Canlanır hər qarış çöl Sumqayıtda,

Xarüqələr yaradır el Sumqayıtda!

Mahnı hamıya tanışdır yəqin ki. Bu gün isə Sumqayıtda camaat canlanmır, canlılar da ölüyə dönüb.
Hərdən Sumqayıt uşaqlarına ürəyim ağrayır. Hər gün bir parça çörəkdən ötrü saatlarla səhər-axşam Bakı-Sumqayıt yolunda tıxacda çürüyürlər. Səhər 6-da evdən çıxırlar ki, amanın günüdür saat 9-da işdə ola bilsinlər. Bir vaxtlar nənəm deyərdi ərsizlərə ər, yersizlərə yer olub Sumqayıt. Kimin əri ölərdi, kim yetim qalardı gələrdi Sumqayıta ev-eşik sahibi, iş-güc yiyəsi olardı. Bu gün isə kasıbçılıqdan əziyyət çəkir bu şəhərin sakinləri. Düşmüşük ucqar rayonlarda olan erkən nikahların, boşanmaların üstünə... İşsizlik və kasıbçılıqdan məhkəmələrdə qalaq-qalaq, bir-birinin ətini yeyən problemli ailələrin işləri var. Bir ekspert kimi məhkəmə işlərinin əksəriyyətinin banklara borcu olanların, boşananlarla bağlı olduğunun şahidi olmuşam. Vur-tut Sumqayıtda bir əməlli-başlı ticarət mərkəzi var idi. Camaat "Karvan” ticarət mərkəzində alver edib başını saxlayırdı. Oranı da elə iki gündən bir yandırırlar...
Hərdən papağımızı qoyaq qabagımıza fikirləşək ki, Azərbaycanın üçüncü böyük şəhəri, Bakının qapı qonşusu olan, ən çox şəhid verən, ən savadlı uşaqlar yetişdirən, idmanımıza çempionlar bəxş edən şəhərdir Sumqayıt.

Sumqayıt uşaqlarının diliylə desək buranın "yetimlərini” lap yetim qoymayaq.

Sumqayıtda iş yerləri açın ki, bu "yetimlər” bir tikə çörək üçün tıxaclarda ömrün-günün keçirməsin, ailələr dağılmasın. Heç olmasa insan kimi yaşamağa da imkanları olsun.

Ərsizlərə ər, yersizlərə yer ənənəsi pozulmasın.