Budəfəki müsahibimiz "Rövşən Ritm" qrupunun yaradıcısı Rövşən Cabbarladır. Sumqayıtda doğulan, hal-hazırda burada yaşayan və bu şəhəri heç bir yerə dəyişməyəcəyini deyən Rövşən bəyləsöhbətimizə siz də şahidlik edə bilərsiniz. Onunla darbuka alətinin sirlərindən, başçılıq etdiyi ritm qrupundan və gələcək planlarından söhbətləşmişik.

-Rövşən bəy, xoş gördük sizi. Belə bir sualla başlamaq istəyirəm söhbətimizə. Ritm sənəti sizin üçün hansı aləmi ifadə edir?

-Xoş gününüz olsun. Öncəliklə diqqətinizə görə minnətdaram. Ritm aləmi mənim üçün sonu olmayan və sözün əsl mənasında sənət dünyasıdır. On bir yaşımdan bu dünyanı sevdim və səyahətinə başladım.

-Tanınmış darbuka ustadı Misirli Əhməddən dərs almısınız. Ritm aləminin "ikinci Əhməd”i ola biləcəksinizmi?

-Ustad Misirli Əhməd darbuka alətiylə dünyada imzasını atıb, möhürünü vurmuş bir sənətkardır. Mən yalnız fəxr edə bilərəm ki, Misirli Əhməddən şəxsən dərs almışam və məktəbinin ilk tələbələrindən olmuşam. Rövşən Cabbar kimi isə bu sənəti sevərək yaşayıb yaradıram. Qiyməti isə verən insanlardır.

-"Rövşən Ritm" qrupu yaratmısınız. Qrupunuzun neçə üzvü var?

-Bəli, 2010-cu ildən Rövşən ritm qrupu kimi fəaliyyətdəyik. Gördüyümüz işlər də göz önündədir. İnşallah bu il 5 yaşımızla bağlı gözəl bir solo konsert üzərində çalışırıq. Qrupun 11 əsas üzvü var. Böyük tədbirlərdə isə qrupun 20-25 nəfərlik heyətlə də cıxışları olur.

-Gününüzün nə qədər vaxtını sənətinizə həsr edirsiniz?

-Hər ötən il qrupa diqqət və təkliflər artır. Ona görə biz də həftənin hər günü fasiləsiz məşqlərlə davam edirik. Günün 3-4 saatını qrupa sərf edirəm və sonra əlavə 2-3 saata yaxınını öz üzərimdə işləyirəm.

-Tələbələr hazırlaşdırırsınız. Onlardan razısınız?

-Düzünü desəm, çox tələbə ilə işləməyə səbrim çatmır. Ona görə də kurslara yazılmaq istəyən tələbələri özüm seçirəm.

-Öz darbukanız harada hazırlanıb, Rövşən bəy?

-Darbuka aləti ilə mən Türkiyədə tanış oldum. Onun sirlərinə də elə orda yiyələnməyə başladım. Çünki darbuka aləti Azərbaycanda ifa olunan musiqi alətləri arasında olmayıb. Alət Misir ölkəsinə aiddir. Alət bütövlükdə gildən hazırlanır, üst hissəsində isə balıq və ya çəpiş dərisindən istifadə olunur. Alətin özünü və özünəməxsus ifasını Vətənimə mən gətirdim. Bu, mənə qürur verir. Nə zamansa bu alətdən danışılarsa, inşallah ki,əziyyətimi görüb qiymətləndirərlər.

-Azərbaycanın tanınmış ritm ustası Natiq Şirinovla münasibətiniz necədir? Birgə lahiyəniz ola bilərmi?

-Natiq Şirinov gözəl sənətkardır. Bunu hamı bilir və görür. Münasibətimiz, etiraf edim ki, yoxdur. Hansısa bir işbirliyimiz, lahiyəmizin olub olmamağından da bir söz deyə bilmərəm. Əgər tamaşaçı tərəfdən istək olarsa, məmmuniyyətlə hazıram.

-Sumqayıt şəhərində doğulmusunuz, hazırda bu şəhərdə yaşayırsınız. Hansı halda Sumqayıtı başqa şəhərə dəyişərdiniz?

-Sumqayıt şəhəri mənə çox doğmadır. Burdan heç yerə getmək də fikrim yoxdur.

-Yaradıcılığınızda nə yeniliklər var?

-Ritm qrupu kimi davamlı axtarışdayam. Amma çox fərqli bir layihə üzərində işləyirəm. İnanıram ki, uğurlu bir iş olacaq. Bunu isə deyə bilməyəcəyəm, sürpriz olaraq qalsın.

-Rövşən bəy, müsahibəyə görə çox sağ olun. Sizə işlərinizdə bol-bol uğurlar arzu edirik.

-Bizə göstərdiyiniz diqqətə görə sizə - bütövlükdə Xeberle.com kollektivinə minnətdaram. Yeni lahiyələrmizi sizlərlə paylaşmaqdan şad olarıq. Çox sağ olun ki, varsınız və vətənə, şəhərimizə xidmət edirsiniz.

Söhbətləşdi: Zeynəb Abdullah