2014-cu il dekabrın 26-da cəbhənin Ağdam rayonu istiqamətində qoşunların təmas xəttini keçən erməni kəşfiyyatçı Baqdasaryan Arsen Eduardoviçin cinayət işi üzrə keçirilən məhkəmə prosesi başa çatıb.
Bu gün Gəncə Ağır Cinayətlər Məhkəməsində hakim Elbəy Allahverdiyevin sədrlik etdiyi prosesdə hökm oxunub.
Hökmə əsasən, Arsen Baqdasaryan cəzasını ciddi rejimli cəzaçəkmə müəssisəsində çəkməklə 15 il müddətinə azadlıqdan məhrum edilib.
Xatırladaq ki, dünən keçirilən məhkəmə prosesində çıxış edən dövlət ittihamçısı Anar Mirkişiyev A.Baqdasaryanın cəzasını ciddi rejimli cəzaçəkmə müəssisəsində çəkməklə 18 il müddətinə azadlıqdan məhrum edilməsini istəmişdi.
Qeyd edək ki, məhkəmədə son söz deyən Arsen Baqdasaryan Azərbaycanla sülh şəraitində yaşamaq istədiyini vurğulayıb.
"Ermənistan hökuməti anlamır ki, bunun üçün Qarabağı qaytarmaq lazımdır, başqa cür sülh şəraitində yaşamaq mümkün deyil. Ermənistanda hamını aldadırlar. Bizi Azərbaycana nifrət hissi ilə böyüdüblər. Bağçada, orta məktəbdə - hər yerdə bizdə azərbaycanlılara qarşı nifrət yaradırlar. Lakin burada nifrət dolu nəsə görmədim. Azərbaycanlılar qatil deyillər. Elə olsaydılar, məni öldürərdilər. Ancaq baxın, öldürməyiblər, hətta heç bir işgəncə də görmədim”. (publika.az)
