Sumqayıt Dövlət Universitetində (SDU) "Heydər Əliyev və Azərbaycan gəncliyi” mövzusunda "dəyirmi masa” təşkil olunub.

SDU-nun mətbuat xidmətindən bildirilib ki, universitetin prorektoru, dosent Nizami Namazov tədbiri açaraq Azərbaycan gənclərinin müasir, inkişaf etmiş, yüksək intellektli aparıcı qüvvə kimi formalaşmasında dövlətimizin apardığı gənclər siyasətinin mühüm rolunu diqqətə çatdırıb. Qeyd edilib ki, ulu öndər Heydər Əliyevin gənclər siyasəti əsrlər boyu xalqımızın malik olduğu milli mənəvi dəyərlər əsasında, müstəqillik, dövlətçilik, azadlıq və onların qorunması uğrunda mübariz ruhlu gənc nəslin yetişdirilməsindən ibarət olub.

Universitetin Tələbə Gənclər Təşkilatının sədri Elvin Gülməmmədov bildirib ki, ulu öndər Heydər Əliyev həmişə gənclərə güvənərək onlara böyük etimad göstərib. Azərbaycanda gənclər siyasəti bu gün dövlət siyasətinin əsas tərkib hissəsi kimi xüsusi yer tutur. Gənclər dövlətin diqqət və qayğısını hər zaman öz üzərlərində hiss edirlər.

Tədbirdə çıxış edənlər diqqətə çatdırıblar ki, ulu öndər Heydər Əliyev tərəfindən əsası qoyulan gənclər siyasətinin məqsədi yeni nəslin fiziki, mənəvi-psixoloji cəhətdən sağlam yetişməsindən, istedadlı gənclərin üzə çıxarılmasından və onların ölkənin gələcəyinə töhfə verməsindən ibarətdir. (azertag.az)