ATƏT-in Minsk qrupunun ABŞ-dan olan həmsədri Ceyms Uorlik Ermənistan və Azərbaycan tərəfini münaqişənin sülh yolu ilə nizamlanması üçün hazır olmağa və əzm göstərməyə çağırıb.
O, "Twitter” səhifəsində növbəti dəfə yazıb.
ABŞ-dan olan həmsədr belə deyib: "Tərəflər hazır olarsa və əzm göstərərsə, Dağlıq Qarabağ münaqişəsinin sülh yolu ilə həlli mümkün ola bilər."
C.Uorlik bu gün Bakıda Dağlıq Qarabağ münaqişəsi barədə müzakirələr aparmaq üçün Azərbaycan prezidenti İlham Əliyev və XİN rəhbəri Elmar Məmmədyarovla görüşəcəyini də bildirib.
Həmsədrin "Twitter” səhifəsində yazdıqları.
Ceyms Uorlik
Bundan əvvəl İrəvanda jurnalistlərlə görüşündə ATƏT-in amerikalı həmsədri Ceyms Uorlik bildirmişdi ki, Dağlıq Qarabağ münaqişəsinin hərtərəfli həlli üzrə aparılan danışıqların bəndlərindən biri beynəlxalq sülhməramlı qüvvələrin münaqişə zonasına yerləşdirilməsi haqqındadır: "Hərtərəfli həll çərçivəsində bir sıra elementlər üzrə razılıq əldə olunmalıdır. Həmçinin Dağlıq Qarabağ əhalisinin iradəsinin nəzərə alınması, onların öz doğma torpaqlarına, qaçqınların və daxilən yerini dəyişilmiş, köçürülmüş şəxslərin öz evlərinə qayıdışı təmin edilməlidir. Bundan başqa, real təhlükəsizlik üçün möhkəm zəmanət olmalıdır. Bu məqsədlə beynəlxalq sülhməramlı qüvvələrin bölgəyə yerləşdirilməsi nəzərdə tutulur".
ABŞ diplomatı vurğulayıb ki, tərəflər bütün bu detalları müzakirə etmək həddinə çatmayıblar. Ancaq bu son nizama salma üçün lazım olan danışıqların bəndləridir və bunun həlli regionun bütün xalqlarının maraqlarını təmin etməlidir.
Dağlıq Qarabağ
Xatırladaq ki, ATƏT-in Minsk qrupunun həmsədrləri iyulun 20-də İrəvanda olub, Ermənistan prezidenti Serj Sarkisyan və xarici işlər naziri Edvard Nalbandyan ilə görüşüblər. Onlar regiona səfər çərçivəsində iyulun 22-də Bakıya gəlib və bu gün Azərbaycan prezidenti İlham Əliyev ilə görüşəcəklər. Regiona səfərin əsas məqsədlərindən biri də Azərbaycan və Ermənistan dövlət başçılarının görüşünün təşkilinə nail olmaqdır.
ATƏT-in Minsk qrupunun həmsədrləri
(anspress.com)
Xəbərdən istifadə edərkən istinad etmək vacibdir.
