Rusiyanın Volqoqrad şəhərində yaşayan azərbaycanlılar Rusiyanın müstəqillik gününü qeyd ediblər. Şəhər diasporunun təşkil etdiyi geniş tədbirdə Volqoqrad şəhərinin meri də iştirak edib. Ümumrusiya Azərbaycanlıları Konqresinin Volqoqrad reqional şöbəsinin yüksək səviyyədə təşkil etdiyi tədbir şəhər mərkəzindən keçən yürüşlə başlayıb. 30 metrlik Rusiya dövlət bayrağı alqış sədaları ilə qarşılanıb. Volqoqrad şəhərinin meri Andrey Kosolapov Azərbaycan diasporunu 1-ci Avropa oyunlarının açılış mərasimi ilə bağlı təbrik edib. Vurğulayıb ki, Azərbaycanda belə bir möhtəşəm beynəlxalq idman yarışının keçirilməsi dost ölkənin bütün sahələrdə ardıcıl inkişafından xəbər verir. O, Volqoqradda yaşayan azərbaycanlıların vilayətin ictimai-siyasi həyatında fəal iştirak etdiyini xüsusi olaraq qeyd edib. ÜAK-ın Volqoqrad vilayəti reqional bölməsinin sədri Teymur Həsənov isə bildirib ki, Rusiya vətəndaşları olan azərbaycanlılar bundan sonra da vilayətin, eləcə də ölkənin inşikafında öz töhfəsini verməyə hazırdırlar. Rusiyanın müstəqillik günü həmçinin burada yaşayan azərbaycanlıların bayramıdır. Volqoqrad azərbaycanlılar üçün daha doğmadır. Çünki bu şəhərin alman faşistlərindən təmizlənməsində neçə-neçə Vətən oğulları canlarından keçib. Qeyd edək ki, tədbirdə hər iki dövlətin bayraqları ilə yanaşı 1-ci Avropa oyunlarının bayraqları da dalğalanıb. ÜAK-ın sədr müavini Fikrət Məmmədovun verdiyi müəlimata görə, Şəhər Adminstrasiyası rəhbərinin təklifinə əsasən müstəqllik günü ilə bərabər Azərbaycanda ilk dəfə 1-ci Avropa Oyunlarının açılışı bu şəhərdə də təntənə ilə qeyd edilib. Şəhər rəhbərliyi açılış münasibətilə diaspor üzvlərini təbrik edib. Xüsusi olaraq vurğulanıb ki, Rusiya prezidenti Vladimir Putinin məhz müstəqillik günündə Azərbaycanda 1-ci Avropa oyunlarının açılışında iştirak etməsi dövlətlərarası münasibətlərin yüksək səviyyədə olmasından xəbər verir. Azərbaycanın dövlət başçısı İlham Əliyev də Rusiya prezidenti ilə görüşdə bunu yüksək qiymətləndirdiyini qeyd edib. Tədbir böyük bayram konserti proqramı ilə davam etdirilib.

Xeberle.com