Azərbaycanda keçiriləcək növbədənkənar parlament seçkilərinə sayılı günlər qalıb və təbii olaraq seçkilər hazırda ölkənin əsas gündəm mövzusudur. Mandat əldə etmək üçün seçkilərdə iştirak edəcək namizədlər arasında siyasi partiyaların bir sıra üzvü var. Bəzi partiya liderləri seçkidə iştirak etməsələr də, təşkilatın digər üzvləri namizəd kimi irəli sürülüb.
Təsadüfi deyil ki, növbədənkənar parlament seçkilərinin budəfəki mərhələsində Sumqayıt üzrə yeni simalara da rast gəldik.
Xeberle.com-un məlumatına görə, 43 saylı Sumqayıt ikinci seçki dairəsi üzrə namizədliyi qeydə alınanlar arasında partiya nümayəndələri, pensiyaçı, vəkil, fərdi sahibkar, kinorejissor, təhsil və dövlət işçiləri var.
"Müsavat" partiyasından namizədliyi irəli sürülən, pensiyaçı 73 yaşlı Cavad Cavadlı, Haqq Ədalət Partiyasını təmsil edən 5 nömrəli Zəngilan məktəbinin əməkdaşı Anar Hüseynov, demək olar ki, bütün seçkilərdə iştirak etmiş Vətəndaş Həmrəyliyi Partiyasının sədr müavini Yusif Salmanlı və Vəhdət partiyasının sədr müavini Vasif Əfəndiyevin seçilmə şansının az olduğu proqnozlaşdırılır.
Abbaslı Nərmin İkram qızı - bu dairədən namizədliyini verənlər arasında ən gəncidir. 30 yaşlı Nərmin "Ağ Partiya"nın sədr müavini, partiya sədri Tural Abbaslının xanımı, eks "Musavat"lı deputat İkram İsrafilin qızıdır. Onu da qeyd edək ki, Nərminin atası İkram İsrafil bu dəfə də deputat olmaq istəyirdi. Belə ki, o, 45 saylı Sumqayıt dördüncü seçki dairəsindən namizədliyini irəli sürsə də, son anda namizədliyi qeydə alınmadı.
Rəqiblər arasında Sumqayıtda və müxalif cəbhədə nüfuza malik Klassik Xalq Cəbhəsi Partiyasının (KXCP) lideri Mirhahmud Mirəlioğlu da var. Adıçəkilən partiyanın sədri Mirmahmud Mirəlioğlu 1995-2000-ci illərdə 2-ci çağırış Milli Məclisin deputatı olub. Bu seçkilərdə də Mirmahmud Mirəlioğlunun əsas rəqiblə ciddi mübarizə aparacağı gözlənilir.
Milli Məclisə 5-ci və 6-cı çağırış deputat seçilmiş - hazırkı millət vəkili Tahir Mirkişili ötən seçkilərdə 42 saylı Sumqayıt ikinci seçki dairəsindən deputat mandatı qazansa da, indi namizədliyi bu dairədən irəli sürülüb. Milli Məclisin İqtisadi Siyasət, Sənaye və Sahibkarlıq komitəsinin sədri, ATƏT Parlament Assamblyasında nümayəndə heyətinin üzvü, Avronest Parlament Assamableyasında nümayəndə heyətinin rəhbəri və Enerji Təhlükəsizliyi komitəsinin sədri olan T.Mirkişilinin seçilmə şansının daha çox olduğu proqnozlaşdırılır.
Qeyd etdiyimiz kimi, bu dairədən namizədliyini verənlər arasında fərdi sahibkar, incəsənət nümayəndəsi, dövlət işçisi və vəkil var. Öz təşəbbüsü ilə namizədliyini irəli sürənlər, kinorejissor Zaur Rəcəbov, DOST İş Mərzkəzinin əməkdaşı Kəmalə Məmmədova, fərdi sahibkar Taleh Əlicanov və vəkil Orxan Əliyevin isə ciddi uğur qazanacağına inananlar çox azdır.
Beləliklə, 7 partiyanın və müxtəlif rəngarəng peşə təmsilçilərinin yarışacağı 43 saylı ikinci seçki dairəsində Sumqayıt üzrə ən maraqlı və gərgin mübarizə proqnozlaşdırılır. Seçici aktivliyinin də məhz bu dairədə yüksək olacağı gözlənilir.
Elşən Yəhyayev
Xəbərdən istifadə edərkən istinad etmək vacibdir.
