, mənə özüm kimisi rast gəlsəydi. Məncə, bənzər kəs-mənim inamım və güvənim olardı. Elə insana güvənmək mütləqdir. Dürüst, təmənnasız və kibrisiz. 

Əgər Siz balaca uşağa bütün həyatı boyu ona gərəkli ola biləcək bir məsləhət versəydiniz, nə deyərdiniz?

- Valideynlərinin dəyərini zamanında verə bilsinlər. Əsla hisslərlə addım atmasınlar.

Dəlinin doğru xəbəri nə olar sizcə? Dəliliyin gözəlliyi mümkünmü? 

-  Dəlilərdə özünü qoruma və utanc faktoru olmur. Yəni ki, o düşünmədən beyninə gələn fikiri söyləyə bilir. Utanmadan istədiyi vəziyyəti şərh edə bilər. Burda təəccüblü bir şey yoxdur. Onların şüurunda hanısa qadağalar filtiri yoxdur. O səbəbdən düşündüyünü amacı, gəldiyi qərarı - açıqca söyləməsi rahatdır. Amma biz, “sağlam həyat və məkan” hər düşündüyümüzü səsləndirə bilmərik. Bu qətiyyən olmaz - səni anlamazlar. Dəliliyin  gözəlliyi də bax budur. Manevr etmədən, təmənna ummadan, bildiyini demək və ehtiyatlanmamaq! 

Hesab - kitab dəftəriniz var?

- Hesab-kitab nə demək ki? Anlamadım. Nə mənada?

Təbliğ etdiyiniz gercəklər hansılardır, necə düşünürsünüz sevginin təbliğata ehtiyacı varmı? 

- HƏQİQƏT! Sevginin deyil, sevgiyə inanmanın təbliğatı mütləqdir. Belə ki, insanın tək faydası bu.

Yaşamaq və var olmaq arasında fərq nədir?

- Var olmaq - həyatı sona varmaq, intihar etməmək üçün (həm günahdır, həm də dəli cəsarət istər) günləri, həyatımı xərcləmək deməkdir.

Yaşamaq isə… Ona hələ baxarıq. Zaman gələr bu sualı da cavablandırarıq.

/azadinform.az/