Sumqayıtda "zırpaket” satan: "Nə qadağa, qadağaya baxan kimdir?!”

Sumqayıtda bayram ərəfəsində müşahidə etdiyimiz sakitlik, sən demə, tufanqabağı sakitliyi xatırladırmış. Söhbət hər bayramda küçələrdə, hətta mənzillərineyvanlarında, binaların bloklarında partladılan yüksək səsyayıcıqabiliyyətinə malik olan partlayıcı oyuncaqların pozduğu sakitlikdən gedir. Bayram ərəfəsində əlaqədar təşkilatlar nəzarəti gücləndiriblər, deyə güman edib çox sevinmişdik. Çünki Daxili İşlər Nazirliyindən gələn xəbərlərdə Baş İctimai Təhlükəsizlik idarəsinin əməkdaşları tərəfindən Sumqayıt şəhərində təkcə bir səyyar satıcıdan 16300 oyuncağın müsadirə edildiyi bildirilirdi. Bu dəfə nəzarətin daha ciddi olduğuna inanmaq ücün Sumqayıtın Yeni il aksessuarları satılan bir neçə dükanında yoxlama apardıq. Bura səyyar satıcılar da daxil idi. Onları da dindirdik. Aşağı-yuxarı şəhərin bir çox yerlərini gəzib-dolaşdıq, "zırpaket”in satılıdığına şahid olmadıq. Topdan satış ticarət mərkəzlərinin sahibkarlarından aldığımız cavab bizim bu bayramı səssiz-küysüz - insan kimi qarşılayacağımıza olan ümidimizi artırdı. Sahibkarların bir çoxu bildirdi ki, satışı qadağan edilib, güclü nəzarət var. Biz ağrımayan başımıza dəsmal bağlamaq istəmirik. Yalnız bir yerdə Yeni il oyuncaqları dükanının satıcısı bildirdi ki, bayrama 4-5 gün qalmış gətirib satacam. Bu oyuncaqların satışı qadağan edilib, sizin satmağa ixtiyarınız varmı? sualımızı kinayəli qarşıladı. Nə qadağa, qadağaya baxan kimdir?!
Sumqayıt şəhər Polis İdarəsi ilə əlaqə yaradıb yüksək səsli oyucaqların satışına idarə tərəfindən nəzarətin hansı səviyyədə olduğunu öyrənməyə çalışdıq. Rəis müavini Süleyman Nemətovla telefon bağlantısı qurmağa çalışdığımız müddət ərzində şəhərin balaca dələduzları artıq sevimli bayram əyləncələrinin dadını çıxarmağa başlamışdılar. Şəhərin elə bir yeri yoxdur ki, orda "oyuncaq” partladılmasın. Məktəb həyətlərində, parkların içərisində. Yaşlı, xəstə, körpə olduğu hər yerdən partlayıcı oyuncaqların sinir pozucu səsini eşitmək mümkündür. Sanki biriləri bu oyuncaqları şəhərin bütün uşaqlarına hədiyyə paketinin içərisində pulsuz paylayıb.
Sual yaranır, satışı qadağan edilən oyuncaqları harda və necə satırlar? Şəhər polis idarəsi əməkdaşları bu hay-küyü eşitmirmi?
Artıq şəhərin bir çox ərazilərində sakinlər səhərləri "Zırpaketin” səsi ilə açır. Bir anlıq fikirləşib həyəcanlanırsan: yoxsa Sumqayıtda döyüşlər gedir, bizim xəbərimiz yoxdur.
Uzun sürən cəhdlərimizdən sonra Sumqayıt şəhər polsi idarəsinin rəsi müavini Süleyman Nemətovla əlaqə saxlaya bildik. Amma o söylədi ki, mətbuata açıqlama vermək ixtiyarında deyil, nazirliyin mətbuat xidməti ilə əlaqə saxlayaq. Daxili İşlər Nazirliyinin mətbuat xidmətinin şöbə rəisi Orxan Mansurzadə Xeberle.com-a söylədi ki, Sumqayıt polisi şəhərdə bu kimi hallarla mübarizə aparır və vəziyyətə nəzarət edir. DİN Baş İctimai Təhlükəsizlik İdarəsi hər yerdə yoxlamalar aparıb. Satışı aşkar edilən yerlərdə oyuncaqların müsadirə edilməsi ilə yanaşı, satıcılar da cəzalandırılıb.
DİN mətbuat xidmətinin şöbə rəisinin nəzərinə çatdırdıq ki, Sumqayıt şəhərində belə yoxlamalar aparılsa da, bir çox yerlərdə partlayıcı oyuncaqlar açıq şəkildə satılır. O.Mansurzadə isə Sumqayıt polisi ilə əlaqə saxlayaraq vəziyyətlə bağlı daha müfəssəl məlumat alıb bizə xəbər verəcəyini bildirdi.
Ümid etmək istəyirik ki, Sumqayıt polisi adından problemə gec-tez reaksiya veriləcək.

Aytən Əli
Xeberle.com