Bu zaman ilk dəfə olaraq Ukrayna təşkilatlarının uğurlu təcrübəsindən geniş istifadə ediləcək.

"Sumqayıt Gənclərinin Hüquqi Maarifləndirilməsi" İctimai Birliyi bu il noyabrın 1-də Milli Məclisə keçiriləcək seçkilərdə müşahidəçilik missiyasını yerinə yetirəcək. Bu barədə mətbuata açıqlamasında birliyin prezidenti, hüquq müdafiəçisi Elçin Məmməd bildirib. Onun sözlərinə görə həyata keçiriləcək layihə Avropa Şurası və Beynəlxalq İnsan Hüquqları Müdafiəsi Assosiasiyasının dəstəyilə baş tutacaq. "Hesab edirik ki, bu il keçiriləcək parlament seçkilərinə böyük önəm verən beynəlxalq aləmin, əsasən də ABŞ-ın timsalında Qərbin bu seçkilərdən bir çox gözləntiləri var. Qərb Azərbaycan parlamentində real müxalifətin təmsil olunmamasından narahatdır. Seçki mühitinin daha da demokratikləşməsi, namizədlərə bərabər imkanların yaradılması, seçicilərin fəallığının artmasına dəstək verilməsi Azərbaycanın demokratik ölkə kimi beynəlxalq nüfuzuna müsbət təsir edə bilər. Nəzərə alsaq ki, ilk dəfədir ki, Azərbaycanda seçkiləri ATƏT izləməyəcək, bu zaman üzərimizə böyük məsuliyyət düşür.” – deyə QHT rəhbəri açıqlamasında qeyd edib.

Elçin Məmməd həmçinin, bildirib ki, layihənin məqsədi Parlament seçkilərinə vətəndaşların ictimai nəzarətini artırmaq və seçkilərin beynəlxalq standartlara uyğun keçirilməsini təmin etməkdir. "Azərbaycanda keçiriləcək Parlament seçkilərində demokratikliyi, ədalətliliyi və şəffaflığı təmin etmək məqsədi ilə müşahidəçilik missiyasını təşkil edəcəyik. Ölkənin 13 regionunda fərdi müşahidəçilərin maarifləndirilməsi yolu ilə Parlament seçkilərində müşahidənin gücləndirilməsinə və onun effektivliyinin artırılmasına yardım göstəriləcək. Müşahidəçilərin bacarıqlarının artırılması nəzərdə tutan təlimlər təşkil ediləcək. Bundan əlavə, müşahidəçilər üçün yaddaş kitabçaları, təlimatlar nəşr ediləcək.” – deyə hüquq müdafiəçisi əlavə edib.

E.Məmməd onu da bildirib ki, 450 seçki məntəqəsi olmaqla, 21 seçki dairəsində seçki prosesində müşahidəçilik missiyası yerinə yetiriləcək. Həmçinin, Ukraynanın Beynəlxalq Siyasi Təhsil Mərkəzi və Kiyev Beynəlxalq Sosiologiya İnstitutu QHT-nin bu sahədəki fəaliyyətinə yaxından dəstək olacaqlar.

Xeberle.com