Bu gün Xızıda XX əsr Azərbaycan ədəbiyyatının görkəmli nümayəndəsi, 30-cu illər repressiyasının qurbanı Mikayıl Müşfiqin xatirəsi anılacaq.
Nakam şairin ölümünün 80 illiyinə həsr olunan mərasim Sayadlar kəndində, Mikayıl Müşfiqin xatirə muzeyinin qarşısında keçiriləcək.
Muzeyin direktoru Orxan Əzimov AZƏRTAC-ın bölgə müxbirinə bildirib ki, müşfiqsevərləri bir araya toplayacaq anım mərasimi Sumqayıt Regional Mədəniyyət və Turizm İdarəsinin Xızı rayonu üzrə nümayəndəliyi, "Cabir Novruz” Mədəniyyət Fondu və Mikayıl Müşfiqin xatirə muzeyi tərəfindən təşkil edilir. Tədbirdə ölkəmizin tanınmış şair və yazıçıları, elm və incəsənət xadimləri, görkəmli poeziya ustaları iştirak edəcək. İştirakçılar ölməz şairin həyat və yaradıcılığından, onun ədəbiyyatımızda tutduğu mövqedən söhbət açacaqlar.
Həmçinin Xızı məktəbliləri nakam şairin şeirlərindən parçalar səsləndirəcək, ədəbi-bədii kompozisiya təqdim olunacaq.

Xəbərdən istifadə edərkən istinad etmək vacibdir.