Modern.az-ın “Siyasilərin elmi fəaliyyəti” rubrikasında növbə Azərbaycan Demokratik Partiyasının sədri, ixtisasca həkim Sərdar Cəlaloğludur.

Fəlsəfəyə dərin maraq göstərən Sərdar Cəlaloğlu “Mahiyyət” adında fəlsəfi traktat yazıb. Özünün dediyinə görə, “Mahiyyət” Azərbaycan fəlsəfə tarixində ilk fundamental əsərdir.

 – 1994-cü ildə insanın mahiyyəti haqqında “Mahiyyət” adlı yeni fəlsəfi traktat yazıb Attestasiya Komitəsinin keçmiş sədri rəhmətlik akademik Azad Mirzəcanzadəyə oxumaq üçün verdim. Əsasnaməyə görə, mənə birbaşa elmlər doktoru adını vermək istəyirdi. O vaxt bir kitaba görə namizədlik yaxud doktorluq dərəcəsini almaq olurdu. Dedim ki, müxalif adamam, burada elm də siyasiləşdirilib. Mənə birbaşa elmlər doktorluğunu heç kim verməz. Azad Mirzəcanzadə dedi ki, o, mənim problemimdir, Prezident Aparatı ilə danışaram. Azərbaycan elmində fəlsəfə tarixində bu cürə fundamental əsər hələ rast gəlmədim. O vaxtı akademik Cəmil Əhmədli “Xalq qəzeti”ndə mənim traktatımla bağlı böyük bir məqalə yazdı və orada bildirdi ki, Sərdar Cəlaloğlu Azərbaycanda fəlsəfi dili yaradıb. Bu məqalə böyük diskussiyalara səbəb oldu. Dedilər ki, necə olur ki, bu qədər akademiklər qala-qala Azərbaycan fəlsəfə dilini sərdar Cəlaloğlu yaradır. Cəmil Əhmədli onlara başa saldı ki, bu, elmi yox, fəlsəfi dildədir.

Sərdar Cəlaloğlunun sözlərinə görə, ilk əsəri 1994-cü ildə türkəçarəyə aid olub və düz yüz min tirajla çap olunub: “1994-cü ildə tibbi-etnoqrafik bir əsərim çıxmışdı. Bu kitab da çox böyük rezonans yaratdı. Həmin kitabda hətta türkəçarənin tibbi xarakteristikası ilə yanaşı onun etnoqrafik təhlilini də vermişdim. Naxçıvanda əldə etdiyim materiallar əsasında təcrübələr aparmışdım”.

ADP sədrinin ən böyük yaradıcılığı otuzillik araşdırmalarının nəticəsi olan 3500 səhifəlik, üç cildlik əsərdir: “Bəşər tarixinin mahiyyəti haqqında üç cildlik əsər yazdım. Adı “İlahi mahiyyət”dir. Onların çapı üçün böyük məbləğ lazım olduğundan hələ ki, qalıb. Bu əsəri yazarkən üç minə yaxın ədəbiyyatı tədqiqat işinə cəlb etdim. Onlardan 450 nəfəri müxtəlif sahələrdə Nobel mükafatı alan, müxtəlif kəşflərə imza atan insanlara məxsusdur”.

2003-cü ildə həbsxanaya düşəndə də Sərdar Cəlaloğlu bekar qalmayıb. “Altı ay tək adamlıq kamerada qaldım. Heç kimlə ünsiyyətdə olmadım. Orada mən qısa aforizmlərimi yazdım. Dünyanın bir çox filosofları yalnız aforizm yazmaqla filosof olublar. Mən də filosof ola-ola aforizmləri yazdım və həyat yoldaşım elə mən orada olanda kitabı çap etdirdi.

Məni həmişə bir məsələ düşündürürdü: Mütləq həqiqət niyə yoxdur? Bu məni çox düşündürürdü odur ki, mütləq həqiqət barəsində “kondisologiya” adlı elm yaratdım. Mütləq həqiqətə çatmaq olarmı? Əgər olarsa, bu hansı üsulla hansı qanunauyğunluqlarla baş verir kimi suallarına cavab tapmağa çalışdım. Kondisiologiyanı həm real həyat, həm də metafizika qanunlarına uyğun təhlil etməyə başladım. Əvvəlcə metafizikanı daha dərindən araşdırdım və onun hər dörd sahəsinə aid kitab yazdım.

S. Cəlaloğlu iddia edir ki, o, Eynşteynin nisbilik nəzəriyyəsinin bəzi “çatışmazlıqları”nı üzə çıxarır: “Kainatın Allah tərəfindən yaradılması məsələsinə ən yaxın olan Eynşteyn olsa da, sonradan ondan yayınıb. Buna səbəb də onun Aristotel məntiqi ilə düşünməyi idi. Fəlsəfi qanunlar əsasında Eynşteynin fəlsəfi qanunlar nəzəriyyəsini tənqid etdim. Oradakı səhv olan məqamları nəzərə alandan sonra özümün Mütləqilik nəzəriyyəmi ortaya qoydum. Zaman və məkan bir birini şərtləndirməyəndə tamamilə fərqli ölçülər sistemi əmələ gəlir. Eynşteynin də nisbilik nəzəriyyəsində var ki, işıq sürəti ilə yarım sürətlə hərəkət zamanı bir dəqiqə kosmik surətlə hərəkətin 1000 ilinə bərabərdir. Mən bu ölçülər sisteminin yanlışlığını kifayət  qədər elmi əsaslarla inkar etdim. Fizikanın üç əsas qanunlarından kinematika yəni hərəkətin trayektoriyası, dinamika – Nyuton fizikası və astrofizikanı qarşılıqlı şəkildə əlaqələndirərək elmi əsaslarla metafizikadan kosmosa keçidin prinsiplərini ortaya qoydum. İdeyanın materiyaya  çevrilməsinin sirrini dedim. Bunu Elmlər Akademiyasının prezidenti Akif Əlizadəyə şəxsən özüm təqdim etmişəm. Bundan başqa, onu Müəlliflik Hüquqları Agentliyinə təqdim edib müəlliflik şəhadətnaməsi almışam. Həm də İranda Nobelə alternativ olan Mustafa mükafatına təqdim etmişəm. Hələ ki bir cavab almamışam”.