Keçmiş icra başçısının ənənəvi tədbirləri tarixə çevrildi
Sumqayıt şəhərinin keçmiş icra başçısı Eldar Əzizov şəhərə icra başçısı təyin edildiyi gündən keçirdiyi bir sıra tədbirlərlə yadda qalıb. Onlardan biri də, hər il sentyabr ayının 24-də Sumqayıt şəhərinin yarandığı günün şərəfinə təşkil olunmuş "Şəhər günü” bayramı idi. Əldə etdiyimiz məlumata görə, şəhərin yeni icra başçısı Zakir Fərəcov bayramın, həmçinin tədbir çərçivəsində keçirilməsi nəzərdə tutulan ən böyük yallı rəqsinin keçirilməsilə bağlı icra strukturlarına heç bir göstəriş verməyib. Bu barədə şəhər icra hakimiyyətinin ictimai-siyasi və humanitar məsələlər şöbəsinin baş məsləhətçisi Seyfəddin Rəhimov xeberle.com-a eksklüziv açıqlamasında bildirib. Belə görünür ki, artıq bu ildən etibarən "Şəhər günü” bayramı qeyd edilməyəcək. Bir sözlə artıq, keçmiş icra başcısının Sumqayıt şəhərində keçirdiyi bir sıra ənənəvi tədbirləri tarix oldu.
Aytən Əli
Xeberle.com