24 il öncə 1991-ci il noyabrın 20-də Xocavənd rayonunun Qarakənd kəndi yaxınlığında Ermənistan silahlı qüvvələrinin atəşə tutması nəticəsində Azərbaycanın 22 nəfər rəsmi şəxsinin olduğu vertolyot qəzaya uğrayıb. Və  vertolyotda olan 22 nəfərin hamısı həlak olub. Onların arasında Zülfü Saleh oğlu Hacıyev də vardı. Vətəninə, xalqına ürəkdən bağlı olan Zülfü Hacıyev hansı vəzifədə işləyibsə həmişə vətəndaşların hörmət və rəğbətini qazanıb. Mənfur düşmənin törətdiyi məlum hadisədən illər keçməsinə baxmayaraq Zülfü Hacıyev insanların yaddaşında xeyirxah əməllər sahibi, nurlu ziyalı kimi qalıb. 
Bir daha xatırlayaq:
Zülfü Hacıyev 21 mart1935-ci ildə Göyçə mahalının Basarkeçər rayonunun Böyük Məzrə kəndində anadan olmuşdur. Doğma kənddə orta məktəbi medalla, Azərbaycan Politexnik İnstitutunun inşaat fakültəsini isə fərqlənmə diplomu ilə bitirmişdir.Təyinatla Krasnoarmeysk şəhərinə göndərilib, sıravi mühəndislikdən idarə rəisi vəzifəsinə qədər yüksəlib. Bir müddətdən sonra Sumqayıt şəhərinə qayıtmış, əvvəlcə mühəndis, sonra isə indi adını daşıyan Qırmızı Əmək Bayrağı Ordenli Sənaye Tikinti Nazirliyinin Sumqayıtdakı 1 saylı Tikinti Trestinin rəisi vəzifəsinə irəli çəkilmişdir.
O, Sumqayıt Şəhər İcraiyyə Komitəsinin sədri, Naxçıvan MSSR Nazirlər Sovetinin sədri, Sumqayıt Şəhər Partiya Komitəsinin birinci katibi, 1989-cu ildən 20 noyabr 1991-ci ilədək Azərbaycan Nazirlər Kabinetinin sədr müavini vəzifələrində çalışmış, plenum üzvü, ali və yerli sovetə deputat seçilmişdir. 1976-cı ildən ömrünün sonunadək 4 dəfə Azərbaycan SSR Ali Sovetinin deputatı seçilmişdir.

Zülfü Hacıyev Nazirlər Kabinetinin sədr müavini işlədiyi vaxt həm də Dağlıq Qarabağ üzrə təşkilat komitəsinin üzvü olmuş, son vaxtlar isə həmin komitəyə sədrlik edirdi.

1982-ci ildən 1988-ci ilin mart ayınadək orada tükənməz enerji ilə çalışmışdır. O, Naxçıvana rəhbər vəzifəyə gəldikdən sonra Nazirlər Soveti, onun strukturları dəyişildi, sözün əsl mənasında fəallaşdılar.(moderator.az)