Danışacağım bu məsələlər bəzi insanlar üçün "Min bir gecə" nağıllarına bənzəsə də, ancaq real faktlara söykənən materiallardır. Başıbəlalı Sumqayıt Dövlət Universitetinin tarixçəsi haqqında "məlumatlar" kiçikdən-böyüyə,məncə,çoxlarına məlumdur. Burada, sözsüz ki, universitetdaxili rüşvət məsələsindən danışılır. 2013-2015-ci illər ərzində SDU-nun magistratura pilləsində təhsil almışam. Sözün düzü, mən heç kimə rüşvət verməmişəm və həmişə də haqqımı tələb etmişəm. Ancaq digər tələbələrə, eləcə də bakalavr pilləsində təhsil alan tələbələri sıxanda çox narahatçılıq keçirirdim. Hər dəfə danışanda hamı deyərdi ki, onların dərdi sənə qalıb?! Ancaq məsələ bununla bitmirdi. Təzə rektorun gəlişi, sanki böyük sevinc hissi ilə qarşılandı. Ən azından hamı düşünürdü ki, rüşvətə son qoyulacaq. Heç də hər kəsin düşündüyü kimi olmadı. Rüşvət qalmaqalı bir az da sürətləndi. Oxuduğum müddətdə 90 nəfər magistrant var idi. I kursun sonunda elmi-tədqiqat təcrübəsi var idi. Hər kəs bu tədqiqatda iştirak etməli idi. Ancaq cəmi 4 magistrant bu tədqiqatda iştirak etmişdi. Bəs 86 nəfər necə oldu?!

Digər bir məsələ II kursun sonunda elmi-pedaqoji təcrübə var idi. Bəzi tələbələrə deyilmişdi ki, ola bilsin ki, sənin keçdiyin dərsi bəyənməsinlər. Bu səbəbdən də həm I, həm də II təcrübə üçün 100 manat verilməli idi. Dissertasiyaların yazılması və müdafiəsi məsələsi ən gündəmdə olan məsələlərdən idi.
Əgər bu universitet təhsildən danışırsa, niyə 1000-1200 manata tələbəni sıxıb məcbur edir ki, bu pul ödənilməlidir?! Semestr imtahanlarına gəldikdə, standart qiymət mövcuddur. Bu, həm bakalavr, həm də magistratura pillələri üçün ortaqdır. Bakalavr pilləsində təhsil alan elə qruplar olur ki, 20-25 nəfərdən 16-17 nəfər birdən imtahandan kəsilir. İmtahanın nəticələri elan olunandan yarım saat sonra 60 manat ödəyən tələbə həmin imtahanı keçmiş hesab edilir. Qanunla imtahan monitorinq şəklində keçirilirsə, niyə qələmlə yox karandaşla imtahanlar yoxlanılır?! Bu problem hələ də yaşanır. Buraxılış işlərinin yazılışı təxminən 800, bəzən 1000 manata bərabərdir. Ən əsas məsələ nədən ibratədir onu deyim. Tədris prosesi Bolonya sisteminə əsaslanır. Vəzifə borcu kimi tyutorların işi olan bu məsələ tələbələrə doğru-dürüst şəkildə verilmir. Bu səbəbdən də tələbələr imtahandan kəsiləndən sonra ya rüşvət verməli, ya da yay məktəbinə yazılmalı olurlar. Əslində isə imtahandan kəsilən tələbə aşağı kursda oxuyan tələbələrlə dərslərdə oturub həmin dərsi dinləyəndən sonra imtahana daxil ola bilər. Nə isə... Dediyim bu fikirləri tələbə dostlarımı çox istədiyim üçün yazdım. Çalışın haqqınızı tələb edin!

Elvin Paşayev
Xeberle.com