Bu gün səhər saatlarında Bakının Heydər Əliyev prospektində, metronun "Koroğlu” stansiyasının yaxınlığında asma körpü üzərində özünü atmaq istəyən şəxsi baş nazir Novruz Məmmədov fikrindən daşındırıb. 

Adı çəkilən yerdə artıq neçənci dəfədir ki, intihara cəhd edilir və hər dəfə də tanınmış şəxslər tərəfindən həmin adamlar son anda intihar etməkdən xilas edilirlər. Əgər yadınızdadırsa, bir neçə il bundan öncə həmin körpüdə intihara cəhd edən başqa bir şəxsi millət vəkili Qənirə Paşayeva fikirindən daşındırmışdı. 

Bəs insanların intihar etmək üçün hündür yerlər seçməsinə səbəb nədir?

Xeberle.com xəbər verir ki,"Humel” Psixologiya Mərkəzinin sədri, psixoloq Taryel Faziloğlu Moderator.az-a açıqlamasında bildirdi ki, intihar etmək üçün insanların hündür yer seçməsi əzab çəkməmələri ilə bağlıdır:

"İnsanlar intihar etmək üçün hündürlüyü ona görə seçirlər ki, bir anlıq ölsünlər, yəni hadisə baş verdikdən sonra sağ qalıb ağrılardan əzab çəkməsinlər. Hündürlükdən insan düşəndə ani ölüm olur və insan əzab çəkmədən ölür. İnsanların hündürlüyə çıxması ağrı qorxusundandır. İnsan özünü ona görə hündürlükdən atır ki, ağrı olmadan dünyasını dəyişsin. İkinci bir səbəb isə insan intihar etdikdən sonra sağ qalaraq şikəst qalmaması üçün hündürlüyü seçir”.