Müsahibimiz aktrisa Xuraman Əlizadədir. Aktrisa bizimlə söhbətində yaradıcılığından söhbət açıb.

- Aktrisalıq istedadınız özünü necə biruzə verdi?

- Uşaqlıqdan aktrisa olmaq istəmişəm. Əslində daha çox rejissorluğa həvəsim olub. Məktəbdə müəllimlər adətən şagirdlərə gələcəkdə kim olmaq istədiklərini sual verəndə ki,qızlar ya müəllimə, ya həkim,oğlanlar isə polis, ya da hüquqşünas deyərdilər. Mən də hər zaman söyləyirdim ki, rejissor olacam. Bilmirəm bu həvəs məndə hardandır,atam da, anam da hər ikisi dövlət televiziyasının işçisi olub. Elə orada bir-birlərini görüb evləniblər. Bəlkə də mən anamın bətnində TV-də böyüyürdüm.Amma hər halda bugünki gündə arzularım çin olub.

-Simaca gülərüz bir xanımsınız.Amma mənə elə gəlir ki, bu simanın arxasında zəhmli bir xanım dayanıb.

-Yalnış fikirdir. Necə gülərüz görürsünüzsə eləyəm. Sadəcə məndə belə bir xüsusiyyət var, bəlkə də mənfi xüsusiyyətdir. Bəzən özümə qapılıram bəzən də qaşlarımı çatıram. Mənimlə üzbəüz oturub danışan insanlarla söhbət edəndə fikrim onlarda olur, dinləyirəm, amma mənə deyirlər ki, bizə diqqət etmirsən. Mən onların dediklərini təkrar edə bilərəm.Amma mən həyatda da, səhnədə də eyni insanam.

- Bir aktrisa kimi sizin fərqliliyiniz nədədir?

- Mənim fərqliliyim mənim kilolu omağmdır.Yəni iki dolu bədən quruluşlu aktrisa var. Düzdür,Tünzalə xanım arıqlayıb,çəkisini aşağı salıb. Çox gözəl, buna sevinirəm. Digər məni fərqləndirən nəsə varsa onu tamaşaçılar deyə bilər.

- Hazırda "Miras"serialında çəkilirsiniz.Oynadığınız obrazla oxşarlığınız var, yoxsa obraz xatirinə bu seriala çəkilirsiniz?

- Amma Sayalı ilə Xuraman arasında yerlə-göy qədər fərq var. Tamam başqa insanlardır. Mən orada rayondan gəlmiş bir qadını oynayıram. Özümüz əslən Bakılıyıq. Sayalı obrazı təklif olundu, mən də oynadım.Nə dərəcədə öhdəsindən gəlirəm, onu tamaşaçılar bilər.

- Əgər sonda miras sizə qalsa nə edəcəksiz?

- Filmdə qalsa, heç nə edə bilməyəcəyik. Amma həyatda qalsa, çox sevinərdim. Möhtəşəm bir evim olardı. Kim istəməz ki, geniş evi olsun, istədiyi kimi qonaqlarını qarşılasın. Həyatda elə bir miras qalsaydı dünyanın xoşbəxti olardım.

-İndiki gənc aktyorların oyunu sizi qane edirmi?

- İndiki gənc aktyorların oyunu barəsində mənim söz deməyə haqqım çatmır.Çünki mən bu sənətdə yetərincə sözünü demiş aktyorlardan deyiləm. Əgər gənc,teatr aktrisasıdırsa, İncəsənət Universitetinin tələbəsidirsə alqışlayacam.Çox səmimi bir insanam,özümü tərifləməyi sevmirəm. Heç kəs anasının qarnında öyrənməyib ki? Amma mənə yer edən, bu sənətdən başı çıxmayan,teatrdan anlayışı olmayan insanların seriallarda, filmlərdə görsənməsidir. Əlbəttə onlara qarşı fikrim mənfidir. Amma aktyorluq qabiliyyətinə malik olan, sırf bu sənəti seçmiş gənclərə münasibətim çox gözəldir.

- Bu sənətdə dostlarınız çoxdur, yoxsa düşmənləriniz?

- Dostlarım bir ara çox idi. Sözün düzü hamısını ələkdən keçirtdim.Və gördüm ki, bu həyatda insanın dostu atasıdır, anasıdır, ailəsidir. Bu günki gün mənim sırf dost deyəcəyim insan yoxdur. Tam səmimi deyirəm.Var tanışlarım, dostluğa yaxın insanlar. Məni sevməyən insanlar ola bilər. Amma heç kimi ilə düşmənçiliyim yoxdur. Çünki həyatda elə bir qəbahət iş görməmişəm.

- Aparıcı kimi də fəaliyyət göstərirsiniz. Həm aktrisalıq, həm aparıcılıq sizi yormur ki?

- Əsla. Əslində mən qaçhaqaçla keçən, enerji dolu həyatı sevirəm.Duzdur, bəzən olur, həm aparıcılığı, həm də aktrisalığı bir arada çatdıra bilmirəm, amma heç bir teatrda fəaliyyət göstərmədiyimdən işlərimi uyğunlaşdıra bilirəm. İndi yalnız "Miras"serialına çəkilirəm. Bir də toylarda, məclislərdə çox oluram. Adrenalin alıram. Bir sözlə, sevirəm belə həyatı.

- Sizi son vaxtlar Sumqayıtda tez-tez görürük. Xuraman xanım, sizi Sumqayıta bağlayan nədir?

- Məsələ burasındasır ki,məni Sumqayıta bağlıyan toy şənlikləri, xına məclisləri və bir çox tanışlarımın sumqayıtlı olmasıdır. Əslində Sumqayıtı çox sevirəm. Həddindən artıq çox sevirəm. Bəlkə də mənim bu cavabımı səmimi qəbul etməyəcəksiniz. Anam da mənə deyir ki, bütün günü Sumqayıtdasan, bir ev al yaşa orada. Sumqayıt tıxacsız şəhərdir, sakit şəhərdir. Sumqayıtda olanda mən özümü doğma yerdə,doğma insanların arasında hiss edirəm.

Zeynəb Abdullah

Xeberle.com