Xeberle.com saytını 3 yaşının tamam olmasına sayılı günlər qalıb. İyunun 28-də bu sayt özünün 3 yaşını qeyd edəcək. Özümüz özümüzdən danışmaq istəməzdik, bu, heç doğru olmazdı. Bu 3 ildə nə qədər problem işıqlandırmışıqsa, necə fəaliyyət göstərmişiksə, şəhərimizin informasiya məkanında hansı yeri tutmuşuqsa, bunu Sumqayıt oxucuları və ictimaiyyəti daha yaxşı  bilir. Əslində heç vaxt tərif gözləməmişik, başımızı dik tutub inamla irəliləmişik, yeni yeni məqalə, reportaj, müsahibə, sorğu və xəbərlər uğrunda... Amma...
Bu səhər Xeberle.com-un fəaliyyəti haqqında bizə ünvanlanan bir məktub bizi sanki nəfəs dərməyə "məcbur etdi". Az müddət olsa da, geriyə indiyə və gələcəyə baxmağa təkan verdi. Lider TV-nin Xəbərlər Departamentində Sosial və Mədəniyyət redaksiyasının rəhbəri Elnur Niftəliyevin fikirlərini təqdim edirik:

"Sumqayıt şəhərinin mövcudluğunu hər an xatırladan sayt. Xeberle.com portalı barədə yazmağı özümə vətəndaş və həmkar borcu bildim. Xüsusən də ona görə ki, həqiqətən də məhz bu sayt fəaliyyətə başlayandan sonra 66 yaşlı şəhər barədə ilk dəfə hərtərəfli məlumatlar almağa başladıq. Bunu əminliklə deyirəm ki, Xeberle.com indi Sumqayıtın səsinə çevrilib. Bu şəhərin inkişafını da, problemlərini də, uğurlarını da, hətta sadə fəhləsindən, ən tanınmış şəxsi haqqında məlumatları, son xəbərləri bu portaldan öyrənirik. İnternet məkanda bu şəhərin mövcudluğunu hər an xatırladan bu sayt nə qədər qəribə səslənsə də, yaranışı ilə sanki Sumqayıta yeni ömür bəxş etdi, Sumqayıtı sosiallaşdırdı. Fəaliyyətə yeni başladığı vaxtlarda (2012-ci il) bəlkə də kimlərsə bu portalın səmərəli, faydalı olacağına şübhə edirdi. Amma Xeberle.com-un kollektivi sübut etdi ki, bu yaxşı təcrübədir, digər şəhər və rayonlarımızın da analoji xəbər mənbələrinin olması vacibdir. Uğurlar - Xeberle.com. "