İranın ötən şənbə günü Azərbaycana verdiyi "nota”ya azərbaycanlı deputatlar Tehrana orijinal adekvat cavab verib.
Milli Məclisin deputatları Müşfiq Məmmədli və akademik Ziyad Səmədzadə Xudafərin körpüsündə olublar. Onlarla birlikdə şair Vəli Qaraçaylı və Azərbaycan Yazıçılar birliyinin sədrinin müşaviri Cənubi Azərbaycan komissiyasının sədri, AzTv-də "Körpü” verilişinin ideya müəllifi və aparıcısı Sayman Aruz olub.
Deputatlar İranın Azərbaycana qarşı təhdidlərinə qarşı Cənubi Azərbaycandan olan şairimiz Məhəmmədhüseyn Şəhriyarın "Azərbaycan” şeiri ilə cavab veriblər.
Bununla həm də cənubdakı soydaşlarımıza bir mesaj göndərmiş olublar.
Şeiri deputat, akdemik Ziya Səmədzadə səsləndirib:
"Könlüm quşu qanad çalmaz sənsiz bir an, Azərbaycan.
Xoş günlərin getmir müdam xəyalımdan, Azərbaycan.
Səndən uzaq düşsəm də mən eşqin ilə yaşayıram,
Yaralanmış qəlbim kimi qəlbi viran Azərbaycan.
Bütün dünya bilir – sənin qüdrətinlə, dövlətinlə
Abad olub, azad olub mülki-İran, Azərbaycan.
Bisütuni-inqilabda Şirin-vətən üçün Fərhad
Külüng vurmuş öz başına zaman-zaman, Azərbaycan.
Vətən eşqi məktəbində can verməyi öyrənmişik,
Ustadımız deyib "heçdir vətənsiz can”, Azərbaycan.
Qurtarmaqçün zalimlərin əlindən Rey şümşadını
Öz şümşadın başdan-başa olub al qan, Azərbaycan.
Yarəb, nədir bir bu qədər ürəkləri qan etməyin,
Qolubağlı qalacaqdır nə vaxtacan Azərbaycan?!
İgidlərin İran üçün şəhid olub, əvəzində
Dərd almısan, qəm almısan sən İrandan, Azərbaycan.
Övladların nə vaxtadək tərki-vətən olacaqdır?
Əl-ələ ver, üsyan elə, oyan, oyan, Azərbaycan!
Bəsdir fəraq odlarından kül ələndi başımıza,
Dur ayağa! Ya azad ol, ya tamam yan, Azərbaycan!
Şəhriyarın ürəyi də səninki tək yaralıdır,
Azadlıqdır mənə məlhəm, sənə dərman, Azərbaycan!”
Deputatlar İranla sərhəddə: Oyan, oyan, Azərbaycan! - VİDEO
Xəbərdən istifadə edərkən istinad etmək vacibdir.
