“Baş nazirin Müdafiə Nazirlyiinə gedib nazir və yüksək rütbəli hərbçilərlə görüşməsi tez-tez baş verən hal deyil. Xüsusilə də Ermənistan-Azərbaycan sərhədində atəşkəsin intensiv, gün ərzində 200 dəfədən çox pozulması halalrının qeydə alınması kontekstində diqqəti cəlb edən məsələdir”.

Bu fikirləri AzVision.az-a açıqlamasında politoloq Elman Nəsirli baş nazir Artur Rəsizadənin Müdafiə Nazirliyində keçirdiyi görüşü şərh edərkən deyib. 

O bildirib ki, bu görüşə Ermənistan mətbuatı da ciddi yer ayırıb: “Onlarda da həyəcan, gərginlik var ki, hər halda ölkənin baş naziri müdafiə naziri və hərbçilər görüşübsə, bu, sıradan görüş ola bilməz. Bu, ciddi mətləblərdən xəbər verir. Hesab edirəm ki, onların narahatlığı üçün əsas olmalıdır. Çünki Azərbaycan sərhədini eyni zamanda Dağlıq Qarabağın təmas xəttində atəşkəsin pozulması halları Azərbaycan tərəfdən cavab reaksiyası doğurur və bu reaksiya getdikcə kəskinləşə bilər. Hadisələr getdikcə başqa məcrada inkişaf edə bilər. Bunlar onu göstərir ki, istənilən halda müharibə versiyası nı gündəmdən çıxarmaq olmaz”.

Proseslərin müharibədən xəbər verib-vermədiyinə gəlincə isə Elman Nəsirli bunları deyib: “Atəşkəs rejimi bu şəkildə pozulursa, bu, hadisələrin müharibə ssenarisi üzrə inkişafına müəyyən siqnallardır. Buna görə də həmsədrlər əl-ayağa düşüblər, bu, onların verdiyi bəyanatda da öz əksini tapıb. Sözün həqiqi mənasında bu gün münqaişənin həlli ilə bağlı gərgin hal yaşanır. Nəzərə alsaq ki, fevralda prezidentlər səviyyəsində görüş planlaşdırır, belə olan təqdirdə hadisələrin mürəkkəb ssenari ilə inkişafı regiondakı vəziyyəti kökündən dəyişə bilər. Bu il mayın 12-də atəşkəsin 20 illiyi olacaq. Bu baxımdan atəşkəs rejimi bütövlükdə dəfn oluna bilər. Ona görə də, baş nazirin müdaifə nazirliyində keçirdiyi görüşdə ciddi ismarıclar var. Görüşün detalları açıqlanmasa da, məlumdur ki, bu görüş cəbhədəki gərgin vəziyyətdən qaynaqlanır və burada ciddi məsələlər müzakirə olunub”.