Xeberle.com mövzuya marağı və aktuallığı nəzərə alaraq, Naftalan Otel Qaşaltı sanatoriyasının həkim-kardioloqu Fərhad Fərhadovla müsahibəni təqdim edir.

- Ürək-damar xəstəliklərinin yaranma səbəbləri hansılardır?

- Bu səbəblər çoxdur. İlk olaraq düzgün qidalanmamaq maddələr mübadiləsinin pozulmasına, qanda aşağı sıxlıqlı lipoproteidlərin çoxluq təşkil etməsinə gətirib çıxarır ki, bu da koronar və digər damarlarda aterosklerotik düyünlərin inkişafına şərait yaradır. Hərəkət məhdudluğu qan dövranının pozulmasına və xəstəliyin inkişafına zəmin yaradır. Tütün məmulatlarından istifadə qan damarlarının elastikliyini azaldır. Hipertoniya xəstəliyi olan şəxslərin arterial təzyiqləri uzun müddət yüksək olduqca damarların aterosklerotik düyünlərlə tutulması sürətlənir.

Şəkərli diabetli xəstələrin düzgün müalicə almamaları, qanda osmotik təzyiqin yüksək olmasına və damarların sürətlə daralmasına gətirib çıxarır.

- İnsanlar ürək-damar xəstəliklərindən necə qoruna bilərlər?

Ürək-damar xəstəliklərinin inkişafına səbəb olan əsas 5 risk faktoru ayırd edilir:

- Yaxın qohumlarda erkən ürək xəstəliklərinin olması,

- Şəkərli diabet xəstəliyinin olması,

- Qanda aşağı sıxlıqlı lipoproteidlerin çoxluq təşkil etməsi,

- Arterial təzyiqin yüksək olması,

- Tütün məlumatlarından istifadə.

Bu risk faktorlarının 2 və 3-ü olması damarlarda aterosklerotik düyünlərin əmələ gəlməsi və koronar xəstəliyinin inkişafı deməkdir. Beləliklə, bu faktorların qarşısını almaqla xəstəlikdən qorunmaq olar.

- Neçə yaşından sonra davamlı olaraq müayinələrdən keçmək vacibdir? Və hansı narahatlıqlar olanda həkimə müraciət etməliyik?

- Ümumiyyətlə, 40 yaşından yuxarı bütün tibbi müayinədən keçən şəxslər EKQ müayinədən keçməlidirlər. Yuxarıda göstərilən risk faktorları olan şəxslərin isə daha erkən yaşlarda müayinədən keçmələri tövsiyə olunur. Ürək nahiyyəsində ağrılar, təngnəfəslik, fiziki iş zamanı tez yorulma olduqda həkimə müraciət vacibdir.

- Naftalan Otel Qaşaltı sanatoriyasında ürək-damar xəstəliklərinin diaqnostikası və proflaktikası necə aparılır?

- Sanatoriyanın hər bir qonağı tibbi müayinədən keçərkən kardioloqun baxışından keçir. Yüksək səviyyədə təşkil olunmuş laborator müayinələr təyin olunur və EKQ müayinə aparılır. Diaqnoz dəqiqləşdikdən sonra qonaqlara pəhriz, idman prosedurları və ehtiyac olduqda dərman müalicəsi təyin olunur. Hal-hazırda diaqnozu dəqiqləşdirmək məqsədi ilə EXO kardioqrafiya müayinəsi aparılması üçün hazırlıq işləri aparılır. Qonaqlar aparılan tibbi müayinə və müalicədən razılıq hissi ilə ayrılırlar.

- Maraqlıdır, enerji içkilərinin ürək xəstəliklərinin yaranmasında rolu varmı?

- Ümumiyətlə, ədəbiyyatlarda bu haqda məlumata rast gəlinmir. Ancaq, enerji içkilərinin qəbulu maddələr mübadiləsinə təsir etdiyindən ürək-damar xəstələrinə tövsiyə olunmur.

- Son olaraq ürək-damar xəstəliyindən əziyyət çəkənlərə hansı məsləhətləri verə bilərsiniz?

- Aktiv həyat tərzi keçirsinlər,

- Pəhrizə ciddi riayət edərək çəkilərini aşağı səviyyədə saxlasınlar,

- Kardioloqun müayinəsində vaxtaşırı olsunlar və tövsiyələrə əməl etsinlər.

Hicranə İsmayılova

Xeberle.com