Qonağımız həkim-stamatoloq Fuad Xudaverdiyevdir. Həkim Xeberle.com-a dişlərə göstərilən gigiyenik müalicə metodlarından danışdı.

- Sağlamlıq dişlərdən başlayır. Dişlərin çürüməsi-karies nədən əmələ gəlir?

- Uşaqların inkişafi dövründə fosfor, kalsiumun və florun miqdarı az olduqda, eyni zamanda şəkərli ve karbohidratla zəngin olan qida qəbul etdikdə, dişləri vaxtında və kifayət qədər təmizləmədikdə,ağız suyunun tərkibindən və.s asılı olaraq karies əmələ gələ bilər.

- Artıq neçə yaşdan etibarən dişlərə xüsusi qulluq lazımdır?

- Dişlərə qulluq 1,5-2 yaşından başlanmalıdır və valideynin nəzarətiylə kiçık firçalarla təmizlənməlidir.

- Həkim,dişlərin sağlam olması üçün hansı qidaları qəbul etmək lazımdır?

- Dişlərin sağlam olması üçün süd və süd məhsullarından, meyvə- tərəvəzlərlə balanslı qidalanmaq, tərkibində A,D,C vitamini olan qidaların qəbulu, şəkərli qidalardan sonra ağız yaxalanmalı,qazlı və şəkərli içkilər az istifadə olunarsa dişlərin çürüməsinin qarşısı alınar.Şəkərli ve karbohidratlarla zəngin olan qidalar qəbul etdikdə dişlərin çüruməsinə gətirib çıxarır.

- Gün ərzində dişlər neçə dəfə təmizlənməlidir?

- Gün ərzində dişlər 2 dəfə: səhər və axşam firçalanmalıdır.

- Hazırda diş implantasiyasına üstünlük verilir.İmplant dişlər nə dərəcədə etibarlıdır?Yaş həddi varmı?

-İmplant dişlər tamamilə etibarlıdır. Etibarlılıq bir çox yöndən qiymətləndirilə bilər.İmplantlar tam bioinert materialdan-titandan hazırlanır. Sonradan passivləşdirilir, implantlarin səthi bioloji uyğunlaşdırırlar. Əgər belə olmasaydı, heç bir orqanizm implanti qəbul etməzdi. Yaş həddinə gəldikdə isə hər kəs dişlərini implantasiya etdirə bilər. Amma bəzi məhdudiyyətlər var. Adətən bu 18 yaşdan sonra həyata keçirilir. Yuxarı yaş məhdudiyyəti yoxdur.

- Bir çox həkimlər diş implantasiyasının mənfi fəsadlar törədə biləcəyini deyirlər. Siz bu fikirlə razısınızmı?

- İmplant seçimi, planlaması normal aparılırsa, bu işlər yaxsı mütəxəssis tərəfindən aparılırsa və pasient həkimin təyin etdiyi rejimlərə əməl edirsə, dərmanları vaxtında qəbul edirsə, implantasiya tam normal və mənfi təsirlər olmadan keçir.

- Diş daşı diş əti xəstəliklərinə səbəb ola bilərmi?

- Diş daşi tüpürcəyimizdəki mineralların bir məhsuludur. Daş, diş əti iltihabı və periodontit kimi diş əti xəstəliklərinin başlıca səbəbidir.

-Ağız qoxusunun səbəblərini açıqlayardız.

- Nizamlı olaraq ağız baxımı edilmədiyi təqdirdə,qidaların artıqları dişlərin arasında,dilin üzərində, diş ətlərinin üzərində yığılmağa başlayır və bu da bir müddət sonra xoşagəlməz bir ağız qoxusuna səbəb olur. Ağızdakı çürümüş dişlər, köhnə diş plombları, həmçinindiş daşları da ağız qoxusunun yaranmasına səbəb olur.

- Hamiləlik müddətində dişdə müəyyən problemlər olur.Bu zaman diş həkiminə müraciət etmək lazımdırmı?

- Hamilə qadınların əksəriyyəti fikirləşir ki, bu dövrdə dişləri müalicə etmək ziyanlıdır. Lakin bu çox səhv fikirdir. Nəticədə qiymətli vaxt itkisi baş verir ki, müalicə olunmayan karies dişi məhv edir. Adətən hamilə qadınlarda dişlərin mualicəsi üçüncü ayından sonra həyata keçirilir.Hamiləliyin birinci və üçüncü aylığında müalicə yalnız ekstremal vəziyyətlərdə aparıla bilər. Məsələn güclü diş ağrısı, güclü iltihab və.s olduqda.

- Sumqayıtda fəaliyyət göstərirsiniz. Sizə daha çox dişdəki hansı problemlərə görə müraciət edirlər?

- Sumqayıtda demək olar ki, hamının problemi eynidir. Əsas diş ağrılarına və protezləmə işlərinə görə müraciət edirlər.

Zeynəb Abdullah

Xeberle.com