42 saylı Sumqayıt ikinci seçki dairəsindən deputatlığa namizəd, Azərbaycan Demokratik İslahatlar Partiyasının Qadınlar şöbəsinin Sədri, "Qadın Liderliyi Uğrunda" İB-nin sədr müavini, jurnalist Nərmin Ramiz qızı Şamilova ilə fəaliyyəti və seçki prosesi haqqında söhbət etdik.
Tanıtım: Nərmin Şamilova 20 fevral 1987-ci ildə Sumqayıt şəhərində anadan olmuşdur. İbtidai təhsilinə 22 saylı orta məktəbdə başlamış, 2005-ci ildə Sumqayıt şəhər 35 saylı orta məktəbi, 2010-cı ildə Bakı Slavyan Universitetinin Rus dili və Ədəbiyyatı fakultəsini bitirmişdir.Universitetdə təhsil aldığı müddətdə universitetdaxili fəaliyyət göstərən Tələbə Teleradio Studiyasında və müxtəlf televiziyalarda çalışmış, təhsilini başa vurduqdan sonra isə bir çox KİV-lərlə əməkdaşlıq etmiş, televiziya proqramlarında aparıcı və müxbirlik etmişdir. Daha sonra " Qarant Sigorta " Şirkətində çalışmış, 2012-ci ildən isə Azərbaycan Avropa Hərəkatında layihə koordinatoru kimi fəaliyyət göstərmişdir. 2013-14-ci illərdən Azərbaycan Avropa Hərəkatının Siyasi Partiyalar və Layihələrlə iş üzrə məsləhətçidir. Hazırda Azərbaycan Demokratik İslahatlar Partiyasının Qadınlar Şöbəsinin sədridir. 
Fəaliyyəti: Vətəndaş cəmiyyəti və siyasi fəaliyyətlə bağlı bir çox yerli və beynəlxalq layihələrin iştirakçısı, rəhbəri və təlimçisi olmuşdur. ( Gürcüstan, Türkiyə, Ukrayna, Polşa, Macarıstan, Litva, Latviya və s. )2012-ci il ATƏT və Azərbaycan Avropa Hərəkatının birgə layihəsi olan " Gənclərin İctimai - Siyasi Fəallığının Artırılması üzrə Regional Təlimlər " ində ekspert və təlimçi, həm də qeyri-rəsmi koordinatoru olmuşdur. Həmçinin ATƏT- in 2012-ci il seçki müşahidəçiləri üçün İstanbulda keçirilən təlimində iştirak etmiş və hazırda beynəlxalq müşahidəçilərin siyahısındadır.2013-cu ildə Azərbaycanda keçirilən prezident seçkilərində ATƏT-in beynəlxalq müşahidəçilərinin assistent və tərcüməçisi olmuşdur.2014-cü il Ukraynada keçirilən Prezident seçkilərində də beynəlxalq müşahidəçilik funksiyasını həyata keçirib.Macarıstanda keçirilən vətəndaş cəmiyyəti fəallarının görüşməsində iştirak etmiş və "Visegrad" fondunun dəstəyi ilə özünün "Sağlam Şəbəkə" ( fiziki qüsurlu insanların cəmiyyətə inteqrasiyası ) layihəsini icra etmişdir.Ölkələrarası əməkdaşıq və gənclər siyasəti ilə bağlı Litva respublikasina səfərlər edir: 2014-cü ilin oktyabr ayında Litva Xarici İşlər Nazirliyinin " Qadınların İnkişafının genişləndirilməsi " adlı konfransında, eləcə də 2015-ci ilin aprelində Vilnus Bələdiyyəsində keçirilən Gənclər Sammitində ölkəmizi təmsil etmişdir.Bir çox gənclər təşkilatı və vətəndaş cəmiyyəti ilə əməkdaşlıq edir, müxtəlif layihələrdə müntəzəm iştirak edir. Müxtəlif ölkələrdə yerləşən səfirliklərimizlə əlaqə saxlayır, ölkə təmsilçiliyi ilə bağlı tədbirlərdə iştirak edir. Siyasi fəaliyyəti ilə bağlı bir neçə ölkənin parlamentində olmuş və təcrübələr qazanmışdır. Subaydır, 28 yaşı var.

- Sumqayıt – Sizi bu şəhərə nə bağlayır?
