Rubrikamızın növbəti qonağı istedadlı aktrisa,olduqca səmimi insan "Pərvanələrin rəqsi” serialından Xatirə kimi tanıdığımız Mətanət Eresdir.

- Salam Mətanət xanım, xoş gördük sizi. Bəzi insanlarda aktrisalığa həvəs uşaqlıqdan, bəzilərində isə yeniyetməlik yaşlarında başlayır. Sizdə bu sənətə həvəs nə vaxtdan başladı?
- Məndə bu sahəyə həvəsi bacım oyadıb. Əslində öncə Azərbaycan dili və ədəbiyyat müəlliməsi, sonra jurnalist, daha sonra isə dedim ki, müğənni olacağam. Bir gün bacım soruşdu ki, məktəbi bitirəndən sonra hansı peşəni seçəcəksən? Dedim müğənni olmaq istəyirəm. Dedi, gəl aktyorluğa verək sənədlərimizi. Mən də razılaşdım. Elə bilirdim ancaq efirə çıxanlardır aktyor. Daha bilməzdim ki, səhnəarxası qədər insanlar varmış...

- Bacınızla eyni vaxtda İncəsənət universitetinə sənəd vermisiniz. Ailədə hər iki övladın incəsənət sahəsini seçməsinə münasibət necə oldu?
- Buna ailəmizdə münasibət normal olub. Atam icazə verdi deyə bir az qohumlar təəccübləndi. Sadəcə atam bu sahəni çox sevir. Əsas da muğam dinləməyi. Biz öz savadımızla, istedadımızla qəbul olmuşuq. Bir qəpiksiz qəbul olmuşuq, bir qəpiksiz də bitirmişik.

- Bugünkü İncəsənət tələbələri ilə sizin dövrünüzün tələbələri arasında fərq çoxdurmu?
- Yerlə göy qədər. Bizim vaxtımızda seçib qəbul edirdilər. Boy buxun, istedad, danışıq qabiliyyəti, səhnə hərəkəti, rəqs, mahnı, "slux”. Həm də bizim vaxtımızda hamı sevib gəlmişdi sənətə. İndikilərin isə əksəriyyəti məhşur olmaqdan ötrü seçir bu sənəti. Bir də əsgər getməmək üçün. Elə bilirlər İncəsənət institutuna qəbul olan kimi ulduz olacaqlar. Aktyorda ürək lazımdır, boğazdan yuxarı yola vermək yox. Nə oynadığını, rejissorun nə istədiyini bilməlidir. Eşitməli, görməli, cavab verməyi bilməlidir. Yola verməməlidir.
- Müsahibələrinizin birində söyləmisiniz ki, sənətə nə həvəslə gəlmişdim, nələr gördüm. Belə hadisələr sənətə olan sevginizi azaltmadı ki?
- Düzdür. Nə arzularla gəldim, nələr gördüm. Bu sahədə normal işləməkçox çətindir. Amma həvəs, sevgi azalmır, azalsaydı, hal-hazırdakı aktyorların maddi vəziyyəti sıfır olmasına rəğmən, işləməzdilər. Biz bu sənətin xəstəsiyik. Sağalmaz xəstələri (gülür).
- Teatrda çox haqsızlıqların olduğunu söyləmisiniz. Nə vaxtsa teatrı tərk edib özünüzü bütövlükdə kinoya həsr etmək fikriniz varmı?
- Bilirsiniz, teatrın öz yeri var, kinonun öz yeri. Fərq böyükdür. Kino aktyorun tanınmasında böyük rol oynayır. Çünki indi teatrdan çox efirə baxılır. Amma teatrın yerini heç nə vermir. Teatrsız aktyor aktyor deyil, məncə. Səhnə insanı rahatladır. Hər şeydən uzaq iki saat mənəvi zövq verir.
- Bir çox seriallarda çəkilmisiniz. "Pərvanələrin rəqsi” serialında yaratdığınız obrazı məhşurluğunuzun pik nöqtəsi saymaq olarmı?
- Aktyor yoldaşlarım deyirlər ki, "Pərvanələrin rəqs”i sənin vizit kartındır (gülür). Öz rolunu ciddi komedik formada sevdirmisən. Nə bilim vallah, sonra da oynadığım obrazla tanıyırlar. Deyirlər, tam fərqlidir. Amma əksər insanlar məni görəndə Sarı Seyidin sınanmış cəddi deyirlər...

- Bir aktrisa kimi bu obrazı oynamaqdan zövq alırdınız?

- Xüsusilə, Şövqü ilə oynamaqdan zövq duyuram. Çox əla tərəf müqabilidir.

- Mətanət xanım, Sumqayıt şəhərində doğulmusunuz. Uşaqlığınız bu şəhərdə keçib. Məktəb illərində necə şagird olmusunuz?

- Məktəb vaxtı dəcəl olmuşam. Məktəbi dağıdırdım,dava salırdım, dərsdən qaçırdım. Məktəbdə valideyn iclası olanda evdəkilərə heç vaxt demirdim. Ancaq şikayət edəcəkdilər. Bir dəfə müəllim sinfin qapısında durdu ki, çantanızı qoyun gedin. Nə vaxt valideyniniz gələr, çantanızı da götürərsiniz.Gördüm müəllimin başı qarışıqdır, çantanı ikinci mərtəbədən çölə atdım.Gəldim qapıdan çantasız keçdim. Müəllimə də elə bildi ki,çantasız keçdim.

- Hazırki yaradıcılığınız haqqında məlumat verərdiniz?

- Hazırda çəkilişlər, məşqlər gedir.Teatrda yeni tamaşalar var.

- Mətanət xanım, müsahibəyə görə çox sağ olun.İşlərinizdə uğurlar arzu edirik.Hər zaman zirvələrdə olasınız.

- Çox sağ olun. Allah sizdən razı olsun.Sizə də işlərinizdə uğurlar arzu edirəm. Əsas da can sağlıgı. Özümə də həmçinin. Bir də yeni teatr binası arzulayıram özümüzə, yəni Şuşa teatrının kollektivinə. Allah arzumuzu çin eləsin. Biz də tamaşaçıları öz teatrımızın səhnəsindən yeni tamaşalarla sevindirək.

Söhbətləşdi: Zeynəb Abdullah
Xeberle.com

P.S. Xatırladaq ki, bu gün Mətanət xanımın doğum günüdür.Xeberle.com komandası adından aktrisamızı həm doğum günü, həm də Yeni il münasibətiylə təbrik edir, ona ən xoş arzularımızı çatdırırıq.