Sumqayıt şəhəri, 10-cu mikrorayon, ev 21, mənzil 77-də yaşayn Tahir Babayev fərdi evinə qaz xətti çəkilmədiyi üçün şikayətçidir. T.Babayev bildirib ki, yaşadığı "Sumqayıt bağlar” yaşayış massivinə 2013-cü ildən qaz xətti çəkilsə də müxtəlif bəhanələrlə onun ünvanı qaz təchizatı ilə təmin olunmur:

"Mənim də yaşadığım bağ sahəsinə qaz xətti çəkilsin deyə çoxlu sayda müraciətlər etdim. Əvvəlcə bildirirdilər ki, vəsait yoxdur, material verilmir, işçilər əmək haqqı alımır və s. Lakin sonuncu müraciətimə cavab olaraq bildirdilər ki, ünvanımız layihədən kənarda qalıb. Buna görə də şəbəkəyə qoşulmaq üçün ödənişli qaydada texniki şərti almalı, xəttin çəkilişini və s. tələb olunan işlərin görülməsini öz hesabımıza həyata keçirməliyik. Yalnız bundan sonra ünvanımıza kod açıla və abonent kimi qeydiyyata alına bilərik.

Aidiyyatı orqanlardan xahiş edirəm ki, yaşadığım ünvan heç bir şərt qoyulmadan qaz təchizatı ilə təmin olunsun”.

Qeyd edək ki, vətəndaşın şikayəti ilə bağlı "Azəriqaz” İstehsalat Birliyindən bildirilib ki, fərdi evin qazlaşdırılması bu sahədə icazəsi (lisenziyası) olan podratçı təşkilat tərəfindən vətəndaşın şəxsi hesabına yerinə yetirilməlidir. Fərdi yaşayış evlərində quraşdırılan "G-4” tipli məişət qaz sayğacları "Azəriqaz” İstehsalat Birliyinin vəsaiti hesabına təmin edilir. 

Ekspertlər də bildirirlər ki, fərdi evlərin qazlaşdırılması dövlət proqramında nəzərdə tutulmayıbsa, vətəndaş öz vəsaiti hesabına fərdi yaşayış evini qazlaşdırmalıdır. Bu fəaliyyət də yalnız lisenziyası olan tikinti şirkətləri tərəfindən həyata keçirilir. Tikinti şirkətlərinin adlı siyahısı bütün "Asan Xidmət" mərkəzlərində var. Həmçinin, yerli qaz istismar sahəsinin giriş hissələrində və ya foyesində həmin şirkətlərin adlı siyahısı asılıb. Lakin eyni zamanda istənilən lisenziyası olan podratçı şirkətlə vətəndaş müqavilə bağlayaraq fərdi evinin qazlaşdırılmasına nail ola bilər. Ev sahibi ilə tikinti şirkəti arasında razılaşma olduqdan sonra həmin şirkət texniki şərti və layihə smeta sənədlərini hazırlayıb "Azəriqaz"a göndərir. Bundan sonra təşkilatın nümayəndələri həmin evə gedərək çəkilmiş qaz xəttinə texniki baxış keçirir və   qanunauyğundursa, vətəndaşla müqavilə bağlayıb, sayğaca plombunu vuraraq kartı təqdim edir və həmin fərdi ev qazla təmin olunur. Fərdi yaşayış evi üçün qaz sayğacı "Azəriqaz" tərəfindən pulsuz verilir.
musavat.com