- Adı və xatirələri. İlk növbədə burda doğulub, yaşamış, təhsil almışam. Orta məktəbin ilk siniflərindən  şəhərin bütün mədəni-maarif tədbirlərinin iştirakçısı və laureatı, yeniyetmə və gənclər  arasında keçirilən yarışmaların, mədəniyyət festivallarının qalibi olmuşam. İcra hakimiyyətinin keçirdiyi istənilən tədbirlərdə şəhərin nüfuzlu şagird və yeniyetmələrindən biri kimi iştirak etmişəm. Uşaqlıqdan "Kimyaçılar”, "Dostluq” "Nərimanov”, və s. kimi klublarla əməkdaşlığım olub. Musiqi-vokal sənəti ilə də bir müddət məşğul olmuşam, Sumqayıtımızı bir çox festivallarda uğurla təmsil edib, qalib adını qazanmışam. Sumqayıtda keçirilən uşaq və yeniyetmələrin yaradıcılıq festivali " ÜMİD-95/96 "-in qalibi olmuş və 1-ci yerə layiq görülmüşəm. O zamanlar populyar olmaq asan deyildi, televiziya və KİV-lər prosesi az işıqlandırırdılar. Sosial şəbəkə fəaliyyəti yox idi. Bəlkə də bu gün daha məşhur ola bilərdim. Təhsil aldığım 22 saylı orta məktəbin "Nümunəvi və Fəal” şagird adı fərqləndirməsiylə təltif olunmuşam. O vaxtdan 20 il keçib, xatirələr hələ də unudulmur.Daha sonra 11-ci sinifdə oxuyarkən və universiteti bitirdikdən sonra da Sumqayıt televiziyası olan "Dünya” TV ilə  əməkdaşıq etmişəm, müxtəlif proqramların aparıcısı olmuşam.Universitet həyatı və icitami fəallıq qismən məni Sumqayıtdan uzaqlaşdırdı, fəaliyyət sahəm daha da genişləndi, regionlar, ölkələr. Yaxın 3 il ərzində Sumqayıtın yerli ictimai-siyasi tədbirlərinə də qoşuldum, hazırdasa 42 saylı Sumqayıt 2-ci seçki dairəsindən deputatlığa ən gənc namizədəm.
- Sizcə bu göstəricilər seçicilərdə sizə qarşı namizəd olaraq rəğbət yarada bilir?
- Demək istəyirəm ki, mən bu şəhərin özüyəm. Sumqayıt şəhəri və sumqayıtlıların SƏSiyəm. Hesab edirəm ki, sakinlər gənclər şəhərinin gənc namizədi, gənc nəfəsindən səsini və dəstəyini əsirgəməz, arxa olarlar. Mən Sumqayıtımızn adını hər yerdə tanıtmışam: istər ölkədə, istərsə də ölkədən kənarda. Əksər əcnəbi dostlarımız Azərbaycan və mənimlə bağlı bu 3 adı əzbər bilirlər: Sumqayıt, Bakı və Qarabağ. Əslən Qarabağlı, Laçınlıyam. Amma Sumqayıtda doğulub, böyümüşəm. Həmçinin bir sakin kimi də Sumqayıtımızın problemli məsələlərini yaxşı bilirəm. Həmyerlilərimin - Sumqayıtlıların arasından çıxmış bir namizədəm və hər zaman da yanlarında olmaq istəyirəm.
-Yaradıcılığı siyasətlə əvəz etdiniz?
-Uşaqlıqdan bədii yaradıcılığa marağım olub və musiqi, rəqs, rəssamlıqla məşğul olmuşam. Güclü maliyyə dəstəyim olsaydı bəlkə də bu gün səsim daha yaxşı yerlərdən gələrdi. Amma çətinliklər bizi daha da mübariz və möhkəm edir. Bu üzdən heç vaxt ruhdan düşmürəm. Yaradıcılığı siyasətlə əvəz etmədim. Mədəniyyət özü də siyasətin bir hissəsidir. Sadəcə orta məktəbi bitirdikdən sonra yaradıcılığa ara verib, özümü digər sahələrdə də inkişaf etdirməyə başladım. Hazırda həvəskar idmançıyam və yaradıcılıq hobbimdir.Uşaqlıqdan isə jurnalistikaya marağım olub, televiziyada diktor olmaq istəmişəm. Elə belə də oldu. Müxtəlif  televiziya və radiolarda aparıcılıq etmiş, KİV - lə çalışmış, ara-sıra məqalə və hekayələrimi dərc etdirmişəm. Amma televiziya mühitindəki boşluqlar da məni bu sahədən uzaqlaşdırdı və ictimai-siyasi sferaya keçdim. Hazırda da jurnalistika fəaliyyətini davam etdirir, sosial mediada beynəlxalq səfərlərdən hazırladığım məqalələrimi və hekayələrimi paylaşıram.  Həmçinin jurnalistikayla bağlı yerli və beynəlxalq proqramlarda iştirak edib, təcrübəmi artırmağa çalışıram. Siyasətə ilk addım QHT və İB-lə əməkdaşlıq oldu. İstiqamət: Təhsil, Gənclər və Qadınlar, Mədəniyyət və İnteqrasiya siyasəti. Elə təmsil etdiyim və namizədi olduğum Demokratik İslahatlar Partiyasının da əsas məqsədləri bunlardır. Partiyanın Qadınlar şöbəsinin sədriyəm, biz mübarizəmizi sivil yolla, gənclərə və qadınlara təhsil vermək, qadınların ictimai-siyasi rolunu gücləndirməklə, mədəniyyətlərarası dialoqa önəm verməklə və islahatlar aparmaqla nail olmağa çalışırıq.
-Sumqayıtda yaşayır, Bakıda çalışır və daim səfərlərdə olursunuz. Qadın olaraq yorucu deyil ki, kilometrləri qət etmək?
-Bakı-Sumqayıt yolunu nəzərə almasaq, hər şey qaydasındadır. Tixaclarda itirdiyimiz enerji və zamanı daha faydalı işlərə sərf etmək olar. Səfərlər isə həyatımın ən önəmli və uğurlu hissəsidir. Sualın qadın olmaq məqamına gəlincə, xatırladım ki,istənilən məqamda daha möhkəm dayanan və mübariz olan elə məhz qadınlardır.Səfərlərim ilk öncə təlim-layihələrlə daha çox bağlıydı, hazırdasa seçkilər və fərdi əlaqələr. Bildiyiniz kimi, mən həm də seçkilərdə beynəlxalq müşahidəçiyəm.  Bir çox səfər və əməkdaşlıqlarım da bu proseslərdə yaranıb. Bunlardan ən uğurlusu Litva respublikası ilə yaranan əməkdaşlıqdır, Azərbaycanda keçirilən prezident seçkisi zamanı beynalxalq müşahidəçilər və  Litva XİN-nin əməkdaşı ilə ölkələrarası dostluq münasibətinin genişəndirilməsi istiqamətində addımlara başladıq. Həmçinin ölkəmizin Litvadaki səlahiyyətli səfiri cənab Həsən Məmmədzadə də bu istiqamətdə gənclərimizə çox böyük dəstək olur. Eləcə də digər ölkələr: Polşa, Macarıstan, Ukrayna, Gürcüstan və Türkiyəyə də səfərlər edir, ölkələrarası gənclər siyasəti çərçivəsindəki əməkdaşlıqları gücləndirməyə çalışıram. Bizim bir məqsədimiz var: Müstəqil, Demokratik və İnkişaflı Azərbaycan naminə çalışmaq. 
-Sizcə seçicilər uğurlu namizədi parlamentə göndərə bilmək üçün hansı amilləri nəzərə almalıdırlar?
-Millət vəkili anlayışına əksəriyyət dar çərivədən yanaşır: kommunal problemləri həll edən və qismən siyasi bacarıqları olan. Əslindəsə millət vəkili bundan əlavə ölkəni və problemlərini dünya ictimaiyyətinə də çatdıra bilməlidir, bunun üçün diplomat bacarığı və dil bilgiləri olmalıdır ki, hər hansı bir ölkədə dövlətin xeyrinə çıxışlar edə bilsin. Torpaqlarımızın işğaldan azad olacağına çalışacağımız halda rus dilində belə fikir səsləndirə bilmiriksə, 1 milyon məcburi köçkünün istəyini, haqq səsini dünya ictimaiyyətinə necə çatdıra biləcəyik? Namizəd yoldaşlarımızın əksəriyyəti fəaliyyətini yalnız seçki ərəfəsində gücləndiriblər, seçicilər bu amilllərə diqqət yetirməlidirlər. Plakat və platformalar  namizəd haqqında rəy yarada bilməz. Namizəd seçicilərlə canlı təmas və çıxışından, seçkiyə qədərki uğurlu fəaliyyətindən bəlli olar.
- Bəs namizəd olaraq seçkidə öz şansınızı necə dəyərləndirirsiniz?
- Şansımın azlığı yalnız maliyyə resurslarımın az olmasıdır.  Bu üzdən namizədlər plakat və platfomaları, sosial mediadakı təbliğatları ilə tanınırlar, əslindəsə heç bir gənc namizədin mənimki qədər zəngin avtobioqrafiyası yoxdur. Həmçinin dil bilgilərim və diplomatik bacarığım var, dövlətimizi, şəhərimizi beynəlxalq arenada uğurla təmsil edə bilərəm. Sumqayıtdakı gənc namizədlər arasında fəaliyyət sahəsi geniş olan və rus-ingilis dillərində sərbəst danışa bilən yeganə namizədəm. Seçicilərin dediyinə görə, Sumqayıt tarixində ilk dəfə olaraq sakinlərlə yaxından təmas qurub, görüşlər keçirən və çıxışlar edən yeganə gənc və qadın namizədəm. Hesab edirəm ki, sakinlər bunu nəzərə alıb, dəstək və SƏSlərini gəncliyin SƏSinə verərlər, gənclər şəhərinin namizədi onları hər yerdə təmsil edə biləcək bir gənc olmalıdır, inkişaf  üçün, rifah üçün. 
Xeberle.com      

Xəbərdən istifadə edərkən istinad etmək vacibdir.