Tanınmış reper Anar Nağılbaz «Real» Hərəkatına qoşulub. Bu barədə  Gundeminfo.az-a daxil olan məlumata əsasən bu gün hərəkatın Reportyorların Azadlıq və Təhlükəsizlik İnstitutunda keçirdiyi mətbuat konfransında tanınmış reper orada təsadüfi iştirakçı kimi yox, təşkilatçı kimi iştirak edib. Mətbuat konfransı başa çatmamış reper tədbiri tərk etdiyinə görə ondan hərəkata qoşulub-qoşulmaması barədə münasibət öyrənmək mümkün olmayıb. Lakin hərəkat üzvlərinin verdiyi məlumata əsasən reper hərəkatın fəal üzvlərindən biri kimi «Real»ın partiyalaşma prossesində iştirak edəcəyini bəyan edib.

Xatırladaq ki, Anar Nağılbaz uzun müddət şou-biznesdən kənarda olub. Bir həftə əvvəl isə reperin müəllifi olduğu etiraz üslubunda  klipi sosial şəbəkələrdə yayılıb. Qeyd edək ki, A.Nağılbaz sabiq millət vəkili Rizvan Cəbiyevin oğludur. 2010-cu ildə R.Cəbiyev hakim Yeni Azərbaycan Partiyasının siyahısı ilə deputatlığa namizəd ola bilməyib. R.Cəbiyev 2 dəfə Kürdəmir rayonundan millət vəkili seçilib. Sonuncu seçkilərdə isə Cəbiyev namizədliyini irəli sürməyib. Sabiq deputatın oğlunun «REAL» Hərəkatına qoşulması deputatın hakim düşərgədən narazı olduğuna bir mesaj kimi qiymətləndirilir.