İzmir Azərbaycan Qadınları Kültür Mərkəzi Dərnəyi Polis Evində Azərbaycan Cümhuriyyətinin 100 illiyi ilə bağlı tədbir keçirilib. Üç yüz nəfərin qatıldığı tədbirdə İzmirlə yanaşı Balıkəsir, Manisa, Bursa və digər şəhərlərdən də qonaqlar təşrif buyurub. MHP, AKP, CHP və İyi Partiyanın idarəçilərinin qatıldığı tədbirdə QHT nümayəndələri də iştirak edib.
Tədbirdə çıxış edən dərnək sədri Cəvahir Əhmədova bu özəl gündə Azərbaycanın yanında olub, Mustafa Kamal Atatürkün "Azərbaycanın dərdi dərdimiz, kədəri kədərimizdir” sözüylə yola çıxan hər kəsə təşəkkür edib. O, Azərbaycan və Türkiyənin hər zaman bir olduğunu, ilkin müstəqillik dövrlərində də, 1991-ci ildə müstəqilliyini yenidən bərpa etdikdən sonra da Türkiyənin Azərbaycanın yanında olduğundan söhbət açıb. C.Əhmədova bu gün müstəqil Azərbaycanla yanaşı Türkiyə sərhədləri olan, hər iki dövlətin sərhədlərinin keşiyində dayanam əsgərləri də xatırlayıb. "Bu gün burda rahatca anım, yubiley tədbirləri keçririksə, o əsgərlərin sayəsində edirik. Biz onlara çox şey borcluyuq. Bir ölkənin müstəqilliyini elan etmək qədər onu qoruyub saxlamaq da lazımdır. Və bu işin də ən çətin tərəfi əsgərlərimizin üzərinə düşür” deyən dərnək sədri bütün əsgərlərə salam göndərərək, Vətən uğrunda şəhid və qazi olanları da unutmayıb, ailələrinə xüsusi təşəkkürünü bildirib. C.Əhmədova 1918-ci ildə Şərqdə ilk qurulan Azərbaycan Demokratik Respublikasının qurucuları Məhəmmədəmin Rəsulzadə, Əlibəy Hüseynzadə, Cəmşid Naxçıvanski və digər mübarizləri də xatırlayaraq onların keçdiyi çətin həyatlarını anıb, hər birinin ruhu qarşısında borclu olduğumuzu qeyd edib. O, Azərbaycanın rus ordusu tərəfindən işğal edildikdən sonra milli azadlıq liderlərinin bir qisminin Türkiyəyə sığındığını, Atatürk tərəfindən onların layiqincə dəyərləndirildiklərini, bu gün İstanbuldakı "Feriköy” məzarlığında yan yana uyuyan o böyüklərimizin məzarlarının da bunu göstərdiyini xatırlatdı. "Bir kərə yüksələn bayraq, bir daha enməz" deyən Rəsulzadənin fikirlərini özünə bayraq edib həyatı boyu mücadilə edən Əbülfəz Elçibəy və silah yoldaşlarını hörmətlə anan xanım sədr 1991-ci ildə Azərbaycanın müstəqilliyini elan etdiyini, bundan sonra Azərbaycanın üzərində böyük dövlətlərin oynadığı oyunlara da diqqət çəkərək, 1993-cü ildə ölkənin müstəqilliyinin yenidən təhlükəylə üz-üzə qaldığını, o çətin günlərdə Heydər Əliyevin uzun bir aradan sonra siyasətə qayıdaraq ölkəni xilas etdiyinidə bildirdi. "Bizlər bəzi şeyləri unuda, ya da görmək istəməyə bilərik. Amma tarix nankor deyil. 100 il öncə olanları yazıb bizlərə çatdırdığı kimi, 100 il sonra ikinci müstəqillik dönəmimizdə olanları da yazıb xalqa çatdıracaq. Bu gün Azərbaycanın yenidən var olmasında əməyi olan Rəsulzadəni də, Elçibəyi də, Heydər Əliyev də, bu yolda verdiyimiz on minlərlə şəhidlərimizi sayğıyla anıram. Allah hamısına rəhmət etsin.
Balaca asena İrmak Gunerin Almas İldırımın "Əsir Azərbaycan” şeirini oxuması isə tədbir iştirakçılarını xeyli duyğulandırıb.
Tədbirdə çıxış edən jurnalist Nigar Ögeday da tarixə kiçik bir səyahət edərək bu günü bizlərə ərmağan edən liderləri sayğıyla anıb. Rəsmi hissədən sonra bayram havasına keçən tədbiri tanınmış sənətçilər milli musiqilərimizlə zənginləşdirib.
Xəbərdən istifadə edərkən istinad etmək vacibdir.
