Bu gün bank və müştəri münasibətlərində yaranan problemlərdən ən önəmlisi alınan kreditlərin geri ödənilməməsidir. Çox zaman bu heç də yaxşı sonluqla nəticələnmir. Son günlərdə baş verənlər isə daha acınacaqlıdır. Hətta bəziləri təəssüf ki, ən səhv addımı atmaqdan belə çəkinmir.
Bərdə rayonunda 23 yaşlı gənc özünü Tərtərçay üzərindəki körpüdən asmaqla intihar edib. Verilən məlumata görə, Elşad Dadaşov adlı şəxsin bu addımı atmasına səbəb banklara olan kredit borcunu ödüyə bilməməsi olub.
Təəssüf ki, bu, ilk belə hal deyil. Bununla da intihar edənlər, banka olan borclarının ləğv ediləcəyini və ailəsinin düşdüyü bu çətin vəziyyətdən xilas olacağını düşünürlər. Əslində isə intihar etmək onları aldıqları borcun ödənməsindən azad etmir.
Sığorta şirkətinin nümayəndəsi Ramin Məmmədovun sözlərinə görə, bir şəxs hər hansı bir səbəbdən intihara əl atarsa, o zaman sığorta şirkəti həmin şəxsin banka olan borcunu ödəmir: "Eləcə də sərxoş, narkotik vasitə qəbul etmiş və ya qərəzli, yəni bilərəkdən etmiş olduğu hadisə nəticəsində sağlamlığına zərər dəyirsə, ölüm halı baş verirsə, eynilə sığorta şirkəti ödənişi həyat keçirmir”.
Bir müddət öncə ölkədəki bəzi özəl banklar, öz gəlirlərini artırmaq məqsədilə zaminsiz kredit verməyə başladı. Bunun nəticəsində də borcunu qaytara bilməyənlər bank tərəfindən problemli müştəri siyahısına ələvə olundu.
Bu zaman pulunu ala bilməyən banklar heç bir zamini və əmlakı olmayan müştərilərə zəng vasitəsilə psixolojı təzyiq göstərməyə başladı.
Mütəxəssislər bankların bu üsullardan istifadə etməsinin qanunsuz olduğunu, yaranmış bu çətin vəziyyətin isə yalnız məhkəmə tərəfindən verilmiş qərara əsasən həll oluna biləcəyini bildirir.
Ekspert Əkrəm Həsənov bildirdi ki, belə olan halda bank borclunu məhkəməyə verməlidir: "Məhkəmə də borclunun əgər əmlakı varsa, əmlakını qeydə alır və ödəməni həyata keçirmək üçün qərar verir. Əmlakı yoxdursa, iş bağlanır. Bundan başqa əmək haqqı alırsa, əmək haqqından aylıq cüzi miqdarda pul tutulur və banka ödənilir”.
Ekspertlər onu da bildirdi ki, qanuna görə əgər borc alanın zamin duranı, əmlakı və ya mülkü yoxdursa, bankın həmin şəxsdən heç nə tələb etmə hüququ yoxdur.
Araşdırmalar göstərir ki, bəzi Avropa ölkələrində bu vəziyyətlə qarşılaşan vətəndaş müflis olması ilə bağlı məhkəməyə müraciət edir.
Məhkəmə isə kredit alanın vəziyyətini nəzərə alaraq, sadələşdirilmiş ödəniş üçün banka müraciət edir və hər iki tərəfin hüququ qorunaraq məsələnin həlli istiqamətində işlər aparılır.
Sonda mütəxəssislər gələcəkdə bu kimi xoşa gəlməz halların yaşanmaması üçün kredit alarkən vətəndaşlara, aylıq gəlirini, öz imkanlarını nəzərə almağı məsləhət görür. (anspress.com)
Xəbərdən istifadə edərkən istinad etmək vacibdir.